2 Aberɛso Dwirɛ 33 - AHYERƐLƐ KRONGRON

¹ Manase lili hene ne, né wali afoɛ buru ne nyɔ, na olili hene afoɛ aburannu ne nnu wɔ Yerusalem.

² Ɔyɔle bɔ ɔte bɔne wɔ AWURADE nyunu ɔ. Maen maen mɔ bɔ AWURADE foane bɛ fili Yisraelfoɛ nyunu ne, akyiwadeɛ nningyein bɔ bɛyɔle ne, ye koso ɔyɔle bie.

³ Ofikyɛ bosoen asɔneyɛɛ mɔ bɔ Manase baba Hesekia obubuli bɛ ne, Manase sa sisili. Osisili Baal mɔ b’afɔleɛ mmokyea, na ogyinane Asera dosii mɔ. Ɔsɔnene ewienu abɔdeɛ amukoraa na ɔsole bɛ.

⁴ AWURADE awuro bɔ AWURADE hane ye nwo dwirɛ kyɛ, “Yerusalem yeɛ ngɔmaa bɛkɔsɔne me dumaa afebɔɔ” ne, Manase sisili mmosoen afɔleɛ mmokyea wɔ berɛ.

⁵ Aluo nyɔ bɔ bɛwɔ AWURADE awuro berɛ ne, osisili afɔleɛ mmokyea mane nyameɛso abɔdeɛ ahoroɔ amukoraati wɔ berɛ.

⁶ Ɔfale ye mma mmienzua bɔle afɔleɛ wɔ see nu wɔ Hinom Awa bɔnza ne anu. Ɔhɔle abisa, ɔyele ngonyaa, ɔyele musue, na ɔfale ye nwo bɔle nzamangɔmhyɛlɛfoɛ ne abayifoɛ. Ɔyɔle bɔ ɔte bɔne pee wɔ AWURADE nyunu fa huli AWURADE ahone.

⁷ Amoen bɔ osele ne, ɔfa ɔɔpenane Nyameɛ awuro berɛ; awuro bɔ Nyameɛ hane ye nwo dwirɛ hyirele Dawide ne ɔwa Solomon kyɛ, “Sɔ awuro he, yeɛ Yerusalem bɔ maneanea Yisrael mmusua kure amukoraa nu matu masie berɛ ne, nu yeɛ ngɔmaa bɛkɔsɔne me dumaa afebɔɔ ɔ.

⁸ Sɛ Yisraelfoɛ bekoli edwirɛ bɔ mafa mama bɛ amukoraa so nahorɛ nu, bekoli mmeraa amukoraa, ahyɛdeɛ amukoraa ne nhyehyɛleɛ amukoraa bɔ mvale Mose so maa benyane ye ne aso nahorɛ nu a, ye de aseɛ bɔ mva mane ɛmɔ nana mɔ ne, mengɔmaa bɛngɔbɔ aya bengofi so ko.”

⁹ Manase lakalakale Yuda ne Yerusalemfoɛ maa bɛyɔle bɔne bɛtrale maen maen mɔ bɔ AWURADE huhuni bɛ fili Yisraelfoɛ nyunu ne.

Manase sakyera ye adwene

¹⁰ AWURADE bɔle Manase ne ye maen kɔkɔ, nakoso bandie ye dwirɛ.

¹¹ Yiti AWURADE mane Asiria hene safohene mɔ bɛfale koɛ bɛɛtoale bɛ. Bɛhyele Manase nnure, beguale ye kɔɔbere ngɔnzɔngɔnzɔ, bɛfale kɔɔbere bɛkyekyele ye, na bɛfale ye bɛhɔle Babilɔn.

¹² Na mmerɛ bɔ ɔwɔ amaneɛ nu ne, ɔsrɛle AWURADE ye Nyameɛ kyɛ onwu ye anwumvoin, na ɔbrɛle ye nwo ase paa wɔ ye nana mɔ bɛ Nyameɛ nyunu.

¹³ Ɔbɔle mbaeɛ hyirele Nyameɛ, na otiele ye mbaeɛ ne ye sufrɛ, na Nyameɛ fale ye sa wale Yerusalem maa ɔɔtoale ye ahennie so. Na ɛhe mane Manase nwuni kyɛ AWURADE te Nyameɛ amba.

¹⁴ Nziɛ ye, ɔtole fasue wɔ Dawide kuro ne anwo wɔ Gihon eyia atɔleɛ so wɔ bɔnza ne anu, kɔpem Tire Pambim ne. Ɔfa pɛle Ofel nwo bra yiale, na ɔtole fasue ne maa ɔyɛle tendenn paa. Osa fale safohene mɔ tenatenane Yuda nguro bɔ bato bɛ nwo fasue nemɔ amukoraa so.

¹⁵ Otutuli maenmaensofoɛ mɔ nyameɛ nemɔ ne mmosoen nemɔ abo fili AWURADE awuro berɛ, na afɔleɛ mmokyea amukoraa bɔ osisili bɛ wɔ AWURADE awuro bokaa ne aso ɔne Yerusalem ne, ɔyeyele oogyi guale kuro ne asi dɔ.

¹⁶ Asa koso, osa sili AWURADE afɔleɛ bokyea ne, na ɔbɔle asomdwee afɔleɛ mɔ ne asennaa afɔleɛ wɔ so. Ɔfale ahyɛdeɛ mane Yuda kyɛ bɛsɔne AWURADE Yisrael Nyameɛ ne.

¹⁷ Ɔwɔ nu kyɛ maen ne hɔle so bɛbobɔle afɔleɛ wɔ asɔneyɛɛ nemɔ aso de, nakoso AWURADE bɛ Nyameɛ angome yeɛ né bɛbɔ bɛma ye ɔ.

Manase wue

¹⁸ Afei Manase nwo dwirɛ ngaa ne, ye mbaeɛ bɔ ɔbɔ hyirele Nyameɛ ne, yeɛ edwirɛ bɔ mmenia bɔ bɛse ase ne, bɛhã behyirele ye wɔ AWURADE Yisrael Nyameɛ dumaa nu ne, ɔwɔ Yisrael ahemvo nwo dwirɛ nwomaa ne anu.

¹⁹ Ye mbaeɛ bɔ ɔbɔle, kyɛbɔ Nyameɛ tiele ye sufrɛ, ye bɔne amukoraa, ye nahorɛlilɛ, nekaa bɔ osisili asɔneyɛɛ mɔ gyinagyinane Asera dosii mɔ ne amoen mɔ, koraka yeɛ ɔsakyera ne, bahyerɛ ye wɔ mmenia bɔ bɛse ase ne b’abakɔsɛm nwomaa ne anu.

²⁰ Manase toale ye mbanyi mɔ. Besiele ye wɔ ye awuro, na ɔwa bienzua Amon lili ye bia.

Amon di Yuda so hene

²¹ Amon lili hene ne, né wali afoɛ aburanyɔ ne nyɔ, na olili hene afoɛ nyɔ wɔ Yerusalem.

²² Ɔyɔle bɔ ɔte bɔne wɔ AWURADE nyunu ɔ, kyɛbɔ ɔse Manase yɔle ne ala. Amoen amukoraa bɔ Amon baba Manase gyinagyinane ne, Amon bɔle afɔleɛ mane bɛ, na ɔsɔnene bɛ.

²³ Wammrɛ ye nwo ase wamma AWURADE kyɛbɔ ye baba Manase de ɔbrɛle ye nwo ase ne, na mmom Amon yɔle bɔne pee.

²⁴ Amon ye somvoɛ mɔ bɔle ye nwo porɛ, na behuni ye wɔ ye awuro.

²⁵ Nakoso maen ne anu ama huhuni bɛ bɔ bɛbɔle Nana Amon nwo porɛ ne amukoraa, na maen ne anu ama fale ɔwa Yosia belili hene besili ye gya nu.