2 Aberɛso Dwirɛ 6 - AHYERƐLƐ KRONGRON

Solomon bɔ mbaeɛ

¹ Afei Solomon bɔle mbaeɛ kyɛ, “AWURADE, ahã kyɛ ɛkɔtena awosii kabii nu.

² Masi sua nyemene paa mama wɔ. Ɔte nekaa bɔ ɛkɔtena afebɔɔ ɔ.”

³ Né Yisrael maen ne amukoraa begyigyi berɛ, na Nana Solomon pɛnene ye nye hyirele bɛ dɔ yirale bɛ mukoraa.

⁴ Ɔhane kyɛ, “Animnyam hã AWURADE Yisrael Nyameɛ bɔ ɔnate ye tumi so, nikyee bɔ ɔtele ye noa hyɛle me baba Dawide bɔ ne, wamaa wawa nu ɔ. Ɔnwa:

⁵ ‘Ofi kyẽa bɔ nyele me maen mvili Misraim aseɛ so mmale ɔ, nnneane Yisrael mmusua kure ne biala anu nnyele kuro bɔ ngosi sua ngosie so ngɔma me dumaa kɔla so ɔ. Yeɛ manneanea nu manye sona biala kyɛ oli me maen Yisrael so.

⁶ Nakoso nneane nu nyele Yerusalem kyɛ mefa me dumaa meto so, yeɛ nneane nu nyele Dawide kyɛ oli me maen Yisrael so.’

⁷ Me baba Dawide yɛle ye adwene kyɛ okosi sua kɔfa AWURADE Yisrael Nyameɛ dumaa kɔto so.

⁸ Nakoso AWURADE sele me baba Dawide kyɛ, ‘Ayɛ nikyee kyɛ adwene ye nwo kyɛ ekosi sua kɔfa me dumaa kɔto so ɔ.

⁹ Nakoso nna wɔ yeɛ ekosi sua ne ɔ, na mmom ɛwa bienzua bɔ ɛkɔwo ye yeɛ okosi sua ne kɔfa me dumaa kɔto so ɔ.’

¹⁰ Afei AWURADE ama ye dwirɛ bɔ ɔhane ne wawa nu; ofikyɛ mali me baba Dawide bia, na matena Yisrael ahennie bia so, kyɛbɔ AWURADE hyɛle bɔ ne. Na masi sua ne mafa AWURADE Yisrael Nyameɛ dumaa mato so.

¹¹ AWURADE apam bɔ ɔne Yisrael maen bɛyɛle ne, alaka bɔ apam ne wɔ nu ne, mapena nekaa wɔ sua ne anu mafa masie.”

Solomon tu sua ne wura AWURADE sa

¹² Afei Solomon gyinane AWURADE afɔleɛ bokyea ne anyunu, wɔ Yisrael maen ne amukoraati bɛ nyunu, na ɔtrɛle ye sa nu.

¹³ Né Solomon ayɔ kɔɔbere simbini wasie awuro n’aluo berɛ. Ye tendenn nu te agyirɛ nnu, ye tɛtrɛtɛɛ nu te agyirɛ nnu, na ofi ye aseɛnwo bɔ ɔkwaadwu ye anwuro ne, ɔte agyirɛ nza. Ogyinane so, obuli ndwerɛ wɔ so wɔ Yisrael maen ne amukoraa bɛ nyunu, na ɔtrɛtrɛle ye sa nu hyirele nyameɛso.

¹⁴ Ɔhane kyɛ, “Ao, AWURADE Yisrael Nyameɛ, nyameɛso anaakyɛ aseɛ ye aso, Nyameɛ biala nne berɛ bɔ ɔte kyɛ wɔ ɔ, bɔ odi apam so ná okyire ɔdɔ bɔ onni ngasi kyire ye ngoaa bɔ bɛye bɛ kunu fitaa bedi ye dwirɛ so ɔ.

¹⁵ Ama ɛbɔ bɔ ɛhyɛle wɔ somvoɛ me baba Dawide ne wawa nu. Nahorɛ nu, ɛtele wɔ noa ɛhyɛle ye bɔ, na ɛnɛ ɛnate wɔ bɔbɔ wɔ tumi so amaa wawa nu.

¹⁶ Yiti ao, AWURADE Yisrael Nyameɛ, ma ɛbɔ bɔ ɛhyɛle wɔ somvoɛ me baba Dawide ne, ɔhɔ so ɔtena berɛ. Ɛhane kyɛ, ‘Sɛ wɔ boso ama bɛye bɛ kunu bedi me dwirɛ so kyɛbɔ ayɔ ne ala a, ye de wɔ bosoniɛ bɔ ɔkɔtena Yisrael bia so wɔ me nyunu ne, ɔngɔbɔ wɔ le.’

