2 Aberɛso Dwirɛ 24 - AHYERƐLƐ KRONGRON

Yoase yɔ AWURADE asɔneyɛɛ sua ne yé

¹ Yoase lili hene ne, né wali afoɛ nzoo. Olili hene afoɛ aburanna wɔ Yerusalem. Oni ole Sibia bɔ ofi Beɛ Hyeba ne.

² Yoase yɔle bɔ ɔtengyɛ wɔ AWURADE nyunu ɔ, mmerɛ bɔ né ɔsɔfo Yehoada te ngoa nu ne.

³ Yehoada gyale mmraa nyɔ mane Yoase, na Yoase ne bɛ wole mmaa mmienzua ne mmaa mmrasua.

⁴ Na nziɛ ye, Yoase yɛle ye adwene kyɛ AWURADE awuro bɔ wasɛkye ne, ɔkɔyɔ ye yé.

⁵ Yiti ɔtole ye sa frɛle asɔfo nemɔ ne Lewifoɛ nemɔ sele bɛ kyɛ, “Ɛmɔhɔ Yuda nguro nemɔ aso, ná ɛmɔ Nyameɛ awuro ne anwo afoɛnoa afoɛnoa nziesie ne, ɛmɔɔdide ye nwo esikaa béfi Yisrael amukoraa bɛ berɛ. Ɛ́mɔnea bɛyɔ ye ndɛ.” Nakoso Lewifoɛ nemɔ banyɔ ye ndɛ.

⁶ Yiti Nana Yoase tole ye sa frɛle ɔsɔfo Yehoada bɔ ɔla bɛ noa ne, na obisale ye kyɛ, “Ɛtoɔ bɔ AWURADE somvoɛ Mose pɛ tole berɛ mane Yisraelfoɛ kyɛ bɛfa bɛyɔ apam ɛtena sua ne anwo adwuma ne, nzu ati yeɛ amma Lewifoɛ mɔ bannide bamvi Yuda ne Yerusalem ne?”

⁷ Né braa busueniɛ Atalia ye boso ama mɔ, baabɔ bawura Nyameɛ awuro berɛ basesa berɛ nningyein, na nningyein bɔ batu basie berɛ bama AWURADE ne po, bafa ye mukoraati basɔne Baal mɔ.

⁸ Yiti Nana Yoase hyɛle maa bɛbobɔle alaka, na bɛfa besiele AWURADE awuro berɛ pambim ne anyunu.

⁹ Bɛfa bɛtole dwaa wɔ Yuda ne Yerusalem amukoraa kyɛ ɛtoɔ bɔ Nyameɛ somvoɛ Mose pɛ mane Yisraelfoɛ wɔ ɛserɛ ne aso dɔ ne, odi kyɛ ebiala batua ma AWURADE.

¹⁰ Maen ne anu mbanyi amukoraa ne maen ne amukoraa bele anigye bɛfale b’ esikaa deɛ beeguale alaka ne anu maa oyili tɛkyɛ.

¹¹ Mmerɛ biala, sɛ Lewifoɛ bɛfa esikaa alaka ne bɛbrɛ Nana Yoase mbanyi mɔ, ná benwu kyɛ esikaa ne wasone wɔ alaka ne anu a, Nana Yoase ahyerɛlɛniɛ ne, ɔne ɔsɔfo panyi ye krakyeniɛ ne, bekohwie befi alaka ne anu. Na besa bɛfa alaka ne bekosie ye boso. Bɛyɔle sɔ daa biala maa ɔnate so bedidele esikaa pee.

¹² Nana Yoase ne Yehoada bɛfale esikaa ne bɛmane bɛ bɔ AWURADE awuro ne anwo adwuma ne wura bɛ sa ne. Na sɔ mmenia nemɔ, bɛbɔle suasilɛfoɛ ne bakaa dwumvoɛ mɔ paa maa bɛyɔle AWURADE awuro ne yé. Besa bɛbɔle bɛ bɔ bɛyɔ buralɛ ne kɔɔbere nwo adwuma nemɔ paa maa bɛyɔle AWURADE awuro ne yé maa onyane anwoserɛ kyɛ ye daa ne.

¹³ Yiti adwumayɔlɛfoɛ bɔ bɛfale bɛ ne, bɛyɔle adwuma paa, na ɔnate bɛ so awuro ne siesielɛ hɔle so paa. Na bɛyɔle Nyameɛ awuro ne yé bemiamiane nu.

¹⁴ Beyiele adwuma nen, bɛfale esikaa ne ngaa ne bɛbrɛle Nana Yoase ne Yehoada, na bɛfa bɛyɔle ɛhemɔ beguale AWURADE awuro ne anu: nningyein bɔ bɛfa bɛsɔne AWURADE, ɔne bɔ bɛfa bɛbɔ naen yeralɛ afɔleɛ, ateɛ mɔ, yeɛ ayaa bɔ bafa esikaa kɔkorɛ bayɔ ne bɔ bafa ɛdwetɛ bayɔ ɔ. Bɛbɔle naen yeralɛ afɔleɛ wɔ AWURADE awuro berɛ daa biala mmerɛ bɔ né Yehoada te ngoa nu ne amukoraa.

