2 Aberɛso Dwirɛ 29 - AHYERƐLƐ KRONGRON

Hesekia di Yuda so hene

¹ Hesekia lili hene ne, né wali afoɛ aburanyɔ ne nnu, na olili hene afoɛ aburanyɔ ne ngona wɔ Yerusalem. Oni ole Sakaria awa Abiya.

² Ɔyɔle bɔ ɔtengyɛ wɔ AWURADE nyunu ɔ, kyɛbɔ ye Nana Dawide yɔle ne ala.

Hesekia pete asɔneyɛɛ sua ne anwo

³ Hesekia lili hene ne, bosome bɔ oli moa wɔ ye afoɛ bɔ oli moa ne anu ne, obukyebukyele AWURADE awuro berɛ anoa nemɔ yɛle bɛ yé.

⁴ Ɔboaboale asɔfo nemɔ ne Lewifoɛ nemɔ noa wɔ asɔneyɛɛ sua n’aluo berɛ wɔ eyia afiteleɛ so.

⁵ Na osele bɛ kyɛ, “Lewifoɛ, ɛ́mɔtie me! Ɛ́mɔpete ɛmɔ anwo, ɛ́mɔpete AWURADE ɛmɔ nana mɔ Nyameɛ awuro ne anwo, ná ɛ́mɔyeye akyiwadeɛ nningyein ne béfi nekaa krongron berɛ.

⁶ Ofikyɛ yɛ nana mɔ banni nahorɛ bamma AWURADE, yeɛ bayɔ bɔ ɔte bɔne wɔ AWURADE yɛ Nyameɛ nyunu ɔ. Bapo AWURADE, baye bɛ nye bafi nekaa bɔ AWURADE te ne, na bakakyi bɛ si bama ye.

⁷ Afei koso batoto abrannaa nu berɛ anoa nemɔ anu, banuanua nganea nemɔ, na banyera ɛyɛɛ, yeɛ bammɔ naen yeralɛ afɔleɛ wɔ nekaa krongron berɛ bamma Yisrael Nyameɛ.

⁸ Yiti AWURADE afɛ Yuda ne Yerusalem so yaa piri. Na bɔ wamaa wato bɛ ne, wamaa wayɛ ebiala suro ne nwanwa, na wamaa bayɛ ngorohoɛ nikye kyɛbɔ ɛmɔ bɔbɔ ɛmɔ nye tua ne.

⁹ Ɔnate sɔ ti, yɛ nana mɔ totɔle wɔ ngrandɛ noa, yeɛ bahye yɛ mma mmienzua mɔ, yɛ mma mmrasua mɔ ne yɛ ye mɔ nnure.

¹⁰ Afei mayɛ m’adwene kyɛ me ne AWURADE Yisrael Nyameɛ ne kɔyɛ apam, amaa ɔnate so wayakyi ye yaa piri bɔ wafɛ yɛ so ne.

¹¹ Me mma mɔ, nnɛma ɛmɔyɛ ngyɛkyerɛ, ofikyɛ AWURADE aneanea nu waye ɛmɔ kyɛ ɛmɔgyina ye nyunu bɛsɔne ye, na ɛmɔyɛ ye somvoɛ mɔ bɛyera ɛyɛɛ bɛma ye.”

¹² Yeɛ Lewifoɛ hemɔ bedwɔsole ɔ: Mahate bɔ ye baba ole Amasae ne Yowel bɔ ye baba ole Asaria, bɔ bɛte Kohate boso ama mɔ; Merari boso ama mɔ: Kise bɔ ye baba ole Abidi, yeɛ Asaria bɔ ye baba ole Yehalel; Gɛsɔn boso ama mɔ: Yoabo bɔ ye baba ole Sima yeɛ Eden bɔ ye baba ole Yoa;

¹³ Elisafan boso ama mɔ: Simri ne Yeyiɛl; Asafe boso ama mɔ: Sakaria ne Matania;

¹⁴ Heman boso ama mɔ: Yehuel ne Simei; Yedutun boso ama mɔ: Semaya ne Yusiɛl.

¹⁵ Bɛboaboale b’eliɛma nemɔ anoa, bɛpetene bɛ nwo, na kyɛbɔ Nana Hesekia gyinane AWURADE dwirɛ so fale ahyɛdeɛ mane bɛ ne, bewurale AWURADE awuro berɛ kyɛ bɛkwaapete berɛ.

