2 Ahemvo 18 - AHYERƐLƐ KRONGRON

Hesekia di Yuda so hene

¹ Yisrael hene Ela ɔwa Hosea lili hene ne, ye afoɛ nza ne anu, Yuda hene Ahase ɔwa Hesekia lili hene.

² Hesekia lili hene ne, né wali afoɛ aburanyɔ ne nnu, na olili hene afoɛ aburanyɔ ne ngona wɔ Yerusalem. Oni ole Sakaria awa Abi.

³ Ɔyɔle bɔ ɔtengyɛ wɔ AWURADE nyunu ɔ, kyɛbɔ ye Nana Dawide yɔle ne ala.

⁴ Otutuli asɔneyɛɛ nemɔ abo, obubuli bonima nemɔ, na ɔpepɛle Asera dosii nemɔ guale. Kɔɔbere ewoo bɔ Mose yɔle ne, obubuli nu. Ofikyɛ ɔbaadwu sɔ mmerɛ ne, né Yisraelfoɛ bɛyera ɛyɛɛ wɔ kɔɔbere ne aso bɛsɔne ye: né bɛfrɛ ye Nehustan.

⁵ Hesekia fale ye nwo tole AWURADE Yisrael Nyameɛ so. Ye sɔ ne ati Yuda ahemvo bɔ belili ye nyunu bɛtenane bia so, ɔne bɛ bɔ ye wue asi bɛtenane bia so ne, bɛ nu biala ɔnne berɛ bɔ ɔsole Nyameɛ kyɛ ye ɔ.

⁶ Ofikyɛ olili AWURADE si yé. Wandwe ye nwo wamvi AWURADE nwo, na mmom olili AWURADE mmeraa dwirɛ bɔ ɔfa mane Mose ne aso.

⁷ Nikyee biala bɔ ɔyɔle ne, oyiele ye yé ofikyɛ AWURADE gyinane ye si. Ɔyɛle Asiria hene nwo lɔen, na wanzo ye.

⁸ Olili Filistifoɛ so ngonim alaa maa oodwuli Gasa ne ye mbɔtam. Olili nguro mmaa mmaa ne nguro mbiri bɔ bato bɛ nwo fasue ɔ so ngonim.

⁹ Hesekia lili hene ne, ye afoɛ nna ne aso, né Yisrael hene Ela ɔwa Hosea olili Yisrael hene ɔ, ye afoɛ nzoo ɛne. Sɔ mmerɛ ne, Asiria hene Salmanese fale koɛ ɔɔtetale Samaria. Otuale kuro ne,

¹⁰ na afoɛ nza sone ne, olili kuro ne aso ngonim. Hesekia lili hene ne, ye afoɛ nzia ne aso, né Hosea lili Yisrael hene ɔ, afoɛ ngona ɛne. Sɔ mmerɛ ne yeɛ Salmanese lili Samaria so ngonim ɔ.

¹¹ Asiria hene soale Yisraelfoɛ hɔle Asiria, na ɔmaa bɛɛtenane Hala, asue Habo bɔ ɔla Gosan ne anoa, ɔne Medese nguro nemɔ aso.

¹² Sɔ dwirɛ ne tole Yisraelfoɛ, ofikyɛ bandie AWURADE bɛ Nyameɛ dwirɛ, na mmom bebuli ye apam so. Bɔ AWURADE somvoɛ Mose hyɛle ne amukoraa, bandie, na banni so.

Senakeribo fa koɛ kɔtoa Yuda

¹³ Hesekia lili hene ne, ye afoɛ buru ne nna ne anu, Asiria hene Senakeribo fale koɛ ɔɔtoale Yuda nguro bɔ bato bɛ nwo fasue ne amukoraa, na olili bɛ so ngonim.

¹⁴ Yuda hene Hesekia somane maa bɛhɔle Asiria hene berɛ wɔ Lakise beesele ye kyɛ, “Mayɔ bɔne. Yakyi koɛ bɔ afa atoa mene, na ɛtoɔ biala bɔ ɛkɔpɛ kɔma me kyɛ ndua ne, ngotua.” Yiti Asiria hene pɛle ɛdwetɛ kilo apee buru ne esikaa kɔkorɛ kilo apee ko mane Yuda hene Hesekia kyɛ otua.

