2 Aberɛso Dwirɛ 21 - AHYERƐLƐ KRONGRON

¹ Yehosafate toale ye mbanyi mɔ. Besiele ye wɔ nekaa bɔ besiele ye mbanyi mɔ ɔ, wɔ Dawide kuro, na ɔwa Yehoram lili ye bia.

Yehoram di hene wɔ Yuda

² Né Yehoram le aliɛmaa mmienzua bɔ bɛte Yehosafate mma mɔ ɔ. Bɛ ole Asaria, Yehiel, Sakaria, Asariahu, Mikayɛl ne Sefatia. Bɛ mukoraa bɛte Yuda hene Yehosafate mma mmienzua.

³ Bɛ baba mane bɛ akyɛdeɛ pee bɔ ɔte ɛdwetɛ, esikaa kