2 Aberɛso Dwirɛ 30 - AHYERƐLƐ KRONGRON

Hesekia maa besa bedi Abɔtra aluolue

¹ Hesekia maa bɛbɔle ye dawure wɔ Yisrael ne Yuda nu amukoraa, na afei ɔhyerɛle ngrataa ɔɔmane Efraimfoɛ ne Manasefoɛ kyɛ beeyia wɔ AWURADE awuro berɛ wɔ Yerusalem, maa beli Abɔtra aluolue bɛhyɛ AWURADE Yisrael Nyameɛ ne animnyam.

² Ofikyɛ né Nana Hesekia ne ye mbanyi ne Yerusalem badwa amukoraa badwene ye nwo kyɛ bekoli Abɔtra aluolue ne wɔ bosome bɔ ɔtɔ so nyɔ ne anu.

³ (Bangora banni aluolue ne wɔ mmerɛ bɔ ɔsɛ kyɛ bedi ɔ, ofikyɛ né asɔfo nemɔ bɛ nu somaa bennya bɛppetene bɛ nwo, yeɛ afei mmenia ne, né bennya beyyiale wɔ Yerusalem).

⁴ Nana Hesekia ne maen ne amukoraa benwuni kyɛ sɔ nzusuleɛ ne, ɔte paa.

⁵ Yiti bɛhyɛle mmeraa wɔ Yisrael amukoraa, fi Beɛ Hyeba kɔpem Dan, kyɛ ebiala ɔbra ooli Abɔtra aluolue ne ɔhyɛ AWURADE Yisrael Nyameɛ ne animnyam wɔ Yerusalem; ofikyɛ né mmenia bɛmmɔ nu benni Abɔtra ne kyɛbɔ bahyehyɛ bato berɛ wɔ mmeraa nwomaa ne anu ne.

⁶ Yiti Nana Hesekia ne ye mbanyi mɔ ngrataa ne, ɛbɔfoɛ mɔ fa bɛhɔle Yisrael ne Yuda nekaa biala, kyɛbɔ Nana Hesekia fale ahyɛdeɛ mane bɛ ne. Ngrataa ne anu dwirɛ ole kyɛ, “Ao Yisrael maen, ɛ́mɔsa bɛ́bra AWURADE Abraham, Yisake ne Yisrael Nyameɛ ne berɛ, amaa ɔnate so ɛmɔ ngaa bɔ ɛmɔanya bɛ ti badidi nu bafi Asiria ahemvo mɔ sa nu ne, AWURADE wasa waagyina ɛmɔ si.

⁷ Nnɛma ɛmɔyɛ kyɛ ɛmɔ nana mɔ ne ɛmɔ aliɛma mɔ bɔ banni nahorɛ bamma AWURADE bɛ nana mɔ Nyameɛ ne, maa ɔnate so wamma b’ayieleɛ wanyie bɛ yé, kyɛbɔ ɛmɔ nye tua ne.

⁸ Nnɛma ɛmɔyɛ asoserɛ kyɛbɔ ɛmɔ nana mɔ yɛle ne, na mmom ɛ́mɔbrɛ ɛmɔ nwo ase bɛ́ma AWURADE. Ɛmɔbra AWURADE ɛmɔ Nyameɛ nekaa krongron bɔ wate ye nwo afebɔɔ ne anu, ná ɛ́mɔso ye, amaa ɔnate so wayakyi ye yaa piri bɔ wafɛ ye wɔ ɛmɔ so ne.

⁹ Ofikyɛ sɛ ɛmɔsa bɛbadi AWURADE si a, bɛ bɔ bahye ɛmɔ aliɛma ne ɛmɔ mma mɔ nnure ne, bekonwu bɛ anwumvoin bɛkɔyakyi bɛ maa bekosa bɛkɔwa aseɛ ye aso. Ofikyɛ AWURADE ɛmɔ Nyameɛ ne, ɔdo mmenia na ɔse anwumvoin. Sɛ ɛmɔsa bɛba ye berɛ a, ongoli ɛmɔ ngasi.”

¹⁰ Yiti ɛbɔfoɛ nemɔ hyinini Efraim ne Manase nguro amukoraa so bɛhɔle alaa beedwuli Sebulɔn. Nakoso mmenia serele bɛ bɛgorole bɛ nwo.

¹¹ Nakoso Asɛfoɛ, Manasefoɛ ne Sebulɔnfoɛ de, bɛ nu biemɔ yɛle anwobrɛaseɛ bɛhɔle Yerusalem.

¹² Yeɛ Nyameɛ tumi kanyane Yudafoɛ maa b’adwene yɛle ko kyɛ bɛkɔyɔ bɔ Nana Hesekia ne ye mbanyi bagyina AWURADE dwirɛ so bahyɛ ne.

