2 Aberɛso Dwirɛ 28 - AHYERƐLƐ KRONGRON

Ahase di Yuda so hene

¹ Ahase lili hene ne, né wali afoɛ aburanyɔ, na olili hene afoɛ buru ne nzia wɔ Yerusalem. Wanyɔ bɔ ɔtengyɛ wɔ AWURADE nyunu ɔ. Ye nana Dawide de, ɔyɔle bɔ ɔtengyɛ wɔ AWURADE nyunu ɔ, nakoso ye de wanyɔ sɔ bie.

² Mmom Ahase yɔle bɔ Yisrael ahemvo mɔ bɛyɔle ne bie. Ohurole nikyee fa yɔle Baal mmosoen mɔ.

³ Ɔyerale ɛyɛɛ wɔ Hinom Awa bɔnza ne anu, na ɔfale ye mma mmienzua bɔle afɔleɛ wɔ see nu, kyɛbɔ maen maen mɔ bɔ AWURADE foane bɛ fili Yisraelfoɛ nyunu ne, bɛ musue nningyein bɔ né bɛyɔ ne, ɔte ne ala.

⁴ Ɔbobɔle afɔleɛ yerale ɛyɛɛ wɔ asɔneyɛɛ nemɔ aso, pambaa nemɔ aso, yeɛ bakaa monɛ biala bo.

Siria ne Yisrael di Yuda so ngonim

⁵ Yiti AWURADE bɔ ɔte Ahase ye Nyameɛ ne, ɔfale Ahase wurale Siria hene sa. Siria hene lili ye so ngonim, na ɔhyele ye mmenia nemɔ pee nnure fale bɛ hɔle Damasko. AWURADE sa fale Ahase wurale Yisrael hene sa, na olili ye so ngonim huhuni ye mmenia nemɔ pee paa.

⁶ Remalia awa Peka huhuni mmenia apee ɛyaa ko aburanyɔ, bɔ bɛ mukoraa bɛte koɛhonɛfoɛ ahoneserɛfoɛ ɔ, wɔ Yuda ɛlɛhomapɛ, ofikyɛ né bapo AWURADE bɛ nana mɔ Nyameɛ ne.

⁷ Na Efraimniɛ anwoserɛniɛ bie bɔ bɛfrɛ ye Sikri, ohuni Nana Ahase awa bienzua Maaseya, ahemvie safohene Asrikam ne Ɛlkana bɔ Ahase ɔnne berɛ a, ye yeɛ ɔwɔ berɛ ɔ ne.

Odɛde pepɛ de Yuda

⁸ Yisraelfoɛ bɛhyele b’eliɛma mɔ Yudafoɛ apee ɛyaa nyɔ nnure, bɛ ne bɛ mmrasua, bɛ mma mmienzua ne bɛ mma mmrasua. Besa belele koɛ nu nzesadeɛ pee befili bɛ berɛ bɛfa bɛhɔle Samaria.

⁹ Nakoso né AWURADE ngɔmhyɛlɛniɛ bie bɔ bɛfrɛ ye Odɛde wɔ Samaria. Ooyiale koɛhonɛfoɛ bɔ besa bɛba Samaria ne, na osele bɛ kyɛ, “Ɛ́mɔtie! Ɔnate kyɛ AWURADE ɛmɔ nana mɔ Nyameɛ, ɔfɛle Yuda so yaa ne ati, ɔfale bɛ wurale ɛmɔ sa. Nakoso ɛmɔafɛ yaa hahii bahũhũ bɛ ma ye nwo dwirɛ waadwu nyameɛso.

¹⁰ Afei de, ɛmɔayɛ ɛmɔ adwene kyɛ ɛmɔkɔfa Yudafoɛ ne Yerusalemfoɛ, mmienzua ne mmrasua bɛkɔyɛ nganga. Na ɛmɔ koso, aso ɛmɔyyɔle bɔne bettiale AWURADE ɛmɔ Nyameɛ?

¹¹ Yiti, ɛ́mɔtie me dwirɛ bɔ mekã ye, ná ɛmɔ aliɛma mɔ bɔ ɛmɔahye bɛ nnure ne, ɛ́mɔyakyi bɛ maa besa bɛhɔ, ofikyɛ AWURADE afɛ ɛmɔ so yaa kandinga paa.”

¹² Afei koso, Efraim mbanyi hemɔ: Yohanan awa Asaria, Mesilemote awa Berekia, Salum awa Yehisekia, yeɛ Hadlae awa Amasa, bɛ ne bɛ bɔ befi koɛ noa bɛwale ne banyɛ adwene,

¹³ maa yiti besele bɛ kyɛ, “Nnɛma ɛmɔfa mmenia bɔ ɛmɔahye bɛ nnure ne bɛba wa, ofikyɛ ɛmɔpena kyɛ ɛmɔfa AWURADE nyunu foɛlilɛ bɛfoa yɛ bɔne bɔ yayɔ ne yɛ foɛ bɔ yali ne aso. Ofikyɛ yɛ foɛlilɛ ne, ɔte piri dada, na AWURADE afɛ Yisrael so yaa piri paa.”