¹⁵ Na ɛdwetɛ bɔ ɔwɔ AWURADE awuro berɛ amukoraa, ɔne bɔ ɔwɔ ahemvie berɛ nekaa bɔ besie nningyein ne amukoraa, Hesekia sesale ɔɔmane ye.

¹⁶ Sɔ mmerɛ ne, esikaa kɔkorɛ bɔ ɔwɔ AWURADE asɔneyɛɛ sua anoa nemɔ anwo ne, ɔne esikaa kɔkorɛ bɔ Yuda hene Hesekia wafa waboro aponnwaa nemɔ anwo ne, ɔwɔngyewɔngyele ɔfa ɔɔmane Asiria hene.

¹⁷ Nakoso Asiria hene somane ye mbanyi bɔ bɛfrɛ bɛ Tatan, Rabosari ne Rabesake maa bɛ ne koɛhonɛfoɛ pee befili Lakise bɛhɔle Nana Hesekia berɛ wɔ Yerusalem. Beedwuli Yerusalem ne, bɛfo beegyinane dodobɛen bɔ nzue tengyɛ fa nu kogua sorɔ dɔ ɛkwaa bɔ ɔwɔ atapoɛ atee so ne anwo.

¹⁸ Bɛsomane kyɛ bɛfrɛ Nana Hesekia bɛma bɛ nen, Hilkia awa Eliakim bɔ ɔnea ahemvie berɛ ne, ɔne ahyerɛlɛniɛ Sebena, yeɛ Asafe awa Yoa bɔ ɔte abakɔsɛm ahyerɛlɛniɛ ne, bɛ yeɛ bɛwale ɔ.

¹⁹ Yeɛ Rabesake ne sele bɛ kyɛ, “Ɛmɔhã behyire Hesekia kyɛ, Asiria hene bɔ ɔte ɛhene bɔ odi mu paa ne, obisa wɔ kyɛ, Nzikyɛ yeɛ afa wɔ nwo ato so bɔ wamaa asi wɔ hue sɔ ne?

²⁰ Ɛnwa nzɛ bɛ noa mbaen yeɛ bɛfa bɛko koɛ ɔ? Nwa yeɛ afa wɔ nwo ato ye so bɔ yiti yeɛ ayɛ me nwo lɔen ye?

²¹ Tie, Misraim yeɛ afa wɔ nwo ato ye so ɔ? Ɔte kyɛ pɔmaa bɔ onzo ɔ, na ebiala bɔ okokisa ye ne, okobu kɔwɔ ye sa nu. Sɔ yeɛ Misraim hene Faro fa di ebiala bɔ ɔkɔfa ye nwo kɔto ye so ɔ.

²² Nakoso ebiaa ɛmɔkɔhã bekohyire me kyɛ, ‘Yafa yɛ nwo yato AWURADE yɛ Nyameɛ so.’ Aso nna ye asɔneyɛɛ mɔ ne afɔleɛ bokyea mɔ yeɛ Hesekia wabubu bɛ ye? Aso Hesekia wanga wangyire Yuda ne Yerusalem kyɛ, Afɔleɛ bokyea he bɔ ɔwɔ Yerusalem ne, so yeɛ ɔsɛ kyɛ ɛmɔsɔne ɔ’?

²³ Bra ná ɛne me mene Asiria hene bɛyɛ nhyehyɛleɛ: sɛ ekonya bɛ nwo pɔngɔhanɛfoɛ a, ahaa ngɔma wɔ mbɔngɔ apee nyɔ.

²⁴ Me mene safohene mmaa mmaa nemɔ po, ɛyɛ sɛ né ahora agyina bɛ nu ko nyunu, wɔ aberɛ bɔ Misraim teaseɛnam mɔ ne pɔngɔhanɛfoɛ yeɛ afa wɔ nwo ato bɛ so ɔ?

²⁵ Afei koso, aso nna AWURADE yeɛ wagyina me si kyɛ mva koɛ mandoa kuro ye ná nzɛkye ye ɔ? AWURADE sele me kyɛ, fa koɛ kɔteta kuro ne ná sɛkye ye.”