¹⁷ Ao AWURADE Yisrael Nyameɛ, ma wɔ bɔhyɛlɛ bɔ ɛhyɛle wɔ somvoɛ Dawide ne, ɔbra nu.

¹⁸ “Nakoso Nyameɛ, aso ɛne mmenia bɛkɔtena aseɛ ye aso amba? Eh, nyameɛso ne nyameɛso anwuro anwuro po, ɔte kãa ma wɔ, nna wayɛ kyɛ sua he bɔ masi ye!

¹⁹ Ao AWURADE me Nyameɛ, fa wɔ nye to w’akoaa mbaeɛ ne ye dwirɛ bɔ ɔfa to wɔ nyunu ye. Tie w’akoaa ye sufrɛ ne ye mbaeɛ bɔ ɔbɔ kyire wɔ ye;

²⁰ amaa sɛ eyia oo, kɔngɔen oo, sua ye bɔ ɔte nekaa bɔ ahyɛ bɔ kyɛ ɛkɔfa wɔ dumaa kɔto so ye, wɔ nye ali ye si; amaa ɔnate so, atie mbaeɛ bɔ w’akoaa kɔfa ye nye kohyire ɛwa kɔbɔ ɔ.

²¹ Sɛ w’akoaa ne wɔ maen Yisrael bɛfa bɛ nye bekyire sua ye bɛbɔ mbaeɛ a, tie bɛ sufrɛ wɔ nyameɛso, nekaa bɔ ɛte ne, ná fa bɛ bɔne kyɛ bɛ.

²² “Sɛ ebie yɔ obiɛngo bɔne, ná sɛ odi kyɛ bɛmaa ɔta ndaen a, sɛ ɔba w’afɔleɛ bokyea ne anyunu wɔ sua ye anu ɔbata ndaen a,

²³ ye de tie ye wɔ nyameɛso dɔ, ná di edwirɛ ne. Bua wɔ ngoaa mɔ ndɛen. Bua bɔ wayɔ mvomsoɛ ne foɛ, ná ma ye musue ɔbɔ ye bɔbɔ ye ti so. Nakoso bɔ ɔtengyɛ ne, ɔnate kyɛ ye ndɛen yɛ fɛ ne ati, bua ye be.

²⁴ “Sɛ wɔ maen Yisrael bɛyɔ bɔne betia wɔ, ná ye sɔ ti bɛ pɔfoɛ mɔ di bɛ so ngonim, nakoso besa benu bɛ nwo, bɛye wɔ dumaa ayɛ, ná bɛbɔ mbaeɛ besu bɛfrɛ wɔ wɔ sua ye anu a,

²⁵ ye de tie bɛ wɔ nyameɛso, fa wɔ maen Yisrael bɛ bɔne kyɛ bɛ, ná aseɛ bɔ ɛfa mane bɛ ne bɛ nana mɔ ne, sa fa bɛ bra so.

²⁶ “Sɛ ɔnate bɔne bɔ wɔ mmenia bayɔ batia wɔ ti, esi esue ate wɔ nyameɛso maa esue ɔndɔ, ná bɛfa bɛ nye bekyire ɛwa bɛbɔ mbaeɛ bɛye wɔ dumaa ayɛ, ná ɔnate kyɛ ahwe bɛ so ne ati, bɛsakyera b’adwene béfi bɛ bɔne nwo a,

²⁷ ye de tie bɛ wɔ nyameɛso, ná fa wɔ ngoaa bɔ bɛ ole wɔ maen Yisrael ne bɛ bɔne kyɛ bɛ, wɔ aberɛ bɔ ekyire bɛ atee paa bɔ odi kyɛ bɛfa so ɔ. Ma esue tɔ wɔ w’aseɛ bɔ afa ama wɔ maen maa wayɛ b’agyapadeɛ ne aso.

²⁸ “Sɛ ɛhɔen piri, anaa ɛhawo piri, anaa fieso nningyein kesenɛ, anaa asukuo, anaa mmɛbɛ, anaa nduro ba maen ye anu; sɛ bɛ pɔfoɛ mɔ kã bɛ mia wɔ bɛ nguro ne biala so, sɛ ɛhawo piri anaa anwonyerɛ biala ba bɛ so,

²⁹ angorangora biala, anaa wɔ maen Yisrael amukoraa, sɛ b’amaneɛ ne b’aworabɔlɛ ma bɛ nye ba bɛ nwo so, maa ɔnate so bɛtengyɛ bɛ sa bɛfa bekyire sua ye a, kyɛ bɛ sufrɛ biala oo, kyɛ bɛ mbaeɛ biala oo,

³⁰ ye de tie bɛ sufrɛ wɔ nyameɛso, nekaa bɔ ɛte ne, ná fa bɛ bɔne kyɛ bɛ. Wɔ ngome yeɛ ɛse sona biala ye ti anu dwirɛ ɔ. Yɔ ma ebiala kyɛbɔ ɔfata ye ɔ, ofikyɛ ɛse kuro sona biala ti anu dwirɛ,

³¹ amaa ɔnate so ngyẽa amukoraa bɔ bekoli ye aseɛ bɔ ɛfa mane yɛ nana mɔ ne aso ne, basuro wɔ, ná bali wɔ dwirɛ so.

