2 Ahemvo 12 - AHYERƐLƐ KRONGRON

Yoase yɛ Nyameɛ asɔneyɛɛ sua ne yé

¹ Yehu lili hene ne, ye afoɛ nzoo ne anu, Yehoase lili hene. Yehoase lili hene afoɛ aburanna wɔ Yerusalem. Oni ole Sibia bɔ ofi Beɛ Hyeba ne.

² Yehoase yɔle bɔ ɔtengyɛ wɔ AWURADE nyunu ɔ mmerɛ bɔ olili bia ne amukoraa, ofikyɛ né ɔsɔfo Yehoada tu ye foɛ.

³ Nakoso asɔneyɛɛ nemɔ de wanzɛkye bɛ. Maen ne hɔle so bɛbɔle afɔleɛ bɛyerale ɛyɛɛ wɔ asɔneyɛɛ nemɔ aso.

⁴ Na Yehoase sele asɔfo nemɔ kyɛ, “Esikaa amukoraa bɔ ɔte akyɛdeɛ krongron bɔ mmenia fa ba AWURADE awuro, bɔ yeɛ ɔte esikaa bɔ bapɛ bama ebiala kyɛ otua ne, ɔne esikaa bɔ ofi akyɛdeɛ afɔleɛ bɔ bɛfa bɛba AWURADE awuro ne anu ne,

⁵ odi kyɛ asɔfo nemɔ bede befi bɛ bɔ bɛbɔ afɔleɛ nemɔ berɛ. Na AWURADE awuro ne, ye nekaa biala bɔ odi kyɛ bɛyɔ ye yé ne, bɛ́fa bɛ́yɔ ye yé.”

⁶ Nakoso Yehoase lili hene ne, ye afoɛ aburanyɔ ne nza ne anu, né asɔfo nemɔ bennya bɛyyɔle awuro ne nekaa biala yé.

⁷ Yiti Nana Yehoase tole ye sa frɛle ɔsɔfo Yehoada ne asɔfo ngaa nemɔ, na obisale bɛ kyɛ, “Nzu ati yeɛ ɛmɔnyɔ awuro ne yé ɔ? Ofi ɛnɛ bɔ ɔkɔ ɔ, esikaa bɔ ɛmɔdide befi bɛ bɔ bɛbɔ afɔleɛ nemɔ berɛ ne, nnɛmaa ɛmɔfa besie ko, na mmom ɛ́mɔfa esikaa ne bɛma yɛyɔ awuro ne yé.”

⁸ Yiti asɔfo nemɔ bele bɛtole nu kyɛ bengole esikaa ne bengofi bɛ bɔ bɛbɔ afɔleɛ ne berɛ ko, yeɛ afei bɛkɔmaa mmenia foforɛ kɔyɔ awuro ne nwo adwuma ne.

⁹ Yeɛ ɔsɔfo Yehoada fale alaka, otofili bɔen wɔ ye ngatasoɛ ne anu, na ɔfa siele afɔleɛ bokyea ne anwo. Sɛ ɛkwaawura AWURADE awuro ne anu a, ɔwɔ wɔ sa famaa so. Asɔfo mɔ bɔ bɛwɛne anoa ne, bɛfale esikaa bɔ mmenia fa wale AWURADE awuro ne amukoraa beguale alaka ne anu.

¹⁰ Mmerɛ biala, sɛ benwu kyɛ esikaa bɔ bafa bagua alaka ne anu ne wasone a, Nana ye ahyerɛlɛniɛ ne, ɔne ɔsɔfo panyi ne, bɛkɔye bɛka, na bɛbɔ ye borɛ mmɔtɔ nu.

¹¹ Bɛfa esikaa bɔ baha ne bɛma adwumayɔlɛfoɛ bɔ AWURADE awuro ne anwo adwuma wura bɛ sa ne. Na sɔ mmenia nemɔ fa esikaa ne betuatua ɛhemɔ kerɛ: bakaa dwumvoɛ mɔ ne suasilɛfoɛ bɔ bɛyɔ AWURADE awuro ne anwo adwuma ne,

¹² bɛ bɔ bɛto sua ne, ɔne bɛ bɔ bedwa nyɔboɛ ne. Afei koso bɛfale bie bɛtɔle ndaboa ne nyɔboɛ bɔ base ɔ bɔ bɛfa bɛyɔle AWURADE awuro ne anwo adwuma ɔ, ɔne kerɛ biala bɔ odi kyɛ bɛbɔ ye wɔ awuro ne anwo ɔ.

¹³ Nakoso AWURADE awuro ne anu ayaa bɔ bafa ɛdwetɛ bayɔ ɔ nemɔ, akapɛ bɔ bɛfa bɛtengyɛtengyɛ kanea nyamaa nemɔ, turonzemaa nemɔ, totorobɛndo nemɔ anaa nikyee biala bɔ bafa esikaa kɔkorɛ anaa ɛdwetɛ bayɔ ɔ de, bamva esikaa bɔ bɛfa bɛwale AWURADE awuro ne bie bandɔ,

¹⁴ ofikyɛ sɔ esikaa ne de, bɛfa bɛmane adwumayɔlɛfoɛ bɔ né bɛyɔ AWURADE awuro ne anwo adwuma ne.

¹⁵ Nakoso mmenia bɔ bɛfale esikaa ne bewurale bɛ sa kyɛ bɛfa betuatua adwumayɔlɛfoɛ ne kerɛ ne, bamma bammu ye nwo ngondaa, ofikyɛ né bedi nahorɛ.

¹⁶ Foɛlilɛ afɔleɛ, ɔne bɔne nwo afɔleɛ esikaa ne de, bamva bangɔ AWURADE awuro berɛ bie; né ɔte asɔfo nemɔ deɛ.

Hasael fa koɛ kɔtoa Yerusalem

¹⁷ Sɔ mmerɛ ne anu, Siria hene Hasael ɔfale koɛ ɔɔtoale Gate, na olili so ngonim. Nakoso Hasael fale ye nye hyirele Yerusalem ɔfale koɛ ɔɔtoale ye ne,

¹⁸ Yuda hene Yehoase sesale sɔ nningyein hemɔ ɔɔmane Siria hene Hasael: anohoba afɔleɛ nningyein amukoraa bɔ Yehoase ye mbanyi mɔ Yehosafate, Yehoram ne Ahasia bɔ bɛte Yuda ahemvo ne, batu basie berɛ bama AWURADE ne, ɔne ye bɔbɔ ye anohoba afɔleɛ nningyein nemɔ, yeɛ esikaa kɔkorɛ amukoraa bɔ né ɔwɔ AWURADE awuro nekaa bɔ besie nningyein ne, ɔne esikaa kɔkorɛ bɔ ɔwɔ ahemvie berɛ ne. Yiti Hasael yakyili koɛ bɔ ɔkwaafa toa Yerusalem ne.

Yoase wue

¹⁹ Afei Yoase nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu.

²⁰ Yoase mbanyi mɔ yɛle lɔen, bɛbɔle ye nwo porɛ, na behuni ye wɔ sua bɔ bɛfrɛ ye Milo bɔ ɔwɔ Sila atee so ne anu.

²¹ Simeate awa Yosaka ɔne Somere awa Yehosabade bɔ bɛte ye mbanyi mɔ ne yeɛ behuni ye ɔ. Besiele ye wɔ nekaa bɔ besiele ye mbanyi mɔ ɔ, wɔ Dawide kuro, na ɔwa bienzua Amasia lili ye bia.