2 Aberɛso Dwirɛ 25 - AHYERƐLƐ KRONGRON

Amasia di Yuda so hene

¹ Amasia lili hene ne, né wali afoɛ aburanyɔ ne nnu, na olili hene afoɛ aburanyɔ ne ngona wɔ Yerusalem. Oni ole Yehoadan bɔ ofi Yerusalem ne.

² Amasia yɔle bɔ ɔtengyɛ wɔ AWURADE nyunu ɔ. Nakoso wanye ye kunu sefaa.

³ Ahennie tumi ne oolili ye sa pɛ, ohuhuni ye mbanyi mɔ bɔ behuni ye baba bɔ né ɔte ɛhene ne.

⁴ Nakoso bɛ mma mɔ de, wangukũ bɛ, kyɛbɔ bahyerɛ ye wɔ mmeraa ne anu wɔ Mose nwomaa ne anu ne. Nu yeɛ AWURADE ahyɛ kyɛ, “Nnɛmaa begyina mmaa mɔ bɛ bɔne so beku awofoɛ, yeɛ nnɛmaa begyina awofoɛ bɛ bɔne so beku mmaa; na mmom ebiala ye bɔne so yeɛ ɔsɛ kyɛ begyina beku ye ɔ.”

Amasia di Edom so ngonim

⁵ Amasia mane Yudafoɛ bɛbɔle dwaa, na ɔboaboale bɛ noa kure kure kyɛbɔ bɛ nana mɔ sasofoɛ te ɔ. Ɔfale safohene mɔ tuatuale Yudafoɛ ne Benyaminfoɛ amukoraa bɛ noa maa bɛlale mmenia apee apee ne ɛyaa ɛyaa bɛ noa. Bɛ bɔ bali ofi afoɛ aburanyɔ bɔ ɔkɔ ne, ɔhale bɛ, na onwuni kyɛ bɛ somaa te koɛhonɛfoɛ apee ɛyaa nza, bɔ baneanea nu baye bɛ bɔ bɛkora bɛkɔ koɛ ɔ, bɔ bɛse pealɛɛ ne akokyɛm nu sɔ ɔ.

⁶ Ɔtele ɛdwetɛ talɛnde ɛyaa ko ɔfa ɔɔbɔle Yisrael koɛhonɛfoɛ apee ɛyaa ko paa kyɛ bɛɛboka ye.

⁷ Nakoso Nyameɛ sona bie hɔle ye berɛ ɔɔhane kyɛ, “Ao, Nana, nnɛma Yisrael koɛhonɛfoɛ mɔ bɛboka wɔ so bɛ ne wɔ kɔ koɛ ne, ofikyɛ AWURADE waye ye sa wafi Yisraelfoɛ bɛ bo, mekyire sɔ Efraimfoɛ hemɔ amukoraa.

⁸ Mmom, wɔ bɔbɔ deinn kɔho wɔ koɛ. Ma wɔ hue yɛ se wɔ koɛ nu. Wanyɔ sɔ a, Nyameɛ kɔmaa ekoli ngoguo wɔ pɔfoɛ ne anyunu. Ofikyɛ Nyameɛ le tumi kyɛ ɔma sona di ngonim anaakyɛ ɔmaa odi ngoguo.”

⁹ Yeɛ Amasia bisale Nyameɛ sona ne kyɛ, “Na ɛdwetɛ talɛnde ɛyaa ko bɔ mafa mama Yisraelfoɛ koɛhonɛfoɛ ne, yɛyɛ ye sɛ?” Nyameɛ sona ne buale ye kyɛ, “AWURADE kɔhora kɔma wɔ bɔ ɔbo sɔ ɔ.”

¹⁰ Yiti koɛhonɛfoɛ bɔ befi Efraim bawa ye berɛ ne, ɔyakyili bɛ ate kyɛ besa bɛhɔ bɛ kuro. Nakoso bɛfɛle Yuda so yaa kandinga, na bele ɛyaa kandinga yeɛ besa bɛhɔle bɛ kuro ɔ.

¹¹ Amasia mane ye hue yɛle se, na olili ye koɛhonɛfoɛ nemɔ anyunu. Ɔhɔle Ngyee Bɔnza ne anu, na ohuhuni Sɛrefoɛ apee buru.

¹² Yudafoɛ sa hyehyele Sɛrefoɛ nemɔ apee buru anyekaenn so. Bɛfale bɛ bɛfo bɛhɔle nyɔbotaen tendenn bie aso. Begyili bɛ befili nyɔbotaen ne ati afia beguale ase maa bɛ mukoraa bɛ nu tetele pasapasa.

¹³ Nakoso koɛhonɛfoɛ bɔ Amasia maa besa bɛhɔle, bɔ wamva bɛ wangɔ koɛ ne bie ne, bɛfale koɛ bɛɛtetale Yuda nguro fi Samaria bɔ ɔkwaadwu Bete Horon. Behuhuni mmenia apee nza wɔ nguro nemɔ anu, na bɛfale koɛ nu nzesadeɛ pee bɛhɔle.

