2 Aberɛso Dwirɛ 5 - AHYERƐLƐ KRONGRON

¹ Yiti Solomon yɔle AWURADE awuro berɛ adwuma ne amukoraati yiele. Na nningyein bɔ Solomon baba Dawide tu siele berɛ mane AWURADE, ɔne ɛdwetɛ, esikaa kɔkorɛ ɔne nningyein ahoroɔ ne, Solomon fa hɔle Nyameɛ awuro berɛ oosiele nekaa bɔ besie nningyein ne.

Solomon fa apam alaka ne ba asɔneyɛɛ sua ne anu

² Afei Yisrael mbanyi, mmusua kure mbanyi nemɔ amukoraa, ɔne Yisraelfoɛ bɛ nana mɔ sasofoɛ mbanyi nemɔ, Solomon boaboale bɛ noa maa beyiale wɔ Yerusalem, kyɛ bɛɛfa AWURADE apam alaka ne béfi Dawide kuro Sion bɛbra.

³ Na Yisraelfoɛ amukoraa beeyiale nu wɔ Nana Solomon nyunu wɔ (Asese) aluolue bo wɔ bosome bɔ ɔtɔ so nzoo ne anu.

⁴ Yisrael mbanyi amukoraa bɛwale, na né Lewifoɛ nemɔ bɛso apam alaka ne.

⁵ Yiti bɛfale apam alaka ne, yeɛ ɛtena sua atenaleɛ ne, ɔne nu nningyein krongron amukoraati bɛwale. Asɔfo nemɔ ne Lewifoɛ nemɔ yeɛ bɛfa bɛwale ɔ.

⁶ Nana Solomon ne Yisrael maen amukoraa bɔ beyiale wɔ ye nyunu ne, belili alaka ne anyunu bɛbɔle afɔleɛ. Mmoaen ne nandwie bɔ bɛfa bɛbɔle afɔleɛ ne, bɛ somaa ti bangora bɛ ka.

⁷ Yeɛ asɔfo nemɔ fale AWURADE apam alaka ne besiele nekaa bɔ ɔsɛ kyɛ ogyina ɔ, wɔ sua ne kunu dɔ paa krongron nu krongron ne anu, wɔ kɛrubim nemɔ bɛ ndaa nemɔ abo.

⁸ Ofikyɛ kɛrubim nemɔ, bɛ ndaa nemɔ trɛtrɛ kata nekaa bɔ alaka ne ogyi ne aso, maa ye sɔ ti kɛrubim nemɔ kata alaka ne ɔne ye mbuna nemɔ aso.

⁹ Ɔnate kyɛ mbuna nemɔ wowale ne ati, né sɛ ebie gyi sua ne akunu dɔ krongron nu krongron ne anyunu a, bɛ ti nemɔ fitefite maa onwu bɛ. Nakoso sɛ ebie gyi aluo de a, onnwu bɛ; na bɛtɛ wɔ berɛ maa waadwu ɛnɛ ye.

¹⁰ Né nikye fee nne alaka ne anu, sana nyɔboɛ taataa nyɔ bɔ Mose fa guale nu wɔ Horebo, nekaa bɔ AWURADE ne Yisraelfoɛ bɛyɛle apam mmerɛ bɔ befi Misraim bɛwale ne.

¹¹ Na mmerɛ bɔ asɔfo nemɔ befili nekaa krongron berɛ befitele ne (né asɔfo mɔ bɔ bɛwɔ berɛ ne, bɛ mukoraa bapete bɛ nwo, ɔmva ye nwo asɔfo kure bɔ befi nu ɔ,

¹² na né Lewifoɛ bɔ bɛte edweintolɛfoɛ, bɔ bɛ ole Asafe, Heman ne Yedutun ne, bɛ ne bɛ mma ne bɛ sasofoɛ, baherahera nwera nyemene, bɔ bɛbɔ firikyiwa, adengum ne sangoo ɔ. Né begyigyi afɔleɛ bokyea ne, ye eyia afiteleɛ so, bɔ asɔfo totorobɛndohulɛfoɛ ɛyaa ko aburanyɔ boka bɛ so ɔ.)

¹³ Totorobɛndohulɛfoɛ ne edweintolɛfoɛ nemɔ, b’adwuma ole kyɛ bɛkɔbɔ nu bɛkɔye AWURADE ayɛ bɛkɔla ye ase ɔ. Na sɛ bɛkenga edwein ne a, bɛfa totorobɛndo ne firikyiwa ne edweintolɛ nningyein ahoroɔ besuro so bɛye AWURADE ayɛ kyɛ, “Ɔte paa, na ye ɔdɔ bɔ onni ngasi ne, ɔwɔ berɛ daa.” Sɔ mmerɛ ne, munungum yili AWURADE awuro berɛ tɛkyɛ.

¹⁴ Na ɔnate munungum ne ati, asɔfo nemɔ bangora bandoa so banyɔ ɛsɔnenɛ adwuma ne; ofikyɛ AWURADE animnyam yili Nyameɛ awuro berɛ tɛkyɛ.