2 Ahemvo 17 - AHYERƐLƐ KRONGRON

Hosea di Yisrael so hene

¹ Yuda hene Ahase lili bia ne, ye afoɛ bɔ ɔtɔ so buru ne nyɔ ne anu, Ela awa Hosea lili Yisrael so hene wɔ Samaria. Olili hene afoɛ ngona.

² Ɔyɔle bɔ ɔte bɔne wɔ AWURADE nyunu ɔ. Nakoso ye bɔne deɛ ne, ondwu Yisrael ahemvo bɔ belili ye nyunu moa bɛtenane bia so ne.

³ Asiria hene Salmanese lili Hosea so ngonim wɔ koɛ nu. Yiti Hosea ɔɔyɛle ye akoaa, na né otua toɔ ma ye.

⁴ Nakoso Asiria hene nwuni kyɛ Hosea ɔpena yɛ lɔen, ofikyɛ né Hosea watu ɛbɔfoɛ mɔ maa bahɔ Misraim hene bɔ bafrɛ ye Soo berɛ, yeɛ afei afoɛnoa afoɛnoa toɔ bɔ otua ma Asiria hene ne koso, wamva wangɔ. Yiti Asiria hene hyele Hosea tole kuku nu.

Asiriafoɛ kye Yisraelfoɛ nnure

⁵ Asiria hene fale koɛ ɔɔtetale Yisrael amukoraa, na oodwuli Samaria. Otuale kuro ne afoɛ nza.

⁶ Hosea lili hene ne, afoɛ bɔ ɔtɔ so ngona ne anu, Asiria hene ho fale Samaria. Ɔsesale Yisraelfoɛ hɔle Asiria. Ɔfale bɛ ooguale Hala, asue Habo bɔ ɔla Gosan ne anoa, ɔne Medese nguro nemɔ aso.

⁷ Ɛhe sili ofikyɛ né Yisraelfoɛ bayɔ bɔne batia AWURADE bɛ Nyameɛ bɔ ɔyele bɛ fili Misraim aseɛ so, ɔne Misraim hene Faro sa nu ne. Yisraelfoɛ sɔnene nyameɛ foforɛ mɔ,

⁸ na maen maen bɔ AWURADE foane bɛ fili Yisraelfoɛ nyunu ne, Yisraelfoɛ yɔle b’amammerɛ nemɔ bie. Afei belili amammerɛ bɔ Yisrael ahemvo mɔ belili bɛ ti piri bɛhyehyɛ bɛmane bɛ ne aso.

⁹ Mvealeɛ nu, Yisraelfoɛ yɔle nningyein bɔ ɔtte mayee betiale AWURADE bɛ Nyameɛ. Besisili asɔneyɛɛ sua mɔ bɛmane bɛ nwo wɔ bɛ nguro amukoraa nu, ofi nguro mmaa mmaa so kodwu nguro mbiri bɔ bato bɛ nwo fasue ɔ so.

¹⁰ Besili mmosoen bonima mɔ ne Asera dosii mɔ wɔ mmokaa ndendenn so ɔne bakaa monɛ biala abo.

¹¹ Berɛ yeɛ bɛyerale ɛyɛɛ wɔ asɔneyɛɛ nemɔ amukoraa so ɔ, kyɛbɔ maen mɔ bɔ AWURADE foane bɛ fili Yisraelfoɛ nyunu nemɔ bɛyɔle ne ala. Bɛyɔle bɔne bɛfa bewurale AWURADE apue maa ɔfɛle yaa.

¹² Né AWURADE ahã ahyire Yisraelfoɛ kyɛ nnɛmaa bɛsɔne mmosoen mɔ, nakoso bɛsɔnene bɛ.

¹³ Né AWURADE nate ngɔmhyɛlɛfoɛ amukoraa ne ye mmenia bɔ bɛse ase amukoraa so wabɔ Yisrael ne Yuda kɔkɔ kyɛ, “Ɛmɔhwe ɛmɔ nwo béfi ɛmɔ bɔne nwo, ná ɛmɔli me mmeraa dwirɛ ne m’ahyɛdeɛ so, kyɛbɔ mmeraa bɔ nhyehyɛle mane ɛmɔ nana mɔ, bɔ nnate me somvoɛ ngɔmhyɛlɛfoɛ so mva mmrɛle ɛmɔ ne, ɔte ne ala.”

¹⁴ Nakoso bandie, na mmom bɛyɛle asoserɛ kyɛbɔ bɛ nana mɔ bɔ banne AWURADE bɛ Nyameɛ banni ne, bɛyɛle ne ala.

