2 Aberɛso Dwirɛ 4 - AHYERƐLƐ KRONGRON

Solomon siesie asɔneyɛɛ sua ne anu

¹ Ɔyɔle kɔɔbere afɔleɛ bokyea bɔ ye tendenn te agyirɛ aburanyɔ, ye tɛtrɛtɛɛ te agyirɛ aburanyɔ, yeɛ ofi ye aseɛnwo bɔ ɔkwaadwu ye anwuro ne, ɔte agyirɛ buru ɔ.

² Afei ohurole kɔɔbere fa yɔle nzim ne. Ofi ye noa kɔka ye noa ne, ɔte agyirɛ buru, yeɛ nu kuronn te agyirɛ nnu. Sɛ ɛfa ye nwo amukoraa bra yia a, ɔte agyirɛ aburasa.

³ Ye noa kaa ne abo, ɔfale kɔɔbere lili kɔndoa adwii guale ye nwo bra yiale. Kɔndoa bɔ ɔfa pɛle nzim ne anwo yiale ne, ko biala te agyirɛ buru. Ɔfale kɔɔbere lili kɔndoa adwii folii nyɔ guale nzim ne anwo.

⁴ Nzim ne, né ogyi nandwie bɔ bafa kɔɔbere bayɔ ɔ buru ne nyɔ so: nza nye kyire sorɔ, nza nye kyire eyia atɔleɛ, nza nye kyire ngwaen, yeɛ nza wora bɛ nye kyire eyia afiteleɛ. Né nzim ne gyi bɛ so. Bɛ mukoraa bɛ si wura angora ne abo.

⁵ Nzim ne pipiripii te kyɛ agyirɛ ko bɔ bahyɛ nu nna ɔ. Bayɛ ye noa kaa ne te kyɛ kwangoa noa kaa ne. Ɔte kyɛ sukooko nyerɛen ne, na ɔkora fa nzue galɔn apee aburasa.

⁶ Osa yɔle ayaa buru bɔ benwunzi naen bɔ bɛfa bɛbɔ naen yeralɛ afɔleɛ ne wɔ nu ɔ. Ɔfale nnu siesiele famaa so, yeɛ ɔfale nnu siesiele bɛen so. Nakoso angora kurukuru ne anu yeɛ né asɔfo nemɔ benwunzinwunzi bɛ bɔbɔ bɛ nwo ɔ.

⁷ Ɔyɔle kanea bakaa buru kyɛbɔ bahyɛ ne, na ɔfa siesiele asɔneyɛɛ sua ne anu: ɔfale nnu siesiele ngwaen, yeɛ ɔfale nnu koso siesiele sorɔ.

⁸ Osa yɔle ɛpoen buru fa siele asɔneyɛɛ sua ne anu. Ɔfale nnu siele famaa, yeɛ ɔfale nnu siele bɛen so. Na ɔyɔle esikaa kɔkorɛ ayaa ɛyaa ko.

⁹ Osili aluo berɛ ne mane asɔfo nemɔ, yeɛ osa sili aluo berɛ kandinga ne.’ Ɔyɔle aluo berɛ anoa nemɔ fale kɔɔbere borole bɛ nwo.

¹⁰ Ɔfale nzim ne siele awuro berɛ ngwaen dɔ wɔ eyia afiteleɛ so.

¹¹ Na Huram yɔle ngukue nemɔ, ateɛ anoa tworɔntworɔn nemɔ, yeɛ ayaa nemɔ. Yiti Nyameɛ awuro berɛ adwuma bɔ Huram yɔ mane Nana Solomon ne, ɔyɔ yiele.

¹² Bɛ ole bonima nyɔ nemɔ, ndalie nemɔ, abotire nyɔ bɔ ogyigyi bonima nemɔ aso ne, ɛtɛen nyɔ bɔ bɛkɔfa bɛkɔkata ndalie nyɔ bɔ bɛwɔ abotire nyɔ bɔ bɛwɔ bonima nemɔ aso ne;

¹³ akengaa adwii ɛyaa nna bɔ bali bagua ɛtɛen nyɔ nemɔ anwo ne, akengaa adwii bɔ bali ye folii nyɔ bagua ɛtɛen ko biala anwo, bɔ bɛkɔfa bɛkɔkata abotire nemɔ bɛ ndalie nyɔ bɔ bɛwɔ bonima nemɔ aso ne,

¹⁴ nyinasoɛ nemɔ, ayaa bɔ begyigyi nyinasoɛ nemɔ aso ne;

¹⁵ nzim ko ne, yeɛ nandwie nyii adwii buru ne nyɔ bɔ bɛwɔ nzim ne abo ne.

¹⁶ Ngukue nemɔ, sofi nemɔ, ateɛ anoa tworɔntworɔn nemɔ, ɔne nningyein amukoraa bɔ adwiililɛ hene Huram yɔ mane Nana Solomon maa ɔfa siesiele AWURADE awuro berɛ ne, ɔfale kɔɔbere bɔ wahwi ye nwo hyɛmhyɛm yeɛ ɔyɔle ɔ.

¹⁷ Asue Yɔɔdan nwo aseɛ frɛtɛɛ ne aso, ɛfaa aseɛ bɔ ɔla Sukote ne Sereda b’afia ne, berɛ yeɛ Nana Solomon maa bɛyɔle sɔ nningyein nemɔ ɔ.

¹⁸ Solomon maa bɛyɔle sɔ nningyein ne amukoraa pee paa, yiti kɔɔbere bɔ bɛfa bɛyɔle ne, bangora bangari bɛ bannwu nu nonɛ.

¹⁹ Solomon yɔle nningyein amukoraa bɔ bɛwɔ Nyameɛ awuro ne. Bɛ ole: esikaa kɔkorɛ afɔleɛ bokyea ne, esikaa kɔkorɛ poen bɔ bɛfa paanoo krongron begua so ne,

²⁰ esikaa kɔkorɛ paa kanea mmakaa ne bɛ nganea bɔ begye wɔ nekaa krongron ne anyunu berɛ, kyɛbɔ Nyameɛ wahyɛ ne,

²¹ esikaa kɔkorɛ paa nyerɛen nemɔ, esikaa kɔkorɛ paa nganea nemɔ, yeɛ esikaa kɔkorɛ paa akapɛ nemɔ;

²² esikaa kɔkorɛ paa akapɛ bɔ bɛfa bɛtengyɛtengyɛ kanea nyamaa noa nemɔ, esikaa kɔkorɛ paa ayaa nemɔ, esikaa kɔkorɛ paa ateɛ nemɔ, ɔne esikaa kɔkorɛ paa ngukue bɔ bɛfa see begua nu nemɔ. Asɔneyɛɛ sua nu berɛ anoa nemɔ, krongron nu krongron dɔ anoa nemɔ, yeɛ afei asɔneyɛɛ sua ne anyunu dɔ anoa nemɔ, ɔfale esikaa kɔkorɛ yeɛ ɔborole bɛ nwo ɔ.