2 Aberɛso Dwirɛ 36 - AHYERƐLƐ KRONGRON

Yehoahase di Yuda so hene

¹ Maen ne anu ama yele Yosia awa bienzua Yehoahase, na bɛfale ye belili hene besili ye baba gya nu wɔ Yerusalem.

² Yehoahase lili hene ne, né wali afoɛ aburanyɔ ne nza, na olili hene bosome nza wɔ Yerusalem.

³ Yeɛ Misraim hene tuli ye bia so wɔ Yerusalem, na ɔpɛle ɛtoɔ ɛdwetɛ talɛnde ɛyaa ko ne esikaa kɔkorɛ talɛnde ko mane maen ne.

⁴ Misraim hene fale Yehoahase aliɛma Eliakim lili Yuda ne Yerusalem so hene, na Misraim hene sesane Eliakim dumaa frɛle ye Yehoakim. Nakoso Misraim hene Neko hyele Eliakim aliɛma Yehoahase nnure hɔle Misraim.

Yehoakim di Yuda so hene

⁵ Yehoakim lili hene ne, né wali afoɛ aburanyɔ ne nnu, na olili hene afoɛ buru ne ko wɔ Yerusalem. Ɔyɔle bɔ ɔte bɔne wɔ AWURADE ye Nyameɛ nyunu ɔ.

⁶ Babilɔn hene Nebukadenesa fale koɛ ɔɔtetale Yehoakim, na oguale ye ngɔnzɔngɔnzɔ fale ye hɔle Babilɔn.

⁷ Asa koso, Nebukadenesa sesale AWURADE awuro berɛ nningyein ne bie hɔle Babilɔn, na ɔfa oosiele ye asɔneyɛɛ so wɔ Babilɔn.

⁸ Afei Yehoakim nwo dwirɛ ngaa ne, ɔne akyiwadeɛ nningyein bɔ ɔyɔle, ɔne edwirɛ bɔ bele betia ye amukoraa, bahyerɛ ye wɔ Yisrael ne Yuda ahemvo nwo dwirɛ nwomaa ne anu. Na ɔwa bienzua Yehoakyin lili ye bia.

Yehoakyin di Yuda so hene

⁹ Yehoakyin lili hene ne, né wali afoɛ mmɔtwɛ, na olili hene bosome nza ne eleburu wɔ Yerusalem. Ɔyɔle bɔ ɔte bɔne wɔ AWURADE nyunu ɔ.

¹⁰ Bɛhyɛ afoɛ bo bieku ne, Nana Nebukadenesa somane maa bɛɛfale Yehoakyin bɛwale Babilɔn. Bɛsesale AWURADE awuro berɛ nningyein bɔ ye nyɔboɛ yɛ se ɔ bɛbokale so bɛhɔle, na Nebukadenesa fale Yehoakyin aliɛma Sedekia lili Yuda ne Yerusalem so hene.

Sedekia di Yuda so hene

¹¹ Sedekia lili hene ne, né wali afoɛ aburanyɔ ne ko, na olili hene afoɛ buru ne ko wɔ Yerusalem.

¹² Ɔyɔle bɔ ɔte bɔne wɔ AWURADE ye Nyameɛ nyunu ɔ. Wammrɛ ye nwo ase wamma ngɔmhyɛlɛniɛ Yeremia bɔ ɔfale AWURADE noa dwirɛ tole dwaa ne.

Babilɔn sɛkye Yerusalem ne asɔneyɛɛ sua ne

¹³ Nana Nebukadenesa bɔ né wama Sedekia wata Nyameɛ ndaen kyɛ ɔngɔyɛ ye nwo lɔen ne, Sedekia yɛle ye nwo lɔen. Sedekia yɛle asoserɛ, ná obubuli mmakaa tuale ye so kyɛ ɔngɔso AWURADE Yisrael Nyameɛ ne.

