2 Ahemvo 15 - AHYERƐLƐ KRONGRON

Asaria di Yuda so hene

¹ Yisrael hene Yeroboam lili bia ne, ye afoɛ bɔ ɔtɔ so aburanyɔ ne nzoo ne anu, Yuda hene Asaria bɔ ye baba ole Amasia ne, olili hene.

² Asaria lili hene ne, né wali afoɛ buru ne nzia, na olili hene afoɛ aburannu ne nyɔ wɔ Yerusalem. Oni ole Yekolia bɔ ofi Yerusalem ne.

³ Na ɔyɔle bɔ ɔtengyɛ wɔ AWURADE nyunu ɔ, kyɛbɔ ɔse Amasia yɔle ne ala.

⁴ Nakoso asɔneyɛɛ nemɔ de wanzɛkye bɛ. Na maen ne hɔle so bɛbɔle afɔleɛ bɛyerale ɛyɛɛ wɔ asɔneyɛɛ nemɔ aso.

⁵ AWURADE hwene Nana Asaria so, maa kwata anwonyerɛ bɔle ye toonn kɔpem kyɛ owuli ɔ. Ɔnate anwonyerɛ ne ati, né ye ngome waatena awuro bie anu. Ɔwa bienzua Yotam yeɛ né ɔnea ahemvie berɛ ɔ, na ye yeɛ né ɔnea maen ne anu ama so ɔ.

⁶ Afei Asaria nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu.

⁷ Asaria toale ye mbanyi mɔ. Besiele ye wɔ nekaa bɔ besiele ye mbanyi mɔ ɔ wɔ Dawide kuro, na ɔwa bienzua Yotam lili ye bia.

Sakaria di Yisrael so hene

⁸ Yuda hene Asaria lili bia ne, ye afoɛ bɔ ɔtɔ so aburasa ne mmɔtwɛ ne anu, Yeroboam awa Sakaria lili Yisrael so hene wɔ Samaria. Olili hene bosome nzia.

⁹ Ɔyɔle bɔ ɔte bɔne wɔ AWURADE nyunu ɔ, kyɛbɔ ye nana mɔ yɔle ne ala. Nebate awa Yeroboam ye bɔne bɔ ɔyɔle, bɔ ɔhwehwene Yisrael hɔle nu ne, Sakaria wandwe ye nwo wamvi ye nwo.

¹⁰ Yeɛ Yabese awa Salum bɔle ye nwo porɛ opurale ye huni ye wɔ badwa nu, na ɔfale ye bia ne lili.

¹¹ Na Sakaria nwo dwirɛ ngaa ne, amba, bahyerɛ ye wɔ Yisrael ahemvo nwo dwirɛ nwomaa ne anu.

¹² Bɔhyɛ bɔ AWURADE hyɛle Yehu ole kyɛ, “Wɔ mma mmienzua mɔ koli Yisrael bia maa okoodwu aworɛ ndoatoasoɛ nna so.” Na ɔwale nu sɔ ala.

Salum di Yisrael so hene

¹³ Yuda hene Yusia lili bia ne, ye afoɛ bɔ ɔtɔ so aburasa ne ngona ne anu, Yabese awa Salum lili Yisrael so hene wɔ Samaria. Olili hene bosome ko.

¹⁴ Na Gadi awa Menahem fili Tisa hɔle Samaria. Opurale Yabese awa Salum huni ye wɔ Samaria, na ɔfale ye bia lili.

¹⁵ Na Salum nwo dwirɛ ngaa ne, ɔne porɛ bɔ ɔbɔle ne, amba, bahyerɛ ye wɔ Yisrael ahemvo bɛ nwo dwirɛ nwomaa ne anu.

¹⁶ Sɔ mmerɛ ne, Menahem sɛkyele Tifesa. Ohuhuni nu mmenia amukoraa, ɔne mmenia bɔ bɛwɔ ye mbɔtam fite Tisa bɔ ɔkɔ ɔ. Ɔnate kyɛ bammukye kuro berɛ pambim bamma ye ne ati, ohuhuni nu mmenia. Ɔpakyepakyele kuro ne anu pemvoɛ amukoraa bɛ kunu.

Menahem di Yisrael so hene

¹⁷ Yuda hene Asaria lili bia ne, ye afoɛ bɔ ɔtɔ so aburasa ne ngona ne anu, Gadi awa Menahem lili Yisrael so hene. Olili hene afoɛ buru wɔ Samaria.

¹⁸ Ɔyɔle bɔ ɔte bɔne wɔ AWURADE nyunu ɔ. Nebate awa Yeroboam bɔne bɔ ɔyɔle, bɔ ɔhwehwene Yisrael hɔle nu ne, Mehanem wandwe ye nwo wamvi ye nwo, mmerɛ bɔ né ɔte ngoa nu amukoraa.