¹⁶ Asɔfo nemɔ bɛhɔle AWURADE awuro ne kunu dɔ paa kyɛ bɛkwaapete ye nwo. Nningyein amukoraa bɔ bɛ nwo nde bɔ benwuni bɛ wɔ asɔneyɛɛ sua ne anu ne, asɔfo nemɔ yeyele beeguale AWURADE awuro ne afia, na Lewifoɛ nemɔ sesale beeguale Kidron bɔnza ne anu.

¹⁷ Bosome bɔ oli moa ne, ye kyẽa bɔ oli moa ne, bɛhyɛle ye bo bɛpetene sua ne anwo, na ɛlɛbɔtwɛ ne aso wɔ bosome ne anu, bedwuli AWURADE abrannaa ne aso. Afei bɛfale ɛlɛbɔtwɛ bɛpetene AWURADE awuro ne anwo. Na bosome bɔ oli moa ne, ye eleburu elesia ne aso, beyiele adwuma ne.

Besa betu asɔneyɛɛ sua ne bewura Nyameɛ sa

¹⁸ Yeɛ Lewifoɛ nemɔ bɛhɔle Nana Hesekia berɛ bɛɛbɔle ye amaneɛ kyɛ, “AWURADE awuro ne, yate ye nwo amukoraa yayie: naen yeralɛ afɔleɛ bokyea ne ɔne ye nwo nningyein amukoraa, ɔne poen bɔ basa paanoo folii wɔ so ne, ɔne ye nwo nningyein.

¹⁹ Mmerɛ bɔ né Nana Ahase odi hene ne, nningyein amukoraa bɔ wanni Nyameɛ dwirɛ so, ná ogyi guale ahameɛ ne, yasiesie bɛ yapete bɛ nwo. Nana, nea, bɛwɔ AWURADE afɔleɛ bokyea ne anyunu.”

²⁰ Yeɛ Nana Hesekia dwɔsole ngyerɛmɔ tutuutu, ɔboale kuro berɛ mbanyi nemɔ anoa, na ɔne bɛ fo hɔle AWURADE awuro berɛ.

²¹ Bɛfale ɛhemɔ yeɛ bɛhɔle ɔ: nandwie nyii nzoo, mmoaen nyii nzoo, mmoaen akrɔngrɔma nzoo; yeɛ afei mbɔngye nyii nzoo bɔ bɛfa bɛbɔ ahennie ne anwo, nekaa krongron ne, ɔne Yuda maen nwo bɔne nwo afɔleɛ ɔ. Ɔfale ahyɛdeɛ mane asɔfo nemɔ, bɔ bɛ yeɛ bɛte Aarɔn boso ama nemɔ, kyɛ bɛfa sɔ ngaka nemɔ bɛbɔ afɔleɛ wɔ AWURADE bokyea ne aso.

²² Yiti behuni nandwie nyii nemɔ, na asɔfo nemɔ lele mogya ne bɛto bɛpetene afɔleɛ bokyea ne anwo. Behuni mmoaen nyii nemɔ, na bɛtole bɛ mogya bɛpetene afɔleɛ bokyea ne anwo. Afei koso behuni mmoaen akrɔngrɔma nemɔ, na bɛtole bɛ mogya ne bɛpetene afɔleɛ bokyea ne anwo.

²³ Na mbɔngye nyii bɔ bɛfa bɛbɔ bɔne nwo afɔleɛ ne, bɛfa bɛwale Nana Hesekia ne maen ne anyunu maa bɛfale bɛ sa beguale bɛ so.

²⁴ Asɔfo nemɔ huhuni bɛ, na bɛfale bɛ mogya bɛbɔle bɔne nwo afɔleɛ wɔ afɔleɛ bokyea ne aso; bɛfa bɛyɛle mbata bɛmane Yisrael amukoraa. Ofikyɛ Nana Hesekia hyɛle kyɛ odi kyɛ bɛbɔ naen yeralɛ afɔleɛ ne bɔne nwo afɔleɛ bɛma Yisrael amukoraa.

²⁵ Ɔmane Lewifoɛ nemɔ bɛtenane AWURADE awuro berɛ bɛbɔle firikyiwa, adengum ne sangoo, kyɛbɔ Dawide ne Nana ye sona bɔ ɔse ase Gade ne ngɔmhyɛlɛniɛ Natan bɛhane ne ala. Ofikyɛ sɔ ahyɛdeɛ ne, AWURADE nate ye ngɔmhyɛlɛfoɛ so yeɛ ɔhyɛle ɔ.