¹³ Bosome bɔ ɔtɔ so nyɔ ne anu, mmenia pee beeyiale nu bɛbɔle dwaa kandinga wɔ Yerusalem kyɛ bɛbaali Paanoo Kabrɛdi aluolue ne.

¹⁴ Afɔleɛ mmokyea bɔ bɛwɔ Yerusalem nemɔ, bɛhyɛle ye bo betutuli bɛ bo, yeɛ ɛyɛɛ afɔleɛ mmokyea nemɔ koso, bɛsesale bɛ mukoraa beegyi beguale Kidron bɔnza ne anu.

¹⁵ Bosome bɔ ɔtɔ so nyɔ ne, ye kyẽa bɔ ɔtɔ so buru ne nna ne aso, behuni Abɔtra boaen ne. Asɔfo nemɔ ne Lewifoɛ nemɔ bɛfɛrele. Yiti bɛpetene bɛ nwo, na bɛfale naen yeralɛ afɔleɛ bɛwale AWURADE awuro berɛ.

¹⁶ Na nekaa bɔ bahyehyɛ bama bɛ wɔ Nyameɛ sona Mose mmeraa ne anu ne, beegyinagyinane berɛ. Asɔfo nemɔ petene mogya bɔ Lewifoɛ nemɔ fa mane bɛ ne.

¹⁷ Ofikyɛ né badwa ne anu mmenia pee bennya bɛppetene bɛ nwo. Yiti né odi kyɛ Lewifoɛ nemɔ beku Abɔtra boaen ne bɛma ebiala bɔ ye nwo ɔnde ɔ, amaa ɔnate so bayɛ krongron bama AWURADE.

¹⁸ Né badwa ne anu mmenia pee bɔ befi Efraim, Manase, Yisaka ne Sebulɔn, bennya bɛppetene bɛ nwo, nakoso belili Abɔtra aleɛ ne wɔ atee bɔ otia ye nwo nhyehyɛleɛ ne aso ɔ. Yiti Hesekia bɔle mbaeɛ mane bɛ kyɛ, “Mesrɛ kyɛ AWURADE bɔ ɔte paa ne,

¹⁹ ebiala bɔ waye ye ahone nu kyɛ ɔkɔso Nyameɛ, AWURADE ye nana mɔ Nyameɛ ne, ɔ́fa ye bɔne ɔ́hyɛ ye, ɔwɔ nu kyɛ wamva nekaa krongron berɛ nhyehyɛleɛ ne aso wambete ye nwo de.”

²⁰ AWURADE tiele Hesekia mbaeɛ ne, na ɔsale mmenia ne anwonyerɛ.

²¹ Yisraelfoɛ bɔ né bɛwɔ Yerusalem ne, bele anigye piri belili Paanoo Kabrɛdi aluolue ne ɛlɛsoo, na Lewifoɛ ne asɔfo nemɔ yele AWURADE ayɛ daa biala. Bɛfale edweintolɛ nningyein bɛyele AWURADE ayɛ.

²² Lewifoɛ bɔ bɛyɔle ɛsɔnenɛ adwuma ne yé ne, Hesekia hyɛle bɛ mukoraa nguraen paa. Yiti mmenia ne belili aluolue aleɛ ne ɛlɛsoo, na bɛbobɔle asomdwee afɔleɛ bɛlale AWURADE bɛ nana mɔ Nyameɛ ne ase.

²³ Afei badwa ne amukoraa bele bɛtole nu kyɛ bekoli aluolue ne ɛlɛsoo bieku. Yiti bele anigye belili aluolue ne ɛlɛsoo bieku.

²⁴ Ofikyɛ Yuda hene Hesekia mane badwa ne nandwie nyii apee ko ne mmoaen apee nzoo kyɛ bɛfa bɛbɔ afɔleɛ, yeɛ maen mbanyi nemɔ mane badwa ne nandwie nyii apee ko ne mmoaen apee buru. Asɔfo nemɔ anu pee bɛpetene bɛ nwo.

²⁵ Yuda badwa ne amukoraa, asɔfo nemɔ ne Lewifoɛ nemɔ, yeɛ mmenia bɔ befi Yisrael bɛwale ne, amanvrafoɛ bɔ befili Yisrael bɛwale ne, yeɛ amanvrafoɛ bɔ bɛte Yuda ne, belili ahurusi.

²⁶ Anigye kandinga wale Yerusalem, ofikyɛ ofi Yisrael hene Dawide awa Solomon aberɛ so, nikyee bɔ ɔte sɔ ɔ, ebie ossili wɔ Yerusalem le.

²⁷ Yeɛ asɔfo nemɔ ne Lewifoɛ nemɔ bedwɔso begyinane berɛ beyirale maen ne. Nyameɛ tiele bɛ mbaeɛ, na bɛ mbaeɛ ne oodwuli ye nekaa krongron bɔ ɔte wɔ nyameɛso ne.