²⁶ Yeɛ Hilkia awa Eliakim, Sebena ɔne Yoa besele Rabesake ne kyɛ, “Wɔ ngoaa, yɛsrɛ wɔ, kã edwirɛ ne kyire yɛ wɔ Aramaeke dwudwolɛ nu, ofikyɛ yɛte Aramaeke. Nnɛdwudwo kyire yɛ wɔ Yuda dwudwolɛ nu, ofikyɛ mmenia bɔ bɛwɔ fasue ne aso ne, bɛkɔte bɔ ɛkã ne.”

²⁷ Nakoso Rabesake ne sele bɛ kyɛ, “Aso wɔ ne wɔ mene ne angome ti yeɛ me mene somane me kyɛ mangã edwirɛ he ɔ? Mmenia hemɔ bɔ bɛtete fasue ne aso ne bɛboka so, ofikyɛ bɛ koso edwirɛ kɔto bɛ maa bekoli bɛ bɔbɔ bɛ bondua ná bano bɛ bɔbɔ bɛ mmien kyɛ ɛmɔ ala.”

²⁸ Yeɛ Rabesake ne dwɔsole teane nu serɛserɛ wɔ Yuda dwudwolɛ nu kyɛ, “Ɛ́mɔtie Asiria hene bɔ ɔte ɛhene bɔ odi mu paa ne, ye noa dwirɛ!

²⁹ Nana nwa nyoo: Nnɛmɔma Hesekia lakalaka ɛmɔ, ofikyɛ ɔngɔhora ɔngɔpepɛ ngole ɛmɔ ngofi me sa nu.

³⁰ Nnɛmɔma Hesekia lakalaka ɛmɔ maa ɛmɔfa bɛ nwo bɛto AWURADE so, ná ɛmɔka kyɛ, AWURADE kɔpepɛ kole yɛ, na ɔngɔfa sɔ kuro ye ngowura Asiria hene sa.

³¹ Nnɛma ɛmɔtɛ Hesekia so, ofikyɛ Asiria hene nwa: Ɛ́mɔfite bɛbra ná ɛmɔɔli ɛmɔ ti dwirɛ wɔ me berɛ, amaa ɔnate so ebiala wanya ye bɔbɔ ye fieso aleɛ wali, na wanya ye bɔbɔ ye abura nu nzue wano,

³² kɔpem kyɛ ngɔwa ngɔɔsesa ɛmɔ ngɔhɔ aseɛ bɔ ɔte kyɛ ɛmɔ deɛ ye ala so ɔ. Aseɛ bɔ nningyein hemɔ wɔ so ɔ: aburoo ne nzaa, aleɛ ne bobe boo mɔ, olive ngoo ne woɛ, amaa ɛmɔanya ngoa ná ɛmɔanwuwu. Sɛ Hesekia lakalaka ɛmɔ kyɛ AWURADE kɔpepɛ kole ɛmɔ a, nnɛma ɛmɔtɛ ye so.

³³ Maen maen mɔ bɛ nyameɛ nemɔ, aso bɛ nu biala wahora wale ye aseɛ wafi Asiria hene sa nu le?

³⁴ Hamate ne Apade nyameɛ nemɔ, bɛwɔ ni? Sefawim, Hena ne Yiwa nyameɛ nemɔ, bɛwɔ ni? Bahora bapepɛ bale Samaria bafi me sa nu anaa?

³⁵ Maen maen mɔ bɛ nyameɛ nemɔ amukoraa, bɛ nu beni yeɛ wahora wapepɛ wale ye maen wafi me sa nu ɔ. Nzikyɛ yeɛ ɔmaa ɛdwene kyɛ AWURADE kɔpepɛ kole Yerusalem kofi me sa nu ɔ.”

³⁶ Nakoso Yudafoɛ yɛle konn bɔ bammua ye ɔ, ofikyɛ Hesekia bɔle bɛ kɔkɔ kyɛ nnɛmaa bebua ye nwo bie.

³⁷ Yeɛ Hilkia awa Eliakim bɔ ɔnea ahemvie berɛ ne, ahyerɛlɛniɛ Sebena, yeɛ Asafe awa Yoa bɔ ɔte abakɔsɛm ahyerɛlɛniɛ ne, besunzuale bɛ ndaadeɛ nu, na bɛhɔle Hesekia berɛ bɛɛfale Rabesake ne dwirɛ ne bɛbɔle ye amaneɛ.