³² “Sɔ ala yeɛ amanvrafoɛ bɔ nna wɔ maen Yisraelfoɛ ahɔ ɔ, sɛ ɔnate wɔ dumaa kandinga ne, wɔ tumi piri ne, ɔne wɔ tumi asaa ne ati, befi maen bie aso dedeede bɛba, ná bɛfa bɛ nye bekyire sua ye bɛbɔ mbaeɛ a,

³³ ye de tie bɛ mbaeɛ wɔ nyameɛso, nekaa bɔ ɛte ne, na yɔ bɔ amanvrafoɛ nemɔ bɛkɔfa bɛkɔto wɔ nyunu amukoraati ma bɛ, amaa aseɛ ye aso mmenia amukoraa bate wɔ dumaa ne nga ná basuro wɔ, kyɛbɔ wɔ maen Yisrael besuro wɔ ne. Ɔnate ɛhe aso, bekonwu kyɛ wɔ dumaa yeɛ ɔla sua bɔ masi ye aso ɔ.

³⁴ “Sɛ wɔ maen bɛfa koɛ bɛkɔtoa bɛ pɔfoɛ mɔ wɔ nekaa biala bɔ ɛkɔsoma bɛ kyɛ bɛhɔ koɛ, ná bɛfa bɛ nye bekyire kuro he bɔ aye asie berɛ ama wɔ nwo, ɔne sua bɔ masi mafa wɔ dumaa mato so ne, ná bɛbɔ mbaeɛ bekyire wɔ a,

³⁵ ye de tie bɛ mbaeɛ ne bɛ sufrɛ wɔ nyameɛso, ná ko bɛ koɛ ma bɛ.

³⁶ “Sɛ bɛyɔ bɔne betia wɔ (ofikyɛ sona biala nne berɛ bɔ ɔnyɔ bɔne ɔ), ná ɛfɛ bɛ so yaa ɛfa bɛ wura bɛ pɔfoɛ mɔ sa maa bɛkye bɛ nnure bɛkɔ aseɛ bie aso, kyɛ ɔwɔ dede, anaakyɛ opingye wa,

³⁷ nakoso sɛ bɛ nye ba bɛ nwo so wɔ aseɛ bɔ bahye bɛ nnure bahɔ so ne aso, benu bɛ nwo, ná besu bɛfrɛ wɔ wɔ maen bɔ bahye bɛ nnure bahɔ so ne aso kyɛ, ‘Yayɔ bɔne, yayɔ mvomsoɛ; yayɔ amumuyɛɛ’;

³⁸ sɛ befi b’ahone ne bɛ kra amukoraati nu benu bɛ nwo wɔ maen bɔ bahye bɛ nnure bahɔ so ne aso, ná bɛfa bɛ nye bekyire b’aseɛ bɔ ɛfa mane bɛ nana mɔ ne aso, kuro bɔ aneanea nu aye asie berɛ ama wɔ nwo ne, ɔne sua bɔ masi mafa wɔ dumaa mato so ne, ná bɛbɔ mbaeɛ a,

³⁹ ye de tie bɛ mbaeɛ ɔne bɛ sufrɛ wɔ nyameɛso, nekaa bɔ ɛte ne. Di bɛ dwirɛ ma bɛ, ná wɔ mmenia bɔ bayɔ bɔne batia wɔ ne, fa bɛ bɔne kyɛ bɛ.

⁴⁰ Ao me Nyameɛ, ma wɔ nye li sua ye asi, ná mbaeɛ biala bɔ bɛkɔbɔ ye wɔ ɛwa ne, tie.

⁴¹ “Ao AWURADE Nyameɛ, mesrɛ wɔ, bra baatena nekaa bɔ ekole wɔ nwome ne, ɛne wɔ tumi alaka ne. Ao, AWURADE Nyameɛ, fa ngoalelɛ yɛ ɛtena kata w’asɔfo mɔ nwo, ná wɔ mmenia bɔ bedi nahorɛ bɛma wɔ ne, maa beli ahurusi wɔ wɔ paayɛlɛ nu.

⁴² Ao AWURADE Nyameɛ, nnɛpo wɔ sona bɔ apopa ye ngoo ne. Fa wɔ nye to wɔ ɔdɔ bɔ onni ngasi bɔ ele ye ma wɔ somvoɛ Dawide ne.”