2 Ahemvo 16 - AHYERƐLƐ KRONGRON

Ahase di Yuda so hene

¹ Remalia awa Peka lili hene ne, ye afoɛ bɔ ɔtɔ so buru ne nzoo ne anu, Ahase bɔ ye baba ole Yotam ne, olili Yuda so hene.

² Ahase lili hene ne, né wali afoɛ aburanyɔ, na olili hene afoɛ buru ne nzia wɔ Yerusalem. Wanyɔ bɔ ɔtengyɛ ɔ wɔ AWURADE ye Nyameɛ nyunu. Kyɛbɔ ye Nana Dawide yɔle bɔ ɔtengyɛ wɔ AWURADE nyunu ne, ye de wanyɔ sɔ bie.

³ Mmom ɔyɔle bɔ Yisrael ahemvo mɔ bɛyɔle ne bie. Maen maen bɔ AWURADE foane bɛ fili Yisraelfoɛ nyunu ne, musue nningyein bɔ né bɛyɔ ne, ye koso ɔyɔle bie. Ɔfale ɔwa bienzua po bɔle afɔleɛ wɔ see nu kyɛbɔ né maen maen nemɔ bɛyɔ ne ala.

⁴ Ɔbɔle afɔleɛ ɔyerale ɛyɛɛ wɔ asɔneyɛɛ nemɔ aso, wɔ mmokaa nemɔ aso, ɔne bakaa monɛ biala bo.

⁵ Na Siria hene Resin yeɛ Remalia awa Peka bɔ ɔte Yisrael hene ne, bɛfale koɛ bɛɛtetale Yerusalem. Bɛhane Ahase bepuane wɔ kuro ne anu, nakoso bangora banni ye so ngonim.

⁶ Sɔ mmerɛ ne, Siria hene Resin osa lele Elate ɔfa bokale Siria maen so. Otuli Yudafoɛ fili Elate na Siriafoɛ bɛɛtenane berɛ, na batena berɛ maa waadwu ɛnɛ.

⁷ Yeɛ Ahase tuli ɛbɔfoɛ mɔ maa bɛhɔle Asiria hene Tiglate Pilese berɛ kyɛ, “Nde w’akoaa ne ɛwa. Bra baale me fi Siria hene sa nu, ɔne Yisrael hene sa nu, ofikyɛ bafa koɛ baateta me.”

⁸ Afei Ahase sesale ɛdwetɛ ne esikaa kɔkorɛ bɔ ɔwɔ AWURADE awuro ne, ɔne bɔ ɔwɔ ahemvie fotoɛ nu ne, na ɔfa ɔɔhyɛle Asiria hene.

⁹ Asiria hene tiele Ahase dwirɛ ne, yiti Asiria hene fale koɛ ɔɔtetale Damasko, na olili so ngonim. Ɔhyele Damasko nu mmenia nnure fale bɛ hɔle Kire, na ohuni Resin.

¹⁰ Nana Ahase hɔle ooyiale Asiria hene Tiglate Pilese wɔ Damasko nen, onwuni afɔleɛ bokyea bɔ né ɔwɔ Damasko ne. Yiti Nana Ahase somane maa bɛfale afɔleɛ bokyea ne, ye piri ne ye tendenn nwo nhwɛsoɛ pɛpɛpɛpɛ bɛɛmane ɔsɔfo Yuria.

¹¹ Ɔsɔfo Yuria sili afɔleɛ bokyea ne. Kyɛbɔ Nana Ahase fa somane fili Damasko brɛle ye ne, osili ye sɛso koraka yeɛ Nana Ahase ofi Damasko ɔba ɔ.

¹² Nana Ahase fili Damasko wale ne, ɔɔneane afɔleɛ bokyea ne. Nana Ahase pingyele afɔleɛ bokyea ne, ɔfole ye simbini ne aso,

¹³ na ɔbɔle ye naen yeralɛ afɔleɛ, ye aburoo afɔleɛ, yeɛ ye anonneɛ afɔleɛ, na ɔtole ye asomdwee afɔleɛ nemɔ mogya petene afɔleɛ bokyea ne anwo.

¹⁴ Kɔɔbere afɔleɛ bokyea bɔ né ogyi AWURADE nyunu ne, Ahase ye fili AWURADE awuro ne anyunu. Ɔye fili ye afɔleɛ bokyea deɛ ne, ɔne AWURADE awuro ne b’afia, na ɔfa oosiele ye afɔleɛ bokyea deɛ ne ye sorɔ.

¹⁵ Afei Nana Ahase fale ahyɛdeɛ mane ɔsɔfo Yuria kyɛ, “Ngyerɛmɔ naen yeralɛ afɔleɛ ne, nɔsoa aburoo afɔleɛ ne, Yuda hene ye naen yeralɛ afɔleɛ ne ɔne ye aburoo afɔleɛ ne, yeɛ afei maen ne anu ama amukoraa bɛ naen yeralɛ afɔleɛ, b’aburoo afɔleɛ ne anonneɛ afɔleɛ bɔ ɔboka so ne, odi kyɛ ɛbɔ ye wɔ afɔleɛ bokyea piri ne aso. Odi kyɛ ɛto naen yeralɛ afɔleɛ mogya ne amukoraa, ɔne afɔleɛ mogya ne amukoraa pete afɔleɛ bokyea ne anwo. Nakoso kɔɔbere afɔleɛ bokyea ne de, so yeɛ ngɔhɔ ngoobisa Nyameɛ noa dwirɛ ɔ.”

¹⁶ Ɔsɔfo Yuria yɔle bɔ Nana Ahase hyɛle ye ne amukoraa.

¹⁷ Afei Nana Ahase tutuli nyinasoɛ nemɔ, ɔpagyale ayaa ne fili so, ɔyele nzim ne fili kɔɔbere nandwie bɔ owura ye bo ne aso, na ɔfa siele nyɔboɛ simbini bie aso.

¹⁸ Yeɛ atee bɔ bɛfa so wɔ ahemvie berɛ afofikyẽa ne, ɔne Yuda hene atee bɔ ɔfa so fite fi AWURADE asɔneyɛɛ sua ne anu ne, apata bɔ ɔkata bɛ so ne, Ahase tutuli, ofikyɛ né ɔpena kyɛ ɔsɔ Asiria hene nye.

¹⁹ Afei Ahase nwo dwirɛ ngaa ne, amba, bahyerɛ ye wɔ Yuda ahemvo nwo dwirɛ nwomaa ne anu.

²⁰ Ahase toale ye mbanyi mɔ. Besiele ye wɔ nekaa bɔ besiele ye mbanyi mɔ ɔ, wɔ Dawide kuro, na ɔwa bienzua Hesekia lili ye bia.