¹⁵ Ye ahyɛdeɛ, ye apam bɔ ɔne bɛ nana mɔ yɛle, ɔne kɔkɔbɔlɛ bɔ ɔbɔle bɛ nana mɔ ne, bebuli bɛ nye beguale so. Mmosoen bɔ bɛ nwo olle mvasoɛ yeɛ beelili bɛ si ɔ, maa ɔnate so bɛ bɔbɔ koso bɛ so amma mvasoɛ. Maen maen bɔ bapɛ Yisraelfoɛ nwo bayia bɔ AWURADE ahã bɛ nwo dwirɛ ahyire Yisraelfoɛ kyɛ nnɛmaa bɛyɔ bɛ yɔleɛ ne bie ne, bɛ yeɛ Yisraelfoɛ lili bɛ si ɔ.

¹⁶ Bɛpole AWURADE bɛ Nyameɛ mmeraa dwirɛ amukoraa, na behurole nikyee bɛfa bɛyɔle nandwie mmaa amoen nyɔ bɛfale. Begyinane Asera dosii, na bɛsɔnene nyameɛso abɔdeɛ pembepembe amukoraati, na bɛsole Baal.

¹⁷ Bɛfale bɛ mma mmienzua ne bɛ mma mmrasua bɛbɔle afɔleɛ wɔ see nu. Bɛyele ngonyaa na bɛhɔle abisa. Na betuli bɛ nwo besiele berɛ bɛyɔle bɔ ɔte bɔne wɔ AWURADE nyunu ɔ bɛfa bewurale ye apue maa ɔfɛle yaa.

¹⁸ Yiti AWURADE fɛle Yisrael so yaa paa, na ɔfoane bɛ fili ye nyunu; mmusua kure nemɔ anu biala wanga, sana Yuda angome.

¹⁹ Yuda maen ne koso banni AWURADE bɛ Nyameɛ mmeraa dwirɛ so, na mmom amammerɛ bɔ Yisrael hyehyɛle ne, yeɛ belili so ɔ.

²⁰ AWURADE pole Yisrael boso ama amukoraa. Ɔhwene bɛ so fale bɛ wurale apaabɔlɛfoɛ mɔ sa, kɔpem kyɛ ɔfoane bɛ fili ye nyunu ɔ.

²¹ AWURADE pakyele Yisrael fili Dawide awuro ama nwo ne, Yisraelfoɛ fale Nebate awa Yeroboam belili bɛ so hene. Yeroboam hwehwene Yisraelfoɛ fili AWURADE sililɛ nwo, na ɔmaa bɛyɔle bɔne kandinga paa.

²² Yisraelfoɛ toale so bɛyɔle Yeroboam bɔne bɔ ɔyɔle ne amukoraati bie. Yisraelfoɛ bandwe bɛ nwo bamvi sɔ bɔne nemɔ anwo,

²³ kɔpem kyɛ AWURADE foane bɛ fili ye nyunu, kyɛbɔ ɔnate ye somvoɛ ngɔmhyɛlɛfoɛ amukoraa so ɔhyɛ tole berɛ ne. Yiti bɛsesale Yisraelfoɛ befili bɛ bɔbɔ b’aseɛ so bɛhɔle Asiria, na batena berɛ maa waadwu ɛnɛ.

Asiriafoɛ ma amanvrafoɛ batena Samaria

²⁴ Asiria hene fale mmenia fili Babilɔn, Kuta, Awa, Hamate ne Sefawim, na ɔmaa bɛɛtenatenane Samaria nguro nemɔ aso besili Yisraelfoɛ mɔ agya nu. Bɛfale Samaria bɛyɛle bɛ deɛ, na bɛtenane ye nguro nemɔ aso.

²⁵ Mmerɛ bɔ bɛɛtenane aseɛ ne aso ne, banzɔne AWURADE, yiti AWURADE somane gyata mɔ maa bɛwale bɛ nu beehuhuni bɛ nu biemɔ.

²⁶ Yeɛ bɛbɔle Asiria hene amaneɛ kyɛ, “Mmenia bɔ asoa bɛ afi maen maen mɔ so aagua Samaria nguro nemɔ aso ne, bɛnze aseɛ ne aso nyameɛ ne, ye mmeraa. Yiti wasoma gyata mɔ maa bawa bɛ so. Gyata nemɔ kũkũ bɛ, ofikyɛ bɛnze aseɛ ne aso nyameɛ ne, ye mmeraa.”

²⁷ Yeɛ Asiria hene hyɛle kyɛ, “Asɔfo nemɔ bɔ ɛmɔhyele bɛ bɛfale bɛ befili Samaria ne, ɛ́mɔma bɛ nu ko ɔhɔ dɔ ɔɔtena dɔ, ná ohyirehyire mmenia nemɔ aseɛ ne aso nyameɛ ne, ye mmeraa.”