¹⁴ Amasia oohuhuni Edomfoɛ nemɔ bɔ ɔba ne, ɔsesale Sɛrefoɛ bɛ mmosoen mɔ wale, na oogyinagyinane bɛ fa yɛle ye mmosoen. Ɔsɔnene bɛ, na ɔyerale ɛyɛɛ mane bɛ.

¹⁵ Yiti AWURADE fɛle Amasia so yaa, na ɔsomane ngɔmhyɛlɛniɛ wɔ ye berɛ maa oosele ye kyɛ, “Mmenia ye mɔ, bɛ mmosoen bɔ bangora bambepɛ banne bɛ mmenia bamvi wɔ sa nu ne, nzu ati yeɛ aasɔne mmosoen nemɔ ɔ?”

¹⁶ Nakoso ngɔmhyɛlɛniɛ ne noa wɔ so bɔ odwudwo ne, Nana Amasia sele ye kyɛ, “Nwa yeɛ ɔyɛle wɔ Nana ye tufohene ɔ? Ka wɔ noa to nu. Wanyɛ sɔ a, ngohũ wɔ.” Yiti ngɔmhyɛlɛniɛ ne yakyili ngɔm ne hyɛlɛ, nakoso osele kyɛ, “Me de mese kyɛ Nyameɛ pena kyɛ oku wɔ ɔ, ɔnate bɔ ayɔ ɔ, ɔne kyɛ andie me foɛtulɛ ne ati.”

Yisrael di Yuda so ngonim

¹⁷ Yeɛ Yuda hene Amasia ne mmenia bɛdwenedwene ye nwo, na otuli ɛbɔfoɛ maa bɛhɔle Yehu awa Yehoahase ɔwa Nana Yoase bɔ ɔte Yisrael hene ne berɛ kyɛ, “Bra maa yɛfa yɛbɔ so!”

¹⁸ Na Yisrael hene Yoase koso tole ngraa ɔɔmane Yuda hene Amasia kyɛ, “Lebanon ɛfone bie somane maa beesele Lebanon sida bie kyɛ, ‘Fa ɛwa brasua ma mma bienzua ogya ye.’ Nakoso Lebanon kaka aboyaa bie ɔɔpɛle nu berɛ otiatiale ɛfone ne aso.

¹⁹ Ɛnwa, ‘Mali Edom so ngonim amba,’ na ama wɔ ti anu ayɛ wɔ fɛ. Tena wɔ kuro konn. Nzu ati yeɛ ɛtwetwe edwirɛ ba maa ɔnate so ɛne Yuda ɛmɔdi ngoguo ye?”

²⁰ Nakoso Amasia wandɛ ye so. Ofikyɛ né Nyameɛ yeɛ opiapia bɛ ɔ, amaa ɔnate so wafa bɛ wawura pɔfoɛ mɔ sa, ɔnate Edom mmosoen bɔ Yudafoɛ bɛɛsɔnene bɛ ne ati.

²¹ Yiti Yisrael hene Yoase hɔle ɔne Yuda hene Amasia bɛɛfale koɛ bɛtetale so wɔ Yuda kuro Bete Semese.

²² Yisrael lili Yuda so ngonim, na Yudafoɛ amukoraa bɛnwati bɛhɔle b’awuro.

²³ Yuda hene Amasia bɔ ye baba ole Yoase bɔ ye koso ye baba ole Ahasia ne, Yisrael hene Yoase hyele ye nnure wɔ Bete Semese fale ye hɔle Yerusalem. Na Yisrael hene Yoase bubuli Yerusalem fasue ne guale ase, fi Efraim Pambim ne kɔka Ndweasoɛ Pambim ne, bɔ ye tendenn te agyirɛ ɛyaa nna ne.

²⁴ Yoase sesale nningyein hemɔ amukoraa hɔle: esikaa kɔkorɛ amukoraa, ɛdwetɛ amukoraa, ɔne ngukue amukoraa bɔ ɔwɔ Nyameɛ awuro, bɔ Obɛde Edom neane so ne. Afei koso ɔsesale Nana Amasia ahemvie agudeɛ, yeɛ ɔhyele mmenia nnure, na ɔfale bɛ osa hɔle Samaria.

Amasia wue

²⁵ Yisrael hene Yoase bɔ ye baba ole Yehoahase ne, ye wue asi ne, Yuda hene Amasia bɔ ye baba ole Yoase ne, ɔtenane ngoa nu afoɛ buru ne nnu.

²⁶ Afei Amasia nwo dwirɛ ngaa ne, ofi ye ahyɛaseɛ bɔ ɔkwaadwu ye ayieleɛ ne, bahyerɛ ye wɔ Yuda ne Yisrael ahemvo nwo dwirɛ nwomaa ne anu.

²⁷ Ofi mmerɛ bɔ Amasia yakyili AWURADE si lilɛ ne, mmenia bɔle ye nwo porɛ wɔ Yerusalem, na ɔnwati hɔle Lakise. Nakoso bɛsomane maa bɛpole ye so wɔ Lakise beehuni ye wɔ dɔ.

²⁸ Bɛfale ye bɛtole pɔngɔ so besa bɛwale; na besiele ye wɔ ye mbanyi mɔ asieleɛ so wɔ Dawide kuro.