2 Ahemvo 24 - AHYERƐLƐ KRONGRON

Pɔfoɛ mɔ di Yuda so ngonim

¹ Yehoakim aberɛ so, Babilɔn hene Nebukadenesa fale koɛ ɔɔtetale Yuda. Yehoakim yɛle akoaa Nebukadenesa sa nu afoɛ nza. Afei Yehoakim yɛle ye nwo lɔen.

² Na AWURADE somane koɛhonɛfoɛ ɛlɔen fili Kaldeafoɛ, Siriafoɛ, Moabofoɛ ne Amonfoɛ nu maa bɛhɔle Yehoakim so. Ɔmaa bɛɛfale koɛ bɛtetale Yuda maen ne kyɛ bɛsɛkye ye, kyɛbɔ AWURADE dwirɛ bɔ ɔnate ye somvoɛ ngɔmhyɛlɛfoɛ so hane ne, ɔte ne ala.

³ AWURADE yeɛ ɔhyɛle sɔ ɛhawo ne maa ɔwale Yuda so ɔ, kyɛ ɔfa ɔpɛ Yuda asue fi ye nyunu, ɔnate Manase bɔne amukoraa bɔ ɔyɔle ne ati,

⁴ ɔne mogya bɔ odi be bɔ ɔhã guale ne ati. Ofikyɛ ɔhane mogya bɔ odi be ɔ guale wɔ Yerusalem nu amukoraa, na né AWURADE ayɛ ye adwene kyɛ ɔngɔfa sɔ bɔne ne ngɔhyɛ.

⁵ Afei Yehoakim nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu.

⁶ Afei Yehoakim toale ye mbanyi mɔ, na ɔwa bienzua Yehoakyin lili ye bia.

⁷ Misraim hene wamvi ye maen nu wangɔ koɛ ko, ofikyɛ né Babilɔn hene wali Misraim hene so ngonim wafa ye sa wato ye aseɛ so, fi Misraim bɔnza ne anu kɔka asue Yufreti noa.

Yehoakyin di Yuda so hene

⁸ Yehoakyin lili hene ne, né wali afoɛ buru ne mmɔtwɛ, na olili hene bosome nza wɔ Yerusalem. Oni ole Elnatan bɔ ofi Yerusalem ne ɔwa Nehusta.

⁹ Ɔyɔle bɔ ɔte bɔne wɔ AWURADE nyunu ɔ, kyɛbɔ ye baba yɔle ne ala.

¹⁰ Sɔ mmerɛ ne, Babilɔn hene Nebukadenesa ye lɔen bɛfale koɛ bɛɛtetale Yerusalem, na betuale kuro ne.

¹¹ Babilɔn hene Nebukadenesa hɔle Yerusalem wɔ mmerɛ bɔ né ye lɔen ne begu so betua kuro ne ɔ.

¹² Na Yuda hene Yehoakyin bɔbɔ ɔfale ye nwo wurale Babilɔn hene sa ole tole nu kyɛ wali ngoguo ɔne oni, ye somvoɛ mɔ, ye safohene mɔ yeɛ ye ahemvie mbanyi mɔ yeɛ bɛyɔle sɔ ɔ. Babilɔn hene lili hene ne, ye afoɛ bɔ ɔtɔ so mmɔtwɛ ne anu yeɛ ɔhyele ye nnure ɔ.

Babilɔn hene di Yerusalem so ngonim

¹³ Nebukadenesa sesale AWURADE awuro agudeɛ amukoraa, ɔne ahemvie berɛ agudeɛ ne hɔle. Esikaa kɔkorɛ kulie amukoraa bɔ Yisrael hene Solomon maa bɛyɔle beguale AWURADE asɔneyɛɛ sua ne anu ne, ɔbobɔle bɛ. Ɛhe amukoraa sili kyɛbɔ AWURADE hane ne ala.

¹⁴ Ɔsesale Yerusalem ama amukoraa hɔle: ahemvie mbanyi amukoraa, koɛhonɛfoɛ amukoraa, mmenia apee buru bɔ bahye bɛ nnure ɔ, adwumvoɛ mɔ ne buralɛ dwumvoɛ amukoraa. Sona ko po wanga aseɛ ne aso, sana bɛ bɔ bɛngɔhora ko bɛngora hute nemɔ ala.

¹⁵ Ɔfale Yehoakyin hɔle Babilɔn, na ɔhyele Yehoakyin maame, ɔye mɔ, ahemvie mbanyi ɔne maen ne anu atitire nemɔ nnure fili Yerusalem hɔle Babilɔn.

¹⁶ Anwoserɛfoɛ amukoraa bɔ bɛ somaa te apee nzoo, bakaa dwumvoɛ ne buralɛ dwumvoɛ mɔ bɔ bɛ somaa te apee ko, bɔ sɔ mmenia ne amukoraa bɛkora bɛkɔ koɛ ne, Babilɔn hene hyele bɛ nnure fa bɛ hɔle Babilɔn.

¹⁷ Babilɔn hene fale Yehoakyin baba aliɛma Matania sili ye gya nu maa olili hene. Ɔsesane Matania dumaa frɛle ye Sedekia.

Sedekia di Yuda so hene

¹⁸ Sedekia lili hene ne, né wali afoɛ aburanyɔ ne ko, na olili hene afoɛ buru ne ko wɔ Yerusalem. Oni ole Yeremia bɔ ofi Libina ne, ɔwa Hamutal.

¹⁹ Ɔyɔle bɔ ɔte bɔne wɔ AWURADE nyunu ɔ, kyɛbɔ Yehoakim yɔle ne ala.

²⁰ Nahorɛ nu, Yerusalem ne Yuda huli AWURADE ahone maa ɔnate so AWURADE pɛle bɛ asue fili ye nyunu. Na Sedekia yɛle Babilɔn hene nwo lɔen.