2 Ahemvo 22 - AHYERƐLƐ KRONGRON

Yosia di Yuda so hene

¹ Yosia lili hene ne, né wali afoɛ mmɔtwɛ. Olili hene afoɛ aburasa ne ko wɔ Yerusalem. Oni ole Bosekateniɛ Adaya ɔwa Yedida.

² Ɔyɔle bɔ ɔtengyɛ wɔ AWURADE nyunu ɔ, na atee bɔ ye Nana Dawide fale so sole Nyameɛ ne, so ala yeɛ ye koso ɔfale ɔ. Wammakye wamva famaa anaa bɛen.

Hilkia nwu mmeraa nwomaa ne

³ Nana Yosia lili hene ne, ye afoɛ bɔ ɔtɔ so buru ne mmɔtwɛ ne anu, ɔfale ngraa somane Mesulam awa Asalia ɔwa Safan bɔ ye yeɛ ɔte AWURADE awuro berɛ ahyerɛlɛniɛ ne kyɛ,

⁴ “Kɔ ɔsɔfo panyi Hilkia berɛ. Na esikaa amukoraa bɔ fotoɛ so neafoɛ nemɔ badide bafi mmenia ne berɛ bafa bawa AWURADE awuro ne, maa ɔha.

⁵ Adwumayɔlɛfoɛ bɔ bɛnea AWURADE awuro adwuma ne aso ne, maa ɔfa owura bɛ sa. Sɔ mmenia ne, odi kyɛ bɛfa esikaa ne bie betua adwumayɔlɛfoɛ hemɔ bɔ bɛyɔ AWURADE awuro ne yé ne, bɛ kerɛ:

⁶ bakaa dwumvoɛ nemɔ, suasilɛfoɛ nemɔ, yeɛ bɛ bɔ bɛfa nyɔboɛ bɛhyehyɛ sua nemɔ. Mmenia bɔ esikaa ne wura bɛ sa ne, maa bɛfa bie bɛtɔ mmakaa ne nyɔboɛ bɔ badwa ɔ bɛfa bɛyɔ awuro ne yé.

⁷ Nakoso esikaa bɔ bafa bawura bɛ sa ne, onni kyɛ bɛmaa bebu ye nwo ngondaa, ofikyɛ bedi nahorɛ.”

⁸ Yeɛ ɔsɔfo panyi Hilkia sele ahyerɛlɛniɛ Safan kyɛ, “Manwu mmeraa nwomaa ne wɔ AWURADE awuro berɛ.” Hilkia fale nwomaa ne mane Safan ne, Safan kengale.

⁹ Yeɛ ahyerɛlɛniɛ Safan hɔle Nana Yosia berɛ ɔɔbɔle ye amaneɛ kyɛ, “Esikaa bɔ banwu ye wɔ awuro berɛ ne, wɔ ngoaa mɔ, yafa ye mukoraati yawura mmenia bɔ bɛnea AWURADE awuro berɛ adwumayɔlɛ ne aso ne, bɛ sa.”

¹⁰ Ahyerɛlɛniɛ Safan bɔle Nana Yosia amaneɛ kyɛ, “Ɔsɔfo Hilkia wafa nwomaa bie wama me.” Afei Safan kengale nwomaa ne hyirele Nana Yosia.

¹¹ Nana Yosia tele mmeraa nwomaa ne anu dwirɛ pɛ, osunzuale ye bɔbɔ ye ndaadeɛ nu.

¹² Yeɛ Nana Yosia fale ahyɛdeɛ mane ɔsɔfo Hilkia, Safan awa Ahikam, Mikaya awa Akibɔ, ahyerɛlɛniɛ Safan, ɔne Nana Yosia somvoɛ Asaya kyɛ,

¹³ “Nwomaa he bɔ banwu ye ne, nu dwirɛ ne, ɛmɔhɔ AWURADE berɛ beebisa bɛma mene maen ne, ɔne Yuda amukoraa. AWURADE afɛ yɛ so yaa piri paa, ofikyɛ yɛ nana mɔ bandie nwomaa he anu dwirɛ, yeɛ edwirɛ amukoraa bɔ bahyerɛ ye wɔ nu kyɛ yɛli so ne, banni so.”

¹⁴ Yiti ɔsɔfo Hilkia, yeɛ Ahikam, Akibɔ, Safan ne Asaya besili nu bɛhɔle ngɔmhyɛlɛniɛ brasua Hulda berɛ. Ohu ole Salum bɔ ye baba ole Tikiwa, bɔ ye baba ole Hahase bɔ ɔnea asɔfo mɔ bɛ ndaadeɛ so ne. Né Hulda te Yerusalem borɔnoɛ foforɛ paa ne aso, na berɛ yeɛ bɛhɔle ye berɛ beebisale Nyameɛ noa dwirɛ ɔ.

¹⁵ Hulda fa tole bɛ nyunu kyɛ, “AWURADE Yisrael Nyameɛ nwa: Ɛ́mɔhã behyire biaa bɔ ɔsomane ɛmɔ wɔ me berɛ ne kyɛ,

¹⁶ AWURADE nwa nyoo: nwomaa bɔ Yuda hene akenga ne, ngogyina nu dwirɛ amukoraa so ngɔfa amaneɛ ngɔto maen he ɔne nu ama so.

¹⁷ Ofikyɛ bapo me, bayera ɛyɛɛ bama nyameɛ foforɛ mɔ, na ɔnate so bafa bɛ sa noa adwuma amukoraa bahu m’ahone. Yiti mafɛ maen ye aso yaa, bɔ m’ahone ngodwo ɔ.

¹⁸ Nakoso Yuda hene bɔ ɔsomane ɛmɔ kyɛ ɛmɔɔbisa AWURADE noa dwirɛ ne de, ɛ́mɔhã behyire ye kyɛ, AWURADE Yisrael Nyameɛ nwa: Ɔfa edwirɛ bɔ ate ne anwo ne,

¹⁹ mmerɛ bɔ ɛtele edwirɛ bɔ nga mvale maen he ɔne nu ama nwo, kyɛ maen ne kɔbɔ ná musue kɔto bɛ ne, ɔnate kyɛ enuni wɔ nwo ná ɛbrɛle wɔ nwo ase wɔ AWURADE nyunu, ná afei esunzuale wɔ ndaadeɛ nu, ná esuni wɔ me nyunu ne ati, me koso mate bɔ aha ne. Bɔ AWURADE kã hɔ ɛne.

²⁰ Yiti tie, ngɔmaa ɛkɔɔtoa wɔ mbanyi mɔ, na ngɔmaa ekowu asomdwee nu kɔɔla wɔ kumaa nu. Na musue amukoraa bɔ ngɔprapra ngogua maen he aso ne, wɔ de engonwu bie.” Besa bɛfale edwirɛ ne bɛɛbɔle Nana Yosia amaneɛ.