Yoase po AWURADE

¹⁵ Yehoada nyini yɛle aworowaa paa, na owuli. Olili afoɛ ɛyaa ko aburasa koraka yeɛ owu ɔ.

¹⁶ Na besiele ye wɔ Dawide kuro wɔ ahemvo asieleɛ, ofikyɛ ɔyɛle nikyee paa wɔ Yisrael mane Nyameɛ ne Nyameɛ awuro ne.

¹⁷ Yehoada wue asi ne, Yuda mbanyi hɔle Nana Yoase berɛ bɛɛkotole ye, na otiele bɛ foɛ bɔ betuli ye ne.

¹⁸ AWURADE bɔ ɔte bɛ nana mɔ Nyameɛ ne, ye awuro ne, bɛyakyili nu sɔnenɛ, na bɛsɔnene Asera dosii mɔ ne mmosoen mɔ. Na sɔ bɔne bɔ Yuda ne Yerusalem bɛyɔle ne ati, AWURADE fɛle bɛ so yaa piri.

¹⁹ Nakoso AWURADE somane ngɔmhyɛlɛfoɛ maa besele bɛ kyɛ besa bɛbra ye berɛ. Bɛbɔle Yudafoɛ kɔkɔ, nakoso bandɛ so.

²⁰ Yeɛ Nyameɛ sunzum wale ɔsɔfo Yehoada awa Sakaria so, na ogyinane mmenia ne nyunu wɔ nekaa bɔ ebiala nwu ye ɔ, na osele bɛ kyɛ, “Nyameɛ nwa nyoo, ‘Nzu ati yeɛ ɛmɔabu AWURADE mmeraa dwirɛ so maa ɔnate so onyie ɛmɔ yé ye? Ɔnate kyɛ ɛmɔapo AWURADE ne ati, ye koso wapo ɛmɔ.’ ”

²¹ Nakoso bɛbɔle Sakaria nwo porɛ, na Nana Yoase hyɛle maa bɛborole ye nyɔboɛ behuni ye wɔ AWURADE awuro ne aluo berɛ.

²² Nana Yoase wangaye paa bɔ Sakaria baba Yehoada ɔyɔ mane ye ne, na mmom ohuni ɔwa ne. Mmerɛ bɔ beku Sakaria ne, ɔteane nu kyɛ, “AWURADE ɔ́nea bɔ ɛmɔyɔ ye, ná otua ɛmɔ so kerɛ!”

²³ Sɔ afoɛ ne ayieleɛ, Siria koɛhonɛfoɛ bɛfale koɛ bɛɛtoale Yoase. Bɛhɔle Yuda ne Yerusalem beehuhuni mmenia nemɔ bɛ nu atitirefoɛ nemɔ amukoraa. Na bɛfale koɛ nu nzesadeɛ bɔ benyane ye ne amukoraa bɛɛmane Damasko hene.

²⁴ Ɔwɔ nu kyɛ né Siria koɛhonɛfoɛ nemɔ banzo de, nakoso AWURADE fale Yuda koɛhonɛfoɛ ɛlɔen kandinga ne wurale bɛ sa, ofikyɛ Yudafoɛ pole AWURADE bɔ ɔte bɛ nana mɔ Nyameɛ ne. Ye sɔ ne ati, Siriafoɛ lili Yoase so ngonim.

²⁵ Siriafoɛ nemɔ purale ye paa. Na Siriafoɛ nemɔ besa bɛhɔle ne, ye somvoɛ mɔ bɔle ye nwo porɛ, ɔnate ɔsɔfo Yehoada ɔwa ne mogya bɔ ɔhã guale ne ati. Na behuni ye wɔ ye bɔbɔ ye bɛen so. Yiti Yoase wuli. Besiele ye wɔ Dawide kuro, nakoso banzie ye wɔ ahemvo mɔ b’asieleɛ ne aso.

²⁶ Bɛ bɔ bɛbɔle ye nwo porɛ ne, bɛ ole Amonniɛ Simeate ɔwa Sabade, ɔne Moaboniɛ Simirite ɔwa Yehosabade.

²⁷ Yoase mma mmienzua mɔ nwo dwirɛ, ngɔm pee bɔ bɛhyɛle betiale ye, ɔne Nyameɛ awuro bɔ osa yɛle ye yé ne, bahyerɛ ye wɔ ahemvo nwo dwirɛ nu ngyirekyiremuɛ nwomaa ne anu. Na ɔwa bienzua Amasia lili ye bia.