2 Aberɛso Dwirɛ 26 - AHYERƐLƐ KRONGRON

Yusia di Yuda so hene

¹ Afei Amasia awa Yusia bɔ né wali afoɛ buru ne nzia ne, Yudafoɛ amukoraa bɛfale ye besili ye baba Amasia gya nu maa olili hene.

² Amasia toale ye mbanyi mɔ ne asi ne, Yusia sa kyekyele Elote, na osa fa bokale Yuda maen ne aso.

³ Yusia lili hene ne, né wali afoɛ buru ne nzia, na olili hene afoɛ aburannu ne nyɔ wɔ Yerusalem. Oni ole Yekolia bɔ ofi Yerusalem ne.

⁴ Na Yusia yɔle bɔ ɔtengyɛ wɔ AWURADE nyunu ɔ, kyɛbɔ ye baba Amasia yɔle ne ala.

⁵ Mmerɛ bɔ Sakaria te ngoa nu ne, Yusia sole Nyameɛ. Sakaria hyirehyirele ye kyɛ odi kyɛ ɔfa Nyameɛ surolɛ ɔbɔ ye bra. Na mmerɛ bɔ ɔsole AWURADE ne amukoraa, Nyameɛ maa oyiele ye yé.

⁶ Yusia sili nu ɔɔfale koɛ ɔtoale Filistifoɛ, na obubuli Filistifoɛ nguro hemɔ fasue guaguale ase: Gate, Yabene ne Asedɔde. Na ɔkyekyele nguro wɔ Asedɔde mbɔtam ne Filistifoɛ aseɛ nemɔ aso.

⁷ Nyameɛ gyinane ye si maa olili Filistifoɛ ne Arabofoɛ bɔ bɛtete Gurubal ne aso ngonim, yeɛ olili Meyunitefoɛ koso so ngonim.

⁸ Né Amonfoɛ betua toɔ bɛma Yusia, na ye dumaa trɛle alaa oodwuli Misraim ɛwɛen so, ofikyɛ né ye nwo yɛ se paa.

⁹ Afei koso, Yusia sisili abandenden wɔ Ndweasoɛ Pambim ne aso, Bɔnza nu Pambim ne aso, yeɛ Ndweasoɛ ne aso wɔ Yerusalem, na ɔbrambramone bɛ si.

¹⁰ Osisili abandenden mɔ wɔ ɛserɛ ne aso, na otutuli abura pee, ofikyɛ né ole nyɛmmoa pee wɔ aseɛ frɛtɛɛ ne aseɛ pralaa ne aso. Né osa ole akuafoɛ mɔ ne bɛ bɔ betwi bobe nzaa wɔ mmokaa nemɔ aso ne aseɛ bɔ ɔkye aleɛ nemɔ aso, ofikyɛ né ye nye gye kua nwo.

¹¹ Afei koso, né Yusia le koɛhonɛfoɛ bɔ bɛse ko ɔ apee ko. Sɔ koɛhonɛfoɛ nemɔ, ahyerɛlɛniɛ Yeyiɛl ɔne ahemvie panyi Maaseya bahyerɛ bɛ dumaa kure kure, na Nana Yusia ye safohene ko bɔ bɛfrɛ ye Hanania yeɛ né ɔla bɛ noa ɔ.

¹² Ahoneserɛfoɛ bɔ bɛlela koɛhonɛfoɛ nemɔ noa ne, bɛ somaa, kyɛbɔ begyinane bɛ nana mɔ sasofoɛ so bɛhale bɛ ne, bɛte apee nyɔ ɛyaa nzia.

¹³ Koɛhonɛfoɛ bɔ bewura safohene nemɔ abo ne, bɛ somaa te apee ɛyaa nza ne nzoo ɔne ɛyaa nnu. Bele koɛhonɛ nu anwoserɛ bɔ bɛfa bɛboka Nana Yusia maa ɔko tia ye pɔfoɛ mɔ ɔ.