¹⁴ Asɔfo mbanyi nemɔ amukoraa bɛ ne maen ne behwi bɛfale AWURADE dwirɛ so piri paa, na bɛyɔle amaenmaensofoɛ b’akyiwadeɛ ne amukoraa bie. AWURADE awuro bɔ wayɛ ye krongron wɔ Yerusalem ne, bɛfale efiɛ bɛhane ye.

¹⁵ AWURADE bɛ nana mɔ Nyameɛ ne, ɔsomane ye ɛbɔfoɛ mɔ mmerɛ pee maa bɛɛbɔle bɛ kɔkɔ, ofikyɛ né ye ahone la ye maen ne ye atenaleɛ ne anwo.

¹⁶ Nakoso bɛhɔle so bɛgorole Nyameɛ ɛbɔfoɛ nemɔ anwo, bamva ye dwirɛ banyɛ huu, na bɛserele ye ngɔmhyɛlɛfoɛ nemɔ alaa kɔpem kyɛ AWURADE ɛyaa piri bɔ wafɛ ye wɔ ye maen so ne, ɔhɔle anwuro maa né bɛyɔ ye nwo hwee a ɔnyɛ yé ɔ.

¹⁷ Yiti Nyameɛ mane Babilɔn hene fale koɛ ɔɔtoale bɛ, na ɔfale ngrandɛ huhuni bɛ mmerandeɛ mɔ wɔ bɛ nekaa krongron awuro berɛ. Babilɔn hene wannwu aberandeɛ anaa taluwa, aworowaa anaa yarefoɛ biala anwumvoin, na Nyameɛ fale bɛ mukoraa wurale ye sa.

¹⁸ Nyameɛ awuro berɛ nningyein mbiri mbiri ne mmaa mmaa, nningyein bɔ ɔwɔ AWURADE awuro berɛ nekaa bɔ bɛfa nningyein besie ne, yeɛ Nana Sedekia ne ye mbanyi bɛ nningyein, Babilɔn hene sesale, na ɔfale ye mukoraati hɔle Babilɔn.

¹⁹ Bɛyerale Nyameɛ awuro ne, bebubuli Yerusalem fasue ne beguale, bɛyerale Yerusalem ahemvie nemɔ amukoraa, na nu nningyein bɔ ye nyɔboɛ yɛ se ne, bɛyerale ye mukoraa.

²⁰ Bɛ bɔ benyane bɛ ti bedidili nu ne amukoraa koso, ɔhyele bɛ nnure fale bɛ hɔle Babilɔn, na bɛɛyɛle ngoaa bɛmane ye ne ye mma mɔ alaa maa oodwuli kyɛ Pɛsia ahennie tumi dwɔsole ɔ.

²¹ Ɛhe sili, amaa AWURADE dwirɛ bɔ ɔnate Yeremia so hane ne, wawa nu; amaa ɔnate so aseɛ ne wanya ate wali ye afofingyẽa. Ngyẽa amukoraa bɔ aseɛ ne lale berɛ mbaen ne, né odi afofikyẽa alaa kɔpem kyɛ afoɛ aburasoo sone ɔ.

Karose ma Yudafoɛ fawɔnwodi

²² Pɛsia hene Karose lili hene ne, ye afoɛ bɔ oli moa ne anu, kyɛbɔ AWURADE dwirɛ bɔ ɔnate Yeremia so hane ne kɔwa nu ne, AWURADE kanyane Pɛsia hene Karose. Yiti Karose tuli ɛbɔfoɛ mɔ maa bɛɛbɔle edwirɛ ne dawure wɔ ye ahennie amukoraa nu, na ɔhyerɛle krataa koso bokale so kyɛ,

²³ “Pɛsia hene Karose nwa nyoo, ‘AWURADE bɔ ɔte nyameɛso Nyameɛ ne, wafa aseɛ so ahennie amukoraa wawura me sa, na wafa ahyɛdeɛ wama me kyɛ nzi sua mma ye wɔ Yerusalem bɔ ɔwɔ Yuda ne. Ɛmɔ nu biala bɔ ɔboka ye mmenia so ne, mesrɛ kyɛ AWURADE ye Nyameɛ ogyina ye si’. Ɔkora osi nu ɔkɔ.’ ”