2 Ahemvo 2 - AHYERƐLƐ KRONGRON

Elia kɔ nyameɛso

¹ Mmerɛ bɔ AWURADE baafa Elia kɔ nyameɛso wɔ mvrama bɔ ɔpɛ ye nwo nu ne, né Elia ne Elisa bɛnate atee so bɛkɔ Gilgal.

² Na Elia sele Elisa kyɛ, “Mesrɛ wɔ, tena wa ofikyɛ AWURADE asoma me Betel.” Nakoso Elisa buale kyɛ, “Kyɛ AWURADE te ase ye, ɔne kyɛ wɔ koso ɛte ase ye, mengɔte me nwo mengofi wɔ nwo.” Yiti besili nu bɛhɔle Betel.

³ Ngɔmhyɛlɛfoɛ fekue bɔ né bɛwɔ Betel ne, beeyiale Elisa, na bebisale ye kyɛ, “Aso ɛse kyɛ ɛnɛ AWURADE kɔfa wɔ mene kofi wɔ nwo kɔhɔ ɔ?” Na obuale kyɛ, “Yoo mese, nakoso nnɛma ɛmɔka ye nwo hwee.”

⁴ Elia sele Elisa kyɛ, “Elisa, mesrɛ wɔ tena wa ofikyɛ AWURADE asoma me Yeriko.” Nakoso Elisa buale kyɛ, “Kyɛ AWURADE te ase ye, ɔne kyɛ wɔ koso ɛte ase ye, mengɔte me nwo mengofi wɔ nwo.” Yiti besili nu bɛhɔle Yeriko.

⁵ Ngɔmhyɛlɛfoɛ fekue bɔ bɛwɔ Yeriko ne, bɛhɔle Elisa nwo berɛ beebisale ye kyɛ, “Aso ɛse kyɛ ɛnɛ AWURADE kɔfa wɔ mene kofi wɔ nwo kɔhɔ ɔ?” Na obuale kyɛ, “Yoo mese, nakoso nnɛma ɛmɔka ye nwo hwee.”

⁶ Yeɛ Elia sele Elisa kyɛ, “Mesrɛ wɔ tena wa ofikyɛ AWURADE asoma me asue Yɔɔdan noa.” Nakoso obuale kyɛ, “Kyɛ AWURADE te ase ye, ɔne kyɛ wɔ koso ɛte ase ye, mengɔte me nwo mengofi wɔ nwo.” Yiti bɛ munyɔ bɛtoale so bɛhɔle.

⁷ Ngɔmhyɛlɛfoɛ fekue ne, bɛ nu aburannu tele bɛ nwo beegyinane dede kãa, wɔ mmerɛ bɔ né Elia ne Elisa bɛ munyɔ begyigyi asue Yɔɔdan noa ne.

⁸ Yeɛ Elia yele ye ataadeɛ aguasoɛ ne, ɔbobɔle fa fini asue ne anye, na asue ne anu pakyele nyɔ guale bɛen ne famaa, kɔpem kyɛ bɛ munyɔ bɛnatele bɛpɛle wɔ aseɛ wosee so ɔ.

⁹ Bɛpɛle asue ne beyiele ne, Elia bisale Elisa kyɛ, “Nzikyɛ yeɛ nyɔ mma wɔ koraka né AWURADE afa me wafi wɔ nwo wahɔ ɔ?” Elisa buale kyɛ, “Mesrɛ wɔ, wɔ sunzum ne, maa ye mmɔhoɛ nyɔ ɔ́bra me so.”

¹⁰ Yeɛ Elia sele ye kyɛ, “Abisa nikyee bɔ ɔyɛ se ɔ. Nakoso, mmerɛ bɔ Nyameɛ ɔfa me fi wɔ nwo berɛ kɔ ne, sɛ enwu me a, ye de wɔ sa kɔhã ye. Nakoso sɛ annwu me de a, ye de wɔ sa ngɔhã ye.”

¹¹ Begu so bedi ngɔmɔ bɛkɔ ne, mvum nu, see teaseɛnam bie bɔ see mbɔngɔ bɛtwe ɔ ɔɔtetele bɛ munyɔ bɛ nu. Na mvrama bɔ ɔpɛ ye nwo bie fale Elia hɔle nyameɛso.