¹⁴ Yiti mmenia bɔ bahye bɛ nnure ne, bɛ ne koɛ nu nzesadeɛ ne, koɛhonɛfoɛ nemɔ yakyili bɛ wɔ mbanyi nemɔ ne badwa ne amukoraa bɛ nyunu.

¹⁵ Yeɛ sɔ mmenia nemɔ bɔ babobɔ bɛ dumaa ne, bedwɔsole belele mmenia bɔ bahye bɛ nnure ne, na bɛfale nzesadeɛ ne anu ndaadeɛ ne bie bewurale ebiala bɔ né ye nwo la so ɔ. Bewurale bɛ ndaadeɛ ne mmaboa, bɛmane bɛ aleɛ ne nzue, na bɛtetale bɛ ngena nu ayire. Bɛfale bɛ bɔ bayɛ mmerɛ ne amukoraa bɛtenatenane afunum so, na bɛfale bɛ bɛɛmane b’abusuafoɛ wɔ Yeriko bɔ ɔte ayee kuro ne. Afei besale bɛ si bɛwale Samaria.

Ahase pena mmokalɛ fi Asiria berɛ

¹⁶ Sɔ mmerɛ ne, Nana Ahase tuli ɛbɔfoɛ mɔ maa bɛhɔle Asiria hene berɛ bɛɛsrɛle mmokalɛ.

¹⁷ Ofikyɛ né Edomfoɛ basa bafa koɛ baateta Yuda bali bɛ so ngonim bahye bɛ nnure bahɔ.

¹⁸ Afei koso, né Filistifoɛ baabɔ apaa wɔ aseɛ frɛtɛɛ nguro nemɔ aso ne Yuda ngwaen dɔ. Né bafa Bete Semese, Ayalɔn, Gederote, Soko ne ye nwo nguraa, Timina ne ye nwo nguraa, yeɛ Gyimso ne ye nwo nguraa, na betu bɛɛtenatenane berɛ.

¹⁹ AWURADE brɛle Yuda ase, ɔnate Yisrael hene Ahase ti, ofikyɛ ɔhwehwene ye mmenia maa bɛyɔle bɔne wɔ Yuda, yeɛ ɔyɛle AWURADE so asoserɛ koso.

²⁰ Yiti Asiria hene Tiglate Pilnese hɔle ne, ɔfale koɛ ɔɔtetale Ahase, na mmom wammoka ye.

²¹ Ɔwɔ nu kyɛ Ahase sesale AWURADE awuro berɛ nningyein, ahemvie berɛ nningyein, ɔne ye mbanyi mɔ b’awuro nemɔ anu nningyein, na ɔfa ootuale toɔ mane Asiria hene, nakoso wanya ɛhe anwo mvasoɛ biala.

Ahase wue

²² Mmerɛ bɔ sɔ Nana Ahase ye ala onwu amaneɛ ne po ne, obubuli mmakaa tuale ye so bɔ wandie AWURADE dwirɛ ɔ.

²³ Ofikyɛ Damasko bɔ wali ye Ahase so ngonim ne, Ahase bɔle afɔleɛ mane bɛ mmosoen. Na ɔhane kyɛ, “Ɔnate kyɛ Siria ahemvo bɛ mmosoen mɔ aboka bɛ ne ati, ngɔbɔ afɔleɛ ngɔma bɛ amaa ɔnate so baboka me.” Nakoso ɔnate bɛ so yeɛ AWURADE brɛle ye ne Yisrael amukoraa ase ɔ.

²⁴ Ahase sesale Nyameɛ awuro berɛ nningyein ne, na ɔsɛkyesɛkyele bɛ. Ɔtotole AWURADE awuro berɛ anoa nemɔ anu. Na osisili afɔleɛ bokyea wɔ Yerusalem borɔnoɛ biala so.

²⁵ Yuda kuro biala so, osisili asɔneyɛɛ bɔ bɛyera ɛyɛɛ bɛma nyameɛ foforɛ mɔ ɔ wɔ so, na ɔyɔle sɔ fa wurale AWURADE ye nana mɔ Nyameɛ ne apue.

²⁶ Afei Ahase nwo dwirɛ ngaa ne, bɔ ɔyɔle amukoraa, fi ahyɛaseɛ kɔpem ye ayieleɛ, bahyerɛ ye wɔ Yuda ne Yisrael ahemvo nwo dwirɛ nwomaa ne anu.

²⁷ Ahase toale ye mbanyi mɔ. Besiele ye wɔ Yerusalem kuro ne anu. Nakoso banzie ye wɔ Yisrael mbanyi asieleɛ. Na ɔwa Hesekia lili ye bia.