2 Aberɛso Dwirɛ 32 - AHYERƐLƐ KRONGRON

Asiria fa koɛ toa Yuda

¹ Hesekia lili nahorɛ yɔle ɛhemɔ amukoraa ne, ye si ne, Asiria hene Senakeribo fale koɛ ɔɔtoale Yuda. Na ɔkyekyele asikyeleɛ pingyele nguro bɔ bato bɛ nwo fasue ne, kyɛ ɔpena kyɛ odi bɛ so ngonim ɔfa.

² Na Hesekia nwuni kyɛ Senakeribo wawa kyɛ ɔbaafa koɛ ɔtoa Yerusalem nen,

³ ɔne ye mbanyi mɔ ne ye koɛhonɛfoɛ bɛdwenene ye nwo kyɛ mbombonzue bɔ bɛwɔ kuro ne asi dɔ ne, bekotua bɛ. Na bɛbokale ye.

⁴ Mmenia pee beeyiale nu, na betuatuale mbombonzue nemɔ amukoraa ne asue ba bɔ ɔtengyɛ fa aseɛ ne aso ne. Na bebisale kyɛ, “Nzu ati yeɛ odi kyɛ Asiria ahemvo mɔ bɛba bɛbanwu kyɛ nzue abu so wɔ wa ɔ?”

⁵ Hesekia hyɛle ye bo yɔle adwuma serɛ, na fasue bɔ né wabu wagua ase ne, besili ye mukoraa, na osisili abandenden siesiele so. Osili fasue bieku wɔ ye si. Sua bɔ bɛfrɛ ye Milo bɔ ɔwɔ Dawide kuro berɛ ne, ɔyɔle ye yé, na ɔyɔle akodeɛ ne akokyɛm pee.

⁶ Ɔyele safohene mɔ maa bɛlale maen ne anoa, na ɔboaboale bɛ noa wɔ nekaa bɔ bɛbɔ dwaa ne, wɔ kuro berɛ pambim ne anu, na ɔhyɛle bɛ nguraen kyɛ,

⁷ “Ɛ́mɔgyina pindinn ná ɛ́mɔma ɛmɔ hue yɛ se. Nnɛma ɛmɔsuro, yeɛ nnɛma ɛmɔ kunu tete ɛmɔ wɔ Asiria hene ne ɛlɔen bɔ bɛboka ye so ne, bɛ nyunu. Ofikyɛ bɔ ogyi yɛ si ne, ɔte piri tra bɔ ogyi ye si ɔ.

⁸ Ye de, kuro sona yeɛ ogyi ye si ɔ. Nakoso yɛ de, AWURADE yɛ Nyameɛ yeɛ ogyi yɛ si ɔ, bɔ ɔkɔboka yɛ maa yɛkɔho yɛ koɛ mɔ ɔ.” Edwirɛ bɔ Yuda hene Hesekia hane ne, ɔhyɛle maen ne nguraen.

⁹ Ɛhe asi ne, mmerɛ bɔ né Asiria hene Senakeribo, ɔne ye koɛhonɛfoɛ amukoraa bɛwɔ Lakise ne, otuli ɛbɔfoɛ maa bɛhɔle Yuda hene Hesekia berɛ wɔ Yerusalem, ɔne Yudafoɛ bɔ bɛwɔ Yerusalem amukoraa bɛ berɛ beesele bɛ kyɛ,

¹⁰ “Asiria hene Senakeribo obisa ɛmɔ kyɛ, Nzikyɛ yeɛ ɛmɔafa ɛmɔ nwo bato so, bɔ ɔkɔmaa etualɛ bɔ matua Yerusalem ne, ɛmɔkɔhora ye noa gyina ɔ?

¹¹ Sɛ Hesekia kã kyɛ, ‘AWURADE yɛ Nyameɛ kɔpepɛ kole yɛ kofi Asiria hene sa nu’ a, aso nna ɛlakalɛ yeɛ ɔlakalaka ɛmɔ ɔfa ɛmɔ kowura ɛhɔen ne nzuhɔen nu ma ɛmɔwuwu ɔ?