¹² Elisa hɔle so neane, na ɔteane nu kyɛ, “Me baba ee! Me baba ee! Yisrael teaseɛnam mɔ ne pɔngɔhanɛfoɛ ee! Na afei Elisa wannwu Elia ko ne. Elisa sɔle ye bɔbɔ ye ataadeɛ nu suale nu nyɔ.

Elisa si Elia gya nu

¹³ Elia ataadeɛ aguasoɛ bɔ ofili ye nwo puro guale ase ne, Elisa mane so, na osa hɔle oogyinane asue Yɔɔdan noa.

¹⁴ Elia ataadeɛ aguasoɛ bɔ ofili ye nwo puro guale ase ne, Elisa fa fini asue ne anye, na obisale kyɛ, “AWURADE, Elia ye Nyameɛ ne, ɔwɔ ni?” Ɔfale ataadeɛ ne fini asue ne anye ne, asue ne anu pakyele nyɔ guale bɛen ne famaa, na ɔfale nu pɛle asue ne.

¹⁵ Ngɔmhyɛlɛfoɛ fekue bɔ né bɛwɔ Yeriko ne, benwuni Elisa wɔ dedeede ne, bɛteane nu kyɛ, “Elia sunzum ate ape Elisa so.” Beeyiale Elisa, na bɛbɔle bɛ nu ase wɔ ye nyunu.

¹⁶ Besele ye kyɛ, “Tie, wɔ somvoɛ mɔ, mmienzua anwoserɛfoɛ aburannu wɔ yɛ nu. Yɛsrɛ wɔ, maa bɛhɔ bɛɛpena wɔ mene. Ebiaa, AWURADE Sunzum ama ye so waato bokaa bie aso, anaa bɔnza bie anu.” Na obuale kyɛ, “Daabi, nnɛmɔmaa bɛkɔ.”

¹⁷ Nakoso bɛhɔle so bɛsrɛle ye alaa kɔpem kyɛ afei de ɔyɛle ye ahomete, na ɔhane kyɛ, “Ɛ́mɔma bɛhɔ ee.” Yiti bɛsomane bɛ nu aburannu maa bɛɛpenane Elia ɛlɛsa, nakoso bannwu ye.

¹⁸ Besa bɛwale Elisa berɛ ne (né ɔtɛ wɔ Yeriko), na osele bɛ kyɛ, “Manga mangyire ɛmɔ kyɛ, nnɛma ɛmɔkɔ?”

Elisa ye anwonyerɛ fi nzue nu

¹⁹ Afei Yeriko kuro ne anu ama sele Elisa kyɛ, “Me mene, kyɛbɔ wɔ bɔbɔ anwu ye ne, nekaa bɔ kuro ne la ne, ɔte kama. Nakoso ɛwa nzue de ɔtte mayee, yeɛ aseɛ ne koso ɔngye aleɛ.”

²⁰ Na Elisa sele kyɛ, “Ɛ́mɔfa ngyee begua komiti monɛ nu bɛbrɛ me.” Na bɛfa bɛbrɛle ye.

²¹ Yeɛ Elisa hɔle mbombonzue ne anwo, ohwiele ngyee ne guale nu, na ɔhane kyɛ, “AWURADE nwa nyoo, ‘Mama nzue he ayɛ paa. Ofi ɛnɛ bɔ ɔkɔ ɔ, nzue he, ɔngɔma ebiala ngowu, yeɛ ɔngɔma ebiala ngɔpɔ baa.’ ”

²² Yiti nzue ne yɛle paa maa waadwu ɛnɛ, kyɛbɔ Elisa noa dwirɛ te ne ala.

²³ Elisa fili berɛ kyɛ ɔkɔ Betel. Na ɔnate atee so bɔ ɔkɔ ne, mmɛɛmaa biemɔ fi kuro ne anu bɛɛhane ye anyinga kyɛ, “Fi wa kɔ, baba ati so palowaa! Fi wa kɔ, baba ati so palowaa!”

²⁴ Ɔpɛnene ye nye neane bɛ, na ɔfale AWURADE dumaa payele bɛ. Yeɛ kwabrafo beleɛ nyɔ fili eburo bɛɛtetele mmɛɛmaa nemɔ anu aburanna ne nyɔ nu pasapasa.

²⁵ Elisa fili berɛ ne, ɔtoale so hɔle Kamɛl bokaa ne anwo, na osa wale Samaria.