²⁶ Lewifoɛ nemɔ fale Dawide edweintolɛ nningyein nemɔ betiratirale begyinagyinane berɛ, yeɛ asɔfo nemɔ koso betiratirale totorobɛndo begyinagyinane berɛ ɔ.

²⁷ Na Nana Hesekia fale ahyɛdeɛ mane bɛ kyɛ bɛbɔ naen yeralɛ afɔleɛ ne wɔ afɔleɛ bokyea ne aso. Bɛhyɛle naen yeralɛ afɔleɛ ne bɔlɛ ne abo nen, bɛhyɛle ye bo behuli totorobɛndo bɛbɔle Yisrael hene Dawide edweintolɛ nningyein ne bɛtole dwein bɛfa bɛyele AWURADE ayɛ.

²⁸ Badwa ne amukoraa bɛsɔnene AWURADE, edweintolɛfoɛ ne tole dwein, yeɛ totorobɛndohulɛfoɛ nemɔ behuli. Na bɛtoale so alaa kɔpem kyɛ bɛbɔle naen yeralɛ afɔleɛ ne beyiele ɔ.

²⁹ Bɛbɔle afɔleɛ ne beyiele nen, Nana Hesekia ne bɛ bɔ bayia berɛ ne amukoraa bɛbɔle bɛ nu ase bɛsɔnene AWURADE.

³⁰ Nana Hesekia ne ye mbanyi nemɔ, bɛfale ahyɛdeɛ mane Lewifoɛ ne kyɛ, edwein bɔ Dawide ne Asafe bɔ ɔse ase ne bahyehyɛ bato berɛ ne, bɛ́to bɛ́ye AWURADE ayɛ’.” Bele anigye bɛtole ayɛyelɛ dwein, na bɛbɔle bɛ nu ase bɛsɔnene Nyameɛ.

³¹ Afei Hesekia hane kyɛ, “Kekesaala ye de, ɛmɔatu bɛ nwo basie berɛ bama AWURADE. Ɛmɔbra, ná ɛ́mɔfa afɔleɛ mɔ ne asennaa afɔleɛ bɛbra AWURADE awuro.” Yiti badwa ne fale afɔleɛ mɔ ne asennaa afɔleɛ bɛwale, na bɛ bɔ baye bɛ kunu sefaa ne, bɛfale naen yeralɛ afɔleɛ mɔ bɛwale.

³² Naen yeralɛ afɔleɛ bɔ badwa ne fa wale ne, ɔte nandwie nyii aburasoo, mmoaen nyii ɛyaa ko, yeɛ mmoaen akrɔngrɔma ɛyaa nyɔ. Bɛfale sɔ ngaka ne amukoraa bɛbɔle naen yeralɛ afɔleɛ bɛmane AWURADE.

³³ Afɔleɛ krongron bɔ bɛbɔle ne, ɔte nandwie nyii ɛyaa nzia ne mmoaen apee nza.

³⁴ Nakoso ɔnate kyɛ asɔfo nemɔ banzo ne ati, né bɛngora naen yeralɛ afɔleɛ ngaka nemɔ bia. Ɔnate sɔ ne ati, kɔpem kyɛ asɔfo nemɔ ngaa ne bɛpetene bɛ nwo ne, b’eliɛma Lewifoɛ nemɔ ne, bɛbokale kɔpem kyɛ beyiele adwuma ne ɔ. Ofikyɛ né Lewifoɛ nemɔ bɛ nwo te tra asɔfo nemɔ.

³⁵ Sɛ ɛfa naen yeralɛ afɔleɛ pee bɔ bɛbɔle ne to ahameɛ a, né asomdwee afɔleɛ ɛloe ɔne naen yeralɛ afɔleɛ nwo anonneɛ afɔleɛ koso boka so. Yiti AWURADE awuro berɛ sɔnenɛ bɔ bɛyakyili beguale berɛ ne, besa bɛhyɛle ye bo.

³⁶ Na Hesekia ne maen ne amukoraa bɛ nye gyele ɔnate bɔ Nyameɛ wayɔ wama maen ne ati. Ofikyɛ Nyameɛ aboka bɛ maa bayɔ ɛhe amukoraa ndɛndɛ.