²⁸ Yiti asɔfo nemɔ bɔ bɛhyele bɛ bɛfale bɛ befili Samaria ne, bɛ nu ko hɔle ɔɔtenane Betel, na ohyirehyirele bɛ kyɛbɔ besi bɛsɔne AWURADE ɔ.

²⁹ Nakoso maen maen ahoroɔ bɔ baatena berɛ ne, bɛ nu biala hɔle so bɛyɔle bɛ bɔbɔ bɛ nyameɛ mɔ. Begyinagyinane bɛ wɔ mmosoen sua nu wɔ asɔneyɛɛ bɔ Samariafoɛ nemɔ besisili nemɔ aso. Maen biala anu ama yɔle bɛ deɛ wɔ kuro bɔ bɛte so ne aso:

³⁰ Babilɔnfoɛ yɔle bɛ nyameɛ bɔ bɛfrɛ ye Sukote Benote; Kutefoɛ yɔle bɛ deɛ bɔ bɛfrɛ ye Negal Hamatefoɛ yɔle bɛ deɛ bɔ bɛfrɛ ye Asima;

³¹ Awifoɛ yɔle bɛ deɛ mɔ bɔ bɛfrɛ bɛ Nibase ne Tatake. Sefawimfoɛ yerale bɛ mma mɔ wɔ see nu bɛbɔle afɔleɛ bɛmane Sefawim nyameɛ mɔ bɔ bɛfrɛ bɛ Adramelɛke ne Anamelɛke.

³² Besa bɛsɔnene AWURADE, na bɛneaneane bɛ bɔbɔ bɛ nu bɛyele mmenia ahoroɔ maa bɛyɛle asɔfo wɔ asɔneyɛɛ nemɔ aso. Sɔ asɔfo nemɔ bobɔle afɔleɛ bɛmane bɛ wɔ bosoen sua nemɔ anu wɔ asɔneyɛɛ nemɔ aso.

³³ Bɛsɔnene AWURADE de, nakoso bɛsole bɛ bɔbɔ bɛ mmosoen mɔ kyɛbɔ maen maen bɔ bɛfale bɛ befili nu bɛwale nemɔ, bɛyɔ ne ala.

³⁴ Ɔbaadwu ɛnɛ ye, bɛtɛ yɔ b’amammerɛ daa nemɔ. Benzuro AWURADE. Afei Yakob bɔ AWURADE tole ye dumaa Yisrael ne, AWURADE ahyɛdeɛ ne ye nhyehyɛleɛ ne mmeraa ne mmeraa dwirɛ bɔ ɔfa mane ye bosofoɛ ne, sɔ maenmaensofoɛ nemɔ benni so.

³⁵ Né AWURADE ne Yakob boso ama nemɔ bayɛ apam, na ɔmane bɛ ahyɛdeɛ kyɛ, “Nnɛma ɛmɔsɔne nyameɛ foforɛ mɔ, nnɛma ɛmɔkoto bɛ, nnɛma ɛmɔso bɛ, yeɛ nnɛma ɛmɔbɔ afɔleɛ bɛma bɛ.

³⁶ Na mmom ɛ́mɔsɔne AWURADE, bɔ ole tumi piri ne tumi asaa yele ɛmɔ fili Misraim aseɛ so wale ne. Odi kyɛ ye yeɛ ɛmɔkoto ye ná ɛmɔbɔ afɔleɛ bɛma ye ɔ.

³⁷ AWURADE ahyɛdeɛ ne ye nhyehyɛleɛ ne mmeraa ne mmeraa dwirɛ bɔ ɔhyerɛ mane ɛmɔ ne, odi kyɛ ɛmɔnea bedi so daa. Nnɛma ɛmɔsɔne nyameɛ foforɛ mɔ.

³⁸ Nnɛma ɛmɔ wora fi apam bɔ mene ɛmɔ yɛle ne. Nnɛma ɛmɔsɔne nyameɛ foforɛ mɔ;

³⁹ na mmom odi kyɛ ɛmɔsɔne AWURADE ɛmɔ Nyameɛ, na okole ɛmɔ kofi ɛmɔ pɔfoɛ amukoraa bɛ sa nu.”

⁴⁰ Nakoso bandie, na mmom bɛhɔle so bɛyɔle kyɛbɔ bɛyɔ ye daa ne ala.

⁴¹ Yiti sɔ maen maen nemɔ sɔnene AWURADE de, nakoso besa bɛsole b’amoen mɔ bɔ base ɔ. Ɔbaadwu ɛnɛ ye, bɛ mma mɔ ne bɛ nnomaa mɔ, bɛtɛ yɔ kyɛbɔ bɛ nana mɔ yɔle ne ala.