2 Aberɛso Dwirɛ 3 - AHYERƐLƐ KRONGRON

Solomon si asɔneyɛɛ sua ne

¹ Solomon hyɛle ye bo sili AWURADE awuro ne wɔ Moria bokaa ne aso wɔ Yerusalem, wɔ nekaa bɔ AWURADE yele ye nwo hyirele ye baba Dawide ne, wɔ nekaa bɔ Dawide wapena aseɛ wato berɛ wɔ Yebusiniɛ Ɔnan ye nekaa bɔ bɛboro aburoo ne.

² Solomon oolili bia ne, afoɛ bɔ ɔtɔ so nna ne anu, bosome bɔ ɔtɔ so nyɔ ne anu, ye elenyɔ ne aso yeɛ ɔhyɛle sua ne silɛ bo ɔ.

³ Nyameɛ awuro bɔ Solomon sili ne, sɛ esusu a sɔa yeɛ ɔte ɔ: ye tendenn nu te agyirɛ aburasia, kyɛbɔ daa ne né besi besusu nikyee ɔ. Ye tɛtrɛtɛɛ nu te agyirɛ aburanyɔ.

⁴ Awuro n’anyunu dɔ abrannaa ne, ye tendenn nu te agyirɛ aburanyɔ; bɔ ɔla sua ne ngyɛnu ne ye ngyɛnu ne, ofi ye aseɛnwo bɔ ɔkwaadwu ye anwuro ne, ɔte agyirɛ ɛyaa ko aburanyɔ. Ɔfale esikaa kɔkorɛ paa borole ye kunu ne amukoraa.

⁵ Awuro n’akunu dɔ terɛ ne, ɔfale ɛframmire dwirale berɛ, ɔfale esikaa kɔkorɛ paa borole berɛ, na olili ayee ne ngaa adwii guale ye nwo.

⁶ Ɔfale nyɔboɛ bɔ ye nyɔboɛ yɛ se ɔ dwirale terɛ ne anwo mane berɛ yɛle nyemene. Esikaa kɔkorɛ ne, ofi Parawim.

⁷ Awuro ne, ye mbuna, ye aponnwaa, ye terɛ ne ye anoa nemɔ, ɔfale esikaa kɔkorɛ borole bɛ nwo, na olili kɛrubim adwii guale terɛ nemɔ anwo.

⁸ Osili krongron nu krongron ne: ye tendenn nu te agyirɛ aburanyɔ kyɛbɔ awuro ne tɛtrɛtɛɛ ne te ne ala, na ye tɛtrɛtɛɛ nu te agyirɛ aburanyɔ. Ɔfale esikaa kɔkorɛ paa kilo apee aburanyɔ ne nza borole berɛ.

⁹ Esikaa kɔkorɛ mberɛgoo bɔ bɛfa bɛyɔle adwuma ne, nu nonɛ te kilo bue. Ɔfale esikaa kɔkorɛ borole aborɔsaen ne aso pumbu nemɔ anu.

¹⁰ Krongron nu krongron ne anu, olili kɛrubim adwii nyɔ siesiele berɛ, na ɔfale esikaa kɔkorɛ borole bɛ nwo.

¹¹ Kɛrubim nemɔ ndaa nemɔ, bɛtoatoa so a, bɛ tɛtrɛtɛɛ te agyirɛ aburanyɔ: kɛrubo ko ndaa ko te agyirɛ nnu, na ɔtrɛ kɔka sua ne terɛ ne. Ye ndaa ko ne koso, ɔte agyirɛ nnu, na ɔtrɛ kɔka kɛrubo ko ne koso ye ndaa ne anoa.

¹² Na kɛrubo ko ne koso, ye ndaa ko bɔ ye tɛtrɛtɛɛ te agyirɛ nnu ne, ɔtrɛ kɔka sua ne terɛ ne. Na ye ndaa ko ne koso, bɔ ye tɛtrɛtɛɛ te agyirɛ nnu ne, ɔtrɛ kɔka kɛrubo ko ne ye ndaa ne.

¹³ Sɔ kɛrubim nemɔ, bɛ ndaa nemɔ toatoa so a, bɛ tɛtrɛtɛɛ te agyirɛ aburanyɔ. Né begyigyi berɛ bɔ bɛ nye kyire abrannaa ne ɔ.

¹⁴ Na mbɛmuɛ tena ne, Solomon fale ɛtena bibire, koogyan, adaabene ne nwera paa yeɛ ɔyɔle ɔ, na olili kɛrubim adwii guale nu.

Kɔɔbere bonima nyɔ ne

¹⁵ Awuro ne anyunu ne, Solomon sisili bonima nyɔ bɔ ofi ye aseɛnwo bɔ ɔkwaadwu ye anwuro ne, ɔte agyirɛ aburasa ne nnu ɔ. Abotire bɔ ɔlela bonima biala so ne, ofi ye aseɛnwo bɔ ɔkwaadwu ye anwuro ne, ɔte agyirɛ nnu.

¹⁶ Ɔyɔle ngaa bɔ watoatoa nu fa guale bonima nemɔ aso, na olili akengaa adwii ɛyaa ko fa guaguale ngaa nemɔ aso.

¹⁷ Ogyinagyinane bonima nemɔ koso wɔ asɔneyɛɛ sua ne anyunu: ko wɔ famaa so, yeɛ ko wɔ bɛen so. Bɔ ɔwɔ famaa ne, ɔtole ye dumaa Yakin, yeɛ bɔ ɔwɔ bɛen ne, ɔtole ye dumaa Boase.