¹² Aso nna Hesekia komapɛ ye yeɛ wabubu ye asɔneyɛɛ mɔ ne afɔleɛ bokyea mɔ ye? Aso Hesekia wanhyɛ Yuda ne Yerusalem kyɛ, ‘Afɔleɛ bokyea komapɛ so yeɛ ɔsɛ kyɛ ɛmɔsɔne, na so yeɛ odi kyɛ ɛmɔyera ɛmɔ ɛyɛɛ ɔ?’

¹³ Aso ɛmɔnze bɔ me ne me nana mɔ yafa yayɔ maen maen ngaa sofoɛ amukoraa ɔ? Sɔ maen maen nemɔ, bɛ nyameɛ nemɔ, aso bɛhora bɛpepɛ belele bɛ maen mɔ befili me sa nu anaa?

¹⁴ Sɔ maen maen mɔ bɔ me nana mɔ sɛkyele bɛ pasaa ne, bɛ nyameɛ nemɔ amukoraa, bɛ nu beni yeɛ wahora wapepɛ wale ye maen wafi me sa nu, bɔ yiti ɛmɔ Nyameɛ ne kɔhora kɔpepɛ kole ɛmɔ kofi me sa nu ɔ?

¹⁵ Yiti nnɛmɔma Hesekia fa sɔ atee ne aso ɔlakalaka ɛmɔ, anaa obiri ɛmɔ nye so, yeɛ nnɛma ɛmɔde ye bedi. Ofikyɛ maen biala anaa ahennie biala nne berɛ bɔ ye nyameɛ wahora wapepɛ wale ye mmenia wafi me anaa me nana mɔ bɛ sa nu ɔ. Ɔkɔyɛ sɛɛ né ɛmɔ Nyameɛ wahora wapepɛ wale ɛmɔ wafi me sa nu!”

¹⁶ Senakeribo mbanyi nemɔ toale so bɛkekane dwirɛ betiale AWURADE Nyameɛ ne ye akoaa Hesekia.

¹⁷ Afei koso ɔhyerɛle ngrataa fa gorole AWURADE Yisrael Nyameɛ nwo, na ɔkekane edwirɛ tiale ye kyɛ, “Kyɛbɔ maen maen mɔ bɛ nyameɛ mɔ bangora banne bɛ mmenia bamvi me sa nu ne, sɔ ala yeɛ Hesekia Nyameɛ ne ɔngɔhora ngole ye mmenia ngofi me sa nu ɔ.”

¹⁸ Bɛteane nu bɛhane sɔ dwirɛ ne wɔ Yuda dwudwolɛ nu bɛfa benwunanwunane Yerusalemfoɛ bɔ bɛtete kuro berɛ fasue ne aso ne betuli bɛ kunu, amaa ɔnate so bahora bali kuro ne aso ngonim.

¹⁹ Bɛkekane edwirɛ betiale Yerusalem Nyameɛ ne, kyɛbɔ bɛkekã betiale aseɛ ye aso maen maen mɔ bɛ nyameɛ nemɔ, bɔ bɛte kuro sona sa noa adwuma ne ala.

Senakeribo ngoguo ne ye wue

²⁰ Na ɔnate edwirɛ he ati, Nana Hesekia ne ngɔmhyɛlɛniɛ Yesaya bɔ ye baba ole Amoso ne, bɛbɔle mbaeɛ besu bɛfrɛle Nyameɛ bɔ ɔwɔ nyameɛso ne.

²¹ Na AWURADE somane abɔfo ko maa oohuhuni koɛhonɛfoɛ atitire nemɔ, safohene nemɔ ne mbanyi amukoraa bɔ bɛwɔ Asiria hene asikyeleɛ ne anu ne. Yiti Senakeribo le animguaseɛ sa hɔle ye bɔbɔ ye maen nu. Oodwuli ye bosoen sua ne anu ne, ye bɔbɔ ye mma bele ngrandɛ behuni ye wɔ berɛ.

²² Yiti AWURADE pepɛ lele Hesekia ne Yerusalemfoɛ fili Asiria hene Senakeribo ne bɛ pɔfoɛ amukoraa bɛ sa nu. AWURADE bɔle bɛ nwo waen wɔ nekaa biala.

