2 Aberɛso Dwirɛ 35 - AHYERƐLƐ KRONGRON

Yosia di Abɔtra aluolue

¹ Yosia lili Abɔtra aluolue hyɛle AWURADE animnyam wɔ Yerusalem. Bosome bɔ oli moa ne, ye kyẽa bɔ ɔtɔ so buru ne nna ne aso yeɛ behuni Abɔtra boaen ne ɔ.

² Ɔfale asɔfo nemɔ adwuma wurale bɛ sa, na ɔhyɛle bɛ nguraen wɔ AWURADE awuro berɛ ɛsɔnenɛ adwuma ne anu.

³ Osele Lewifoɛ bɔ bɛ yeɛ né bekyirekyire Yisraelfoɛ amukoraa Nyameɛ dwirɛ, ná bɛte krongron bɛma AWURADE ne kyɛ, “Alaka krongron ne, ɛ́mɔfa besie awuro bɔ Dawide awa Yisrael hene Solomon osili ne anu. Onni kyɛ ɛmɔsoa ye wɔ ɛmɔ bati so ko. Na afei, ɛ́mɔso AWURADE ɛmɔ Nyameɛ ne ye maen Yisrael.

⁴ Ɛ́mɔyɔ adwuma ne kyɛbɔ ɛmɔ nana mɔ sasofoɛ bɛ mmusua mmusua te ɔ, kyɛbɔ Yisrael hene Dawide ɔne ɔwa Solomon bɛhyehyɛle bɛtole berɛ ne.

⁵ Ɛ́mɔgyina nekaa krongron berɛ nekaa bɔ baye bama ɛmɔ abusua kure deɛ ne, na sɛ abusua kure bɔ bewura ɛmɔ sa ne, sɛ bɛfa afɔleɛ bɛba asɔneyɛɛ sua ne anu a, ɛ́mɔboka bɛ.

⁶ Ɛmɔhu Abɔtra boaen ne, ɛ́mɔpete ɛmɔ nwo, na ɛ́mɔgyina ɛmɔ aliɛma nemɔ gya nu bɛbɔ b’afɔleɛ ne bɛma bɛ. Ɛmɔli nhyehyɛleɛ ne aso kyɛbɔ AWURADE dwirɛ bɔ ɔfa mane Mose ne, ɔte ne ala.”

⁷ Yeɛ Nana Yosia yele ɛhemɔ fili ye agyapadeɛ nu, na ɔfa mane maen mmaa bɔ né bɛwɔ berɛ ne amukoraa kyɛ bɛfa bɛbɔ Abɔtra aluolue afɔleɛ nemɔ: mmoaen akrɔngrɔma ne mbɔngye akrɔngrɔma apee aburasa, yeɛ nandwie nyii apee nza.

⁸ Ye mbanyi mɔ koso bɛyele bɛ kunu bɛfale nningyein bɛhyɛle mmenia ne, asɔfo nemɔ ne Lewifoɛ nemɔ. Hilkia, Sakaria ne Yehiel bɔ bɛte Nyameɛ awuro berɛ mbanyi paa ne, bɛmane asɔfo nemɔ mmoaen akrɔngrɔma ne mbɔngye akrɔngrɔma apee nyɔ ɛyaa nzia, yeɛ nandwie nyii ɛyaa nza kyɛ bɛ́fa bɛ́bɔ Abɔtra aluolue afɔleɛ nemɔ.

⁹ Konania koso ne oliɛma mɔ Semaya ne Netanɛl ne Hasabia ne Yeyiɛl ne Yosabade bɔ bɛte Lewifoɛ mbanyi ne, bɛmane Lewifoɛ nemɔ mmoaen akrɔngrɔma ne mbɔngye akrɔngrɔma apee nnu, yeɛ nandwie nyii ɛyaa nnu kyɛ bɛ́fa bɛ́bɔ Abɔtra aluolue afɔleɛ nemɔ.

¹⁰ Bɛyɛle Abɔtra ne anwo ndotoleɛ beyiele ne, asɔfo nemɔ begyinane nekaa bɔ odi kyɛ begyina ne, na Lewifoɛ nemɔ koso begyinane kure kure, kyɛbɔ Nana Yosia hyehyɛle ne ala.

¹¹ Behuni Abɔtra boaen ne, bɛfale mogya ne bɛmane asɔfo nemɔ, na asɔfo nemɔ tole mogya ne bɛpetene wɔ mmerɛ bɔ né Lewifoɛ nemɔ bebia ngaka nemɔ ɔ.

¹² Bɛfale naen yeralɛ afɔleɛ nemɔ besiele ahameɛ, kyɛ begyina maen mmaa nemɔ bɛ nana mɔ sasofoɛ mmusua mmusua so bɛkyɛ bɛma bɛ maa bɛfa bɛbɔ afɔleɛ bɛma AWURADE, kyɛbɔ bahyerɛ ye wɔ Mose nwomaa ne anu ne. Na sɔ ala yeɛ bɛfale nandwie nyii nemɔ koso bɛyɔle ɔ.

¹³ Bɛtotone Abɔtra naen ne wɔ see nu kyɛbɔ nhyehyɛleɛ ne kyire ne, na afɔleɛ krongron nemɔ, bɛtone ye wɔ ngukue nu, dadesɛn mɔ nu ne kyɛnzee mɔ nu, na bɛfa bɛmane maen mmaa ne amukoraa ndɛndɛ so.

¹⁴ Na ɛhe asi ne, besiesiele Abɔtra afɔleɛ ne bie bɛmane bɛ nwo ne asɔfo nemɔ, ofikyɛ asɔfo nemɔ bɔ bɛte Aarɔn boso ama ne, naen yeralɛ afɔleɛ nemɔ ne ɛloe ne, né bɛ nye aboro bɔ bɛfa bɛbɔ afɔleɛ toonn maa okodwu nɔsoa ɔ. Yiti Lewifoɛ nemɔ besiesiele Abɔtra ne bɛmane bɛ bɔbɔ bɛ nwo ne asɔfo nemɔ bɔ bɛ yeɛ bɛte Aarɔn boso ama ne.

¹⁵ Edweintolɛfoɛ nemɔ, bɔ bɛ yeɛ bɛte Asafe boso ama mɔ ne, né begyigyi nekaa bɔ odi kyɛ begyina ɔ, kyɛbɔ Dawide, Asafe, Heman ɔne Yedutun bɔ ɔte Nana sona bɔ ɔse ase ne, bɛhyɛle ne ala. Anoa awɛmvoɛ nemɔ, né begyigyi anoa ne biala anu. Né onhia kyɛ bɛyakyi b’adwuma begua berɛ, ofikyɛ b’eliɛma Lewifoɛ nemɔ siesiele afɔleɛ ne bie bɛmane bɛ.

¹⁶ Yiti AWURADE sɔnenɛ nwo ndotoleɛ ne amukoraa, beyiele ye sɔ kyẽa ne, kyɛ bɛfa bedi Abɔtra aluolue ne, ná bɛbɔ naen yeralɛ afɔleɛ wɔ AWURADE afɔleɛ bokyea ne aso, kyɛbɔ Nana Yosia hyɛle ne.

¹⁷ Yisraelfoɛ bɔ né bɛwɔ berɛ ne, belili Abɔtra aluolue ne sɔ mmerɛ ne, na belili Paanoo Kabrɛdi aluolue ne ɛlɛsoo.

¹⁸ Ofi ngɔmhyɛlɛniɛ Samuel aberɛ so bɔ ɔbaadwu sɔ mmerɛ ne, banni Abɔtra aluolue biala wɔ Yisrael bɔ ɔte kyɛ ɛhe ɔ. Yisrael ahemvo nemɔ, bɛ nu biala wanni Abɔtra aluolue biala kyɛbɔ Yosia, asɔfo nemɔ ne Lewifoɛ nemɔ, Yudafoɛ amukoraa ne Yisraelfoɛ amukoraa bɔ né bɛwɔ berɛ ne, ɔne Yerusalemfoɛ belili ɔ.

¹⁹ Yosia lili hene ne, ye afoɛ bɔ ɔtɔ so buru ne mmɔtwɛ ne anu yeɛ belili sɔ Abɔtra ne ɔ.

Yosia wu wɔ koɛ nu

²⁰ Ɛhe amukoraa si ne, Yosia siesiele asɔneyɛɛ sua ne yiele ne, Misraim hene Neko hɔle koɛ wɔ Kakemise wɔ asue Yufreti noa, na Yosia fale koɛ ɔɔtoale ye.

²¹ Nakoso Neko tuli ɛbɔfoɛ mɔ maa bɛhɔle Yosia berɛ beesele ye kyɛ, “Yuda hene, nzikyɛ dwirɛ yeɛ ɔwɔ y’afia ɔ? Nna wɔ yeɛ mafa koɛ maatoa wɔ ɛnɛ ɔ, na mmom maen bɔ me ne ye yɛle koɛ yɛko ɔ. Na Nyameɛ ahyɛ me kyɛ nyɛ ye ndɛ. Nnɛko tia Nyameɛ bɔ ogyi me si ne, amaa ɔnate so wangu wɔ.”

²² Nakoso Yosia wandie bɔ Neko kã ne, na mmom ɔɔsakyerale ye nwo ɔfale koɛ ɔtoale Neko. Wandie Nyameɛ dwirɛ bɔ ɔnate Neko so hane ne, na mmom ɔfale koɛ ɔɔtoale Neko wɔ Megido aseɛ frɛtɛɛ ne aso.

²³ Agyaentolɛfoɛ ne tole agyaen sinane Nana Yosia, na osele ye somvoɛ nemɔ kyɛ, “Ɛ́mɔfa me béfi wa bɛhɔ, ofikyɛ mapura paa.”

²⁴ Yiti ye somvoɛ nemɔ bɛyele ye befili ye teaseɛnam ne anu, na bɛsoale ye bɛɛtole ye teaseɛnam foforɛ nu bɛhɔle Yerusalem. Berɛ yeɛ Yosia wuli ɔ. Besiele ye wɔ ye nana mɔ asieleɛ so, na Yuda ne Yerusalem amukoraa besuni ye.

²⁵ Yeremia koso tole Yosia nwo awuye dwein. Na edweintolɛfoɛ mmienzua ne mmrasua amukoraa bɛbɔ Yosia dumaa wɔ b’awuye dwein mɔ nu maa waadwu ɛnɛ. Bɛmaa ɔyɛle amammerɛ wɔ Yisrael, na bahyerɛ ye wɔ Awuye dwein nwomaa ne anu.

²⁶ Afei Yosia nwo dwirɛ ngaa ne, ye bra bɔ ɔtengyɛ bɔ ɔbɔle ɔ, kyɛbɔ bahyerɛ ye wɔ AWURADE mmeraa ne anu ne,

²⁷ bɔ ɔyɔle ɔ, ofi ahyɛaseɛ bɔ ɔkwaadwu ayieleɛ, bahyerɛ ye wɔ Yisrael ne Yuda ahemvo nwo dwirɛ nwomaa ne anu.