¹⁴ Yusia fale sɔ nningyein hemɔ mane koɛhonɛfoɛ nemɔ amukoraa: akokyɛm, pealɛɛ, buralɛ kyerɛ, buralɛ ndaadeɛ, agyaen, ɔne taya ngukua.

¹⁵ Ngaen bɔ adwiililɛfoɛ paa paa mɔ bayɔ ne, ɔhyehyɛle bie wɔ Yerusalem. Ɔfale bɛ siesiele abandenden nemɔ aso ne ndweasoɛ nemɔ aso bɔ né bɛfa bɛto agyaen ne nyɔboɛ mbiri ɔ. Ye dumaa trɛle hɔle dedeede, ofikyɛ AWURADE gyinane ye si maa ɔnate so onyane tumi.

Yusia yɛ anwomasoɛ

¹⁶ Nakoso mmerɛ bɔ Yusia nyane tumi ne, ɔyɛle anwomasoɛ, na ɔnate so ye ayieleɛ wanyie ye yé. Ɔyɔle bɔne tiale AWURADE ye Nyameɛ, ofikyɛ ye bɔbɔ ɔhɔle AWURADE asɔneyɛɛ sua ne anu ɔɔyerale ɛyɛɛ wɔ ɛyɛɛ afɔleɛ bokyea ne aso.

¹⁷ Nakoso ɔsɔfo Asaria ɔne asɔfo bɔ bɛ hue yɛ se ɔ aburawɔtwɛ bɛpole Yusia so.

¹⁸ Bɛhã besili Nana Yusia nyunu kyɛ, “Nana, nna wɔ yeɛ odi kyɛ ɛyera ɛyɛɛ ma AWURADE ɔ, na mmom Aarɔn boso ama asɔfo nemɔ bɔ bɛ yeɛ batu bɛ basie berɛ kyɛ bɛbɔ afɔleɛ ne, bɛ yeɛ odi kyɛ bɛyɔ sɔ ɔ. Fi nekaa krongron berɛ fite, ofikyɛ ayɔ bɔne, na ɛhe ngɔma engonya animnyam wɔ AWURADE Nyameɛ nyunu.”

¹⁹ Nakoso Yusia fɛle yaa. Né otira see kulie ne anu bɔ ɔbaayera ɛyɛɛ ɔ, na ɔfɛle asɔfo nemɔ aso yaa nen, kwata anwonyerɛ bie te guale ye nwoma so, wɔ asɔfo nemɔ anyunu berɛ, wɔ ɛyɛɛ afɔleɛ bokyea ne anwo wɔ AWURADE awuro berɛ.

²⁰ Na ɔsɔfo panyi Asaria ne asɔfo nemɔ amukoraa bɛtole bɛ nye bɛneane ye ne, yieee, benwuni kyɛ kwata anwonyerɛ agua ye nwoma so! Bɛhwene ye befili sua ne anu berɛ befitele ndɛndɛ, na ye bɔbɔ koso ɔyɛle ndɛndɛ kyɛ okofi sua ne anu kofite ɔ, ofikyɛ né AWURADE ahwe ye so.

²¹ Kwata anwonyerɛ ne bɔle Nana Yusia toonn maa ɔfa hɔle ewue. Ɔnate anwonyerɛ ne ati, bɛmane ye ngome ɔɔtenane ahameɛ awuro bie anu, na bambene maa wangɔ AWURADE awuro berɛ ko. Ɔwa bienzua Yotam yeɛ ɔneane ahemvie ne aso buli maen ne ɔ.

²² Yeɛ ngɔmhyɛlɛniɛ Yesaya bɔ ye baba ole Amoso ne, ɔhyerɛle Yusia nwo dwirɛ ngaa ne, fi ye bo kɔka ye ayieleɛ.

²³ Yusia toale ye mbanyi mɔ. Besiele ye wɔ nekaa bɔ besiele ye mbanyi mɔ ɔ, wɔ ahemvo asieleɛ so, ofikyɛ bɛhane kyɛ, “Kwata anwonyerɛ ayɛ ye.” Na ɔwa Yotam lili ye bia.