¹⁹ Asiria hene Pulu fale koɛ ɔɔtetale Yisrael maen ne, na Menahem mane Pulu ɛdwetɛ talɛnde apee ko, kyɛ ɔma ɔhɔ so ɔtena bia ne aso.

²⁰ Menahem pɛle toɔ fa didele sɔ sikaa ne fili Yisrael sikafoɛ ne amukoraa bɛ berɛ. Olele ɛdwetɛ sekel aburannu fili bɛ nu biala berɛ fa mane Asiria hene. Yiti Asiria hene sale ye si fili maen ne anu sa hɔle ye maen nu.

²¹ Afei Menahem nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yisrael ahemvo nwo dwirɛ nwomaa ne anu.

²² Menahem toale ye mbanyi mɔ, na ɔwa bienzua Pekahia lili ye bia.

Pekahia di Yisrael so hene

²³ Yuda hene Asaria lili hene ne, ye afoɛ bɔ ɔtɔ so aburannu ne anu, Menahem awa Pekahia lili Yisrael so hene wɔ Samaria. Olili hene afoɛ nyɔ.

²⁴ Ɔyɔle bɔ ɔte bɔne wɔ AWURADE nyunu ɔ. Nebate awa Yeroboam ye bɔne bɔ ɔyɔle, bɔ ɔhwehwene Yisrael hɔle nu ne, Pekahia wandwe ye nwo wamvi ye nwo.

²⁵ Nakoso Remalia awa Peka, bɔ né ɔte Pekahia ye safohene ne, ɔne Gileadefoɛ aburannu bɛbɔle ye nwo porɛ. Bɛhɔle ye so wɔ Samaria ahemvie abandenden ne anu beehuni ye ne Agɔbo ne Ariye. Na Peka fale Pekahia bia ne lili.

²⁶ Afei Pekahia nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yisrael ahemvo nwo dwirɛ nwomaa ne anu.

Peka di Yisrael so hene

²⁷ Yuda hene Asaria lili bia ne, ye afoɛ bɔ ɔtɔ so aburannu ne nyɔ ne anu, Remalia awa Peka lili Yisrael so hene wɔ Samaria. Olili hene afoɛ aburanyɔ.

²⁸ Ɔyɔle bɔ ɔte bɔne wɔ AWURADE nyunu ɔ. Nebate awa Yeroboam ye bɔne bɔ ɔyɔle, bɔ ɔhwehwene Yisrael hɔle nu ne, Peka wandwe ye nwo wamvi ye nwo.

²⁹ Yisrael hene Peka aberɛ so, Asiria hene Tiglate Pilese ɔɔho fale Yisrael nguro hemɔ: Yiyon, Abel Bete Maaka, Yanoa, Kedese, Hasɔ, Gileade, Galilea, ɔne Nafetali aseɛ amukoraa; na ɔhyele mmenia nemɔ nnure fale bɛ hɔle Asiria.

³⁰ Na Yusia awa Yotam lili hene ne, ye afoɛ bɔ ɔtɔ so aburanyɔ ne anu, Ela awa Hosea bɔle Remalia awa Peka nwo porɛ. Opurale ye huni ye, na ɔfale ye bia lili.

³¹ Afei Peka nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yisrael ahemvo nwo dwirɛ nwomaa ne anu.

Yotam di Yuda so hene

³² Remalia awa Peka lili Yisrael so hene ne, ye afoɛ bɔ ɔtɔ so nyɔ ne anu, Yotam bɔ ye baba ole Yusia ne, olili Yuda so hene.

³³ Yotam lili hene ne, né wali afoɛ aburanyɔ ne nnu, na olili hene afoɛ buru ne nzia wɔ Yerusalem. Oni ole Sadoke awa Yerusa.

³⁴ Ɔyɔle bɔ ɔtengyɛ wɔ AWURADE nyunu ɔ, kyɛbɔ ɔse Yusia yɔle ne ala.

³⁵ Nakoso asɔneyɛɛ nemɔ de wanzɛkye bɛ, na maen ne hɔle so bɛbɔle afɔleɛ bɛyerale ɛyɛɛ wɔ asɔneyɛɛ nemɔ aso. Pambim bɔ ɔwɔ AWURADE awuro ne sorɔ dɔ ne, osili.

³⁶ Afei Yotam nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu.

³⁷ Sɔ mmerɛ ne anu, AWURADE hyɛle ye bo somane Siria hene Resin, yeɛ Remalia awa Peka maa bɛfale koɛ bɛɛtetale Yuda.

³⁸ Yotam toale ye mbanyi mɔ. Besiele ye wɔ nekaa bɔ besiele ye mbanyi mɔ ɔ, wɔ ye Nana Dawide kuro. Na ɔwa bienzua Ahase lili ye bia.