2 Ahemvo 21 - AHYERƐLƐ KRONGRON

Manase di Yuda so hene

¹ Manase lili hene ne, né wali afoɛ buru ne nyɔ, na olili hene afoɛ aburannu ne nnu wɔ Yerusalem. Oni ole Hefesiba.

² Ɔyɔle bɔ ɔte bɔne wɔ AWURADE nyunu ɔ. Maen maen mɔ bɔ AWURADE foane bɛ fili Yisraelfoɛ nyunu ne, musue nningyein bɔ bɛyɔle ne, ye koso ɔyɔle bie.

³ Ofikyɛ bosoen asɔneyɛɛ mɔ bɔ ye baba Hesekia obubuli bɛ ne, Manase sa sili. Osisili Baal afɔleɛ mmokyea, na ogyinane Asera dosii, kyɛbɔ Yisrael hene Ahabo yɔle ne ala. Ɔsɔnene ewienu abɔdeɛ amukoraa ná ɔsole bɛ.

⁴ AWURADE awuro bɔ AWURADE hane ye nwo dwirɛ kyɛ, “Yerusalem yeɛ ngɔmaa bɛkɔsɔne me dumaa” ne, Manase sisili mmosoen afɔleɛ mmokyea wɔ berɛ.

⁵ Aluo nyɔ bɔ bɛwɔ AWURADE awuro berɛ ne, osisili afɔleɛ mmokyea mane ewienu abɔdeɛ ahoroɔ amukoraati wɔ berɛ.

⁶ Ɔfale ɔwa bienzua bɔle afɔleɛ wɔ see nu. Ɔhɔle abisa, ɔyele ngonyaa, na ɔfale ye nwo bɔle nzamangɔmhyɛlɛfoɛ ne abayifoɛ. Ɔyɔle bɔ ɔte bɔne pee wɔ AWURADE nyunu fa huli AWURADE ahone.

⁷ Bosoen Asera amoen bɔ osele ne, ɔfa ɔɔpenane AWURADE awuro berɛ; awuro bɔ AWURADE hane ye nwo dwirɛ hyirele Dawide ne ɔwa Solomon kyɛ, “Sɔ awuro he anu, yeɛ Yerusalem bɔ maneanea Yisrael mmusua kure amukoraa nu matu masie berɛ ne, berɛ yeɛ me dumaa kɔtena afebɔɔ ɔ.

⁸ Sɛ Yisraelfoɛ bekoli m’ahyɛdeɛ bɔ mafa mama bɛ amukoraa so nahorɛ nu, ná bekoli mmeraa bɔ me somvoɛ Mose fa mane bɛ ne amukoraa so nahorɛ nu a, ye de aseɛ bɔ mva mane bɛ nana mɔ ne, mengɔmaa bɛngɔbɔ aya bengofi so ko.”

⁹ Nakoso bandie ye dwirɛ. Manase lakalakale bɛ maa bɛyɔle bɔne bɛtrale maen maen mɔ bɔ AWURADE huhuni bɛ fili Yisraelfoɛ nyunu nemɔ.

¹⁰ AWURADE nate ye somvoɛ ngɔmhyɛlɛfoɛ nemɔ aso hane kyɛ,

¹¹ “Ɔnate kyɛ Yuda hene Manase wayɔ sɔ akyiwadeɛ nemɔ, ná ye bɔne tra Amorifoɛ bɔ né bɛwɔ Kanaan aseɛ so koraka yeɛ ɔbaatena so ne, bɛ bɔne amukoraa, ná afei ɔnate ye mmosoen nemɔ aso wahwehwe Yuda wahɔ bɔne nu ne ati,

¹² yiti AWURADE Yisrael Nyameɛ nwa, “Musue bɔ mebaaprapra megua Yerusalem ne Yuda so ne, ebiala bɔ ɔkɔte ne, ye kunu kɔte ye.

¹³ Edwirɛ bɔ mmaa ɔtole Samaria ne, ɔne amaneɛ bɔ mmaa ɔtole Ahabo awuro ama ne, ye ala yeɛ ngɔmaa ɔkɔto Yerusalem ɔ. Ngɔbɔ Yerusalem tɔɔ, na ngɔprapra nu mmenia bo kyɛbɔ sona nwunzi talie ye kunu ne ye si ɔ.

¹⁴ Na me maen ne, bɛ bɔ bekonya bɛ ti bekodidi nu ne, ngɔpo bɛ, ná mafa bɛ mawura bɛ pɔfoɛ mɔ sa. Bɛkɔyɛ kyɛ kaka bɔ obiɛngo kye ye di ɔ, ɔne koɛ nu nzesadeɛ bɛkɔma bɛ pɔfoɛ amukoraa.

¹⁵ Ofikyɛ ofi mmerɛ bɔ bɛ nana mɔ fili Misraim bɛwale bɔ ɔbaadwu ɛnɛ ɔ, bayɔ bɔ ɔte bɔne wɔ me nyunu ɔ, na bafa bahu m’ahone.”

¹⁶ Asa koso, Manase hane mogya bɔ odi be ɔ pee guale, kɔpem kyɛ ɔhane mogya guale Yerusalem nekaa biala ɔ. Asora bɔne bɔ ɔhwehwene Yuda hɔle nu maa ɔnate so bɛyɔle bɔ ɔte bɔne wɔ AWURADE nyunu ne.

¹⁷ Afei Manase nwo dwirɛ ngaa ne, bɔ ɔyɔle amukoraa, ɔne bɔne bɔ ɔyɔle ɔ, amba, bahyerɛ ye wɔ Yuda ahemvo nwo dwirɛ nwomaa ne anu.

¹⁸ Manase toale ye mbanyi mɔ. Turo bɔ ɔwɔ ye awuro berɛ bɔ bɛfrɛ ye Yusa turo ne, nu yeɛ besiele ye ɔ, na ɔwa bienzua Amon lili ye bia.

Amon di Yuda so hene

¹⁹ Amon lili hene ne, né wali afoɛ aburanyɔ ne nyɔ, na olili hene afoɛ nyɔ wɔ Yerusalem. Oni ole Yotebaniɛ Haruse ɔwa Mesulemete.

²⁰ Ɔyɔle bɔ ɔte bɔne wɔ AWURADE nyunu ɔ, kyɛbɔ ɔse Manase yɔle ne ala.

²¹ Bɔne bɔ ye baba yɔle ne amukoraa, ye koso ɔyɔle bie. Mmosoen bɔ ye baba sole bɛ ne ye koso ɔsole bɛ, na ɔsɔnene bɛ.

²² Ɔpole AWURADE ye nana mɔ bɛ Nyameɛ ne, na wandie AWURADE dwirɛ.

²³ Nana Amon ye mbanyi mɔ bɔle ye nwo porɛ, na behuni Amon wɔ ye awuro.

²⁴ Nakoso maen ne anu ama huhuni bɛ bɔ bɛbɔle Nana Amon nwo porɛ ne amukoraa, na maen ne anu ama fale ɔwa Yosia belili hene besili ye gya nu.

²⁵ Afei Amon nwo dwirɛ ngaa ne, bɔ ɔyɔle ne, amba, bahyerɛ ye wɔ Yuda ahemvo nwo dwirɛ nwomaa ne anu.

²⁶ Besiele ye wɔ ye bɔbɔ ye asieleɛ nu wɔ turo bɔ bɛfrɛ ye Yusa ne anu, na ɔwa bienzua Yosia lili ye bia.