2 Ahemvo 14 - AHYERƐLƐ KRONGRON

Amasia di Yuda so hene

¹ Yisrael hene Yoahase ɔwa bienzua Nana Yoase lili Yisrael hene ne, ye afoɛ bɔ ɔtɔ so nyɔ ne anu, Yuda hene Yoase ɔwa bienzua Amasia lili Yuda so hene.

² Amasia lili hene ne, né wali afoɛ aburanyɔ ne nnu, na olili hene afoɛ aburanyɔ ne ngona wɔ Yerusalem. Oni ole Yehoadan bɔ ofi Yerusalem ne.

³ Amasia yɔle bɔ ɔtengyɛ wɔ AWURADE nyunu ɔ; nakoso wandwu ye nana Dawide. Bɔ ɔyɔle amukoraati te kyɛ bɔ ɔse Yoase yɔle ne pɛpɛɛpɛ.

⁴ Nakoso asɔneyɛɛ nemɔ de wanzɛkye bɛ. Na maen ne hɔle so bɛbɔle afɔleɛ bɛyerale ɛyɛɛ wɔ asɔneyɛɛ nemɔ aso.

⁵ Ahennie tumi ne oolili ye sa pɛ, ye mbanyi mɔ bɔ behuni ye baba bɔ né ɔte ɛhene ne, ohuhuni bɛ.

⁶ Nakoso sɔ kodiawufoɛ nemɔ, bɛ mma nemɔ de, wangukũ bɛ, kyɛbɔ amba, bahyerɛ ye wɔ Mose mmeraa nwomaa ne anu ne. Nu yeɛ AWURADE ahyɛ kyɛ, “Nnɛmaa begyina mmaa mɔ bɛ bɔne so beku awofoɛ, yeɛ nnɛmaa begyina awofoɛ bɛ bɔne so beku mmaa; na mmom ebiala ye bɔne so yeɛ ɔsɛ kyɛ begyina beku ye ɔ.”

⁷ Amasia huhuni Edomfoɛ apee buru wɔ Ngyee Bɔnza ne anu, na olili Sela so ngonim wɔ koɛ nu. Ɔtole berɛ dumaa Yokete Ɛl, na bafa sɔ dumaa ne bafrɛ kuro ne maadwu ɛnɛ.

⁸ Amasia tuli ɛbɔfoɛ maa bɛhɔle Yisrael hene Yehu awa Yehoahase ɔwa Nana Yehoase berɛ kyɛ, “Bra maa yɛfa yɛbɔ so!”

⁹ Yeɛ Yisrael hene Yehoase koso tole ngraa ɔɔmane Yuda hene Amasia kyɛ, “Lebanon ɛfone bie somane maa beesele Lebanon sida bie kyɛ, ‘Fa ɛwa brasua ma mma bienzua ogya yeɛ’ nakoso Lebanon kaka aboyaa bie ɔɔpɛle nu berɛ otiatiale ɛfone ne aso.

¹⁰ Ali Edom so ngonim amba ama wɔ ti anu ayɛ wɔ fɛ. Ma wɔ nye sɔ animnyam bɔ anya ye ne, ná tena wɔ maen nu. Nzu ati yeɛ ɛtwetwe edwirɛ ba maa ɛne Yuda ɛmɔdi ngoguo ye?”

¹¹ Nakoso Amasia andɛ ye so. Yiti Yisrael hene Yehoase hɔle ɔne Yuda hene Amasia bɛɛfale koɛ bɛtetale so wɔ Yuda kuro Bete Semese.

¹² Yisrael lili Yuda so ngonim, na Yuda koɛhonɛfoɛ nemɔ amukoraa bɛnwati bɛhɔle b’awuro.

¹³ Yuda hene Amasia bɔ ye baba ole Yehoase bɔ ye koso ye baba ole Ahasia ne, Yisrael hene Yehoase hyele ye nnure wɔ Bete Semese. Yisrael hene Yehoase hɔle Yerusalem, na obubuli Yerusalem fasue ne guale ase, fi Efraim Pambim ne kɔka Ndweasoɛ Pambim ne. Efi Efraim pambim ɛkɔ Ndweasoɛ pambim a, ye tendenn te agyirɛ ɛyaa nna.

¹⁴ Yisrael hene Yehoase sesale nningyein hemɔ amukoraa hɔle: esikaa kɔkorɛ amukoraa, ɛdwetɛ amukoraa, ɔne ngukue amukoraa bɔ ɔwɔ AWURADE awuro ɔne Nana Amasia ahemvie berɛ ɔ, yeɛ mmenia bɔ bahye bɛ nnure ne amukoraa, na ɔfa bɛ hɔle Samaria.

¹⁵ Afei Yehoase nwo dwirɛ ngaa ne, ye koɛ nu anwoserɛ, ɔne kyɛbɔ osi ɔne Yuda hene Amasia bɛhone, amba, bahyerɛ ye wɔ Yisrael ahemvo nwo dwirɛ nwomaa ne anu.

¹⁶ Yehoase toale ye mbanyi mɔ. Besiele ye wɔ Samaria wɔ Yisrael ahemvo asieleɛ so. Na ɔwa bienzua Yeroboam lili ye bia.

¹⁷ Yisrael hene Nana Yehoase bɔ ye baba ole Yehoahase ne, owuli ne asi ne, Yuda hene Amasia bɔ ye baba ole Yoase ne, ɔtenane ngoa nu afoɛ buru ne nnu.

¹⁸ Afei Amasia nwo dwirɛ ngaa ne, amba, bahyerɛ ye wɔ Yuda ahemvo mɔ nwo dwirɛ nwomaa ne anu.

¹⁹ Mmenia biemɔ bɔle ye nwo porɛ wɔ Yerusalem, na ɔnwati hɔle Lakise. Nakoso bɛsomane maa bɛpole ye so wɔ Lakise beehuni ye wɔ dɔ.

²⁰ Bɛfale ye fuin bɛtole pɔngɔ so besa bɛwale Yerusalem bɔ ɔte Dawide kuro ne, na beesiele ye wɔ ye mbanyi mɔ b’asieleɛ so wɔ berɛ.

²¹ Afei Amasia awa Asaria bɔ né wali afoɛ buru ne nzia ne, Yudafoɛ amukoraa bɛfale ye belili hene maa olili ye baba bia.

²² Amasia toale ye mbanyi mɔ ne asi ne, Asaria sa kyekyele Elate, na osa fa bokale Yuda maen ne aso.

Yisrael hene Yeroboam

²³ Yuda hene Amasia, bɔ ye baba ole Yoase ne, olili hene ne, ye afoɛ bɔ ɔtɔ so buru ne nnu ne anu, Yisrael hene Yeroboam bɔ ye baba ole Yoase ne, olili hene wɔ Samaria. Olili hene afoɛ aburanna ne ko.

²⁴ Ɔyɔle bɔ ɔte bɔne wɔ AWURADE nyunu ɔ. Nebate awa Yeroboam bɔne amukoraa bɔ ɔyɔle, bɔ ɔhwehwene Yisrael hɔle nu ne, Yeroboam wandwe ye nwo wamvi ye nwo.

²⁵ Ɔhone koɛ osa lele Yisrael aseɛ bɔ ye wɛen fi Lebo Hamate kɔpem Araba Ɛpo ne, kyɛbɔ AWURADE Yisrael Nyameɛ dwirɛ bɔ ɔnate ye somvoɛ ngɔmhyɛlɛniɛ Yona so hane ne, ɔte ne ala. Yona fi Gate Hefa, na ye baba ole Amitae.

²⁶ AWURADE nwuni kyɛ amaneɛ bɔ Yisrael wɔ nu ne ɔte piri. Né sona biala nne berɛ, kyɛ kanga oo anaakyɛ dehyeɛ oo, bɔ ɔkɔhora kɔpepɛ kole Yisrael ɔ.

²⁷ Nakoso né AWURADE ɔhhane kyɛ okonua Yisrael dumaa bo kofi wiase, yiti ɔfale Yoase awa Yeroboam so ɔpepɛ lele bɛ.

²⁸ Afei Yeroboam nwo dwirɛ ngaa ne, ɔne bɔ ɔyɔle amukoraa, ɔne ye koɛ nu anwoserɛ, kyɛbɔ ɔho lele Yuda nguro Damasko ne Hamate ɔɔbokale Yisrael so ne, amba, bahyerɛ ye wɔ Yisrael ahemvo bɛ nwo dwirɛ nwomaa ne anu.

²⁹ Yeroboam toale ye mbanyi Yisrael ahemvo mɔ, na ɔwa bienzua Sakaria lili ye bia.