²³ Mmenia pee bɛfale akyɛdeɛ bɛbrɛle AWURADE wɔ Yerusalem, na bɛfale nningyein bɔ ye nyɔboɛ yɛ se ɔ bɛɛhyɛle Yuda hene Hesekia, na ɔnate ɛhe aso onyane dumaa piri wɔ maen maen amukoraa nu fi sɔ mmerɛ ne bɔ ɔkɔ ɔ.

Hesekia yɛ anwomasoɛ

²⁴ Sɔ mmerɛ ne anu, anwonyerɛ bɔle Hesekia bɔ né ɔla awusu ɔ. Ɔbɔle mbaeɛ hyirele AWURADE. AWURADE tiele ye mbaeɛ ne, na ɔmane ye ɛhe anwo sɛngyerɛnneɛ bie.

²⁵ Nakoso ɛlolɛ bɔ AWURADE lole Hesekia ne, Hesekia amma wanyɛ ye nyeme, ofikyɛ ɔyɛle anwomasoɛ. Yiti AWURADE fɛle Yuda ne Yerusalem so ɛyaa piri.

²⁶ Na afei Hesekia brɛle ye nwo ase nuni ye nwo fili ye anwomasoɛ ne anwo, ɔne Yerusalemfoɛ yeɛ benuni bɛ nwo ɔ. Yiti AWURADE ɛyaa piri bɔ wafɛ ye wɔ bɛ so ne, ɔhwe sale wɔ mmerɛ bɔ né Hesekia te ngoa nu ɔ.

Hesekia anwonya

²⁷ Hesekia nyane ye nwo tam, na onyane animnyam koso. Na osisili sua bɔ bɛfa sɔ nningyein hemɔ besie nu ɔ: ɛdwetɛ, esikaa kɔkorɛ, nyɔboɛ bɔ ye nyɔboɛ yɛ se ɔ, ayirefona, akokyɛm, ɔne nningyein ahoroɔ bɔ bɛ nyɔboɛ yɛ se ɔ.

²⁸ Osa sisili sua bɔ bɛfa sɔ nningyein hemɔ besie nu ɔ: aburoo, nzaa, ngoo, nandwie ahoroɔ bɛ tuin ne mmoaennduin.

²⁹ Afei koso ɔkyekyele nguro bɔ ɔte ye deɛ ɔ, na onyane mmoaen ne nandwie pee, ofikyɛ Nyameɛ mane ye agyapadeɛ pee.

³⁰ Gihon asue kumaa ne, ye sorɔ dɔ ne, Hesekia ye ala yeɛ otuale ye, na ɔkakyili asue ne nye neane aseɛnwo dɔ maa ɔɔfale Dawide kuro berɛ eyia atɔleɛ so. Bɔ Hesekia yɔle biala oyiele ye yé.

³¹ Nakoso mmerɛ bɔ Babilɔn ɛbɔfoɛ mɔ bɛwale beebisale ye dwirɛ bɛfale anwanwadeɛ bɔ wasi wɔ ye maen ne anu anwo ne, Nyameɛ anga mmuayɛɛ bɔ ɔfa ma bɛ ɔ wangyire ye, ofikyɛ né ɔfa oso ye nea onwu bɔ ɔwɔ ye ti anu ɔ amukoraa.

Hesekia wue

³² Afei Hesekia nwo dwirɛ ngaa ne, ye bra bɔ ɔtengyɛ bɔ ɔbɔle ne, bahyerɛ ye wɔ ngɔmhyɛlɛniɛ Yesaya bɔ ye baba ole Amoso ne, ye nyekyire ne anu, wɔ Yuda ne Yisrael ahemvo nwo dwirɛ nwomaa ne anu.

³³ Hesekia toale ye mbanyi mɔ. Besiele ye wɔ pambaa bɔ ɔwɔ Dawide boso ama asieleɛ so ne aso. Yuda amukoraa ne Yerusalemfoɛ amukoraa bɛyɛle ye sɛen kama paa, na ɔwa bienzua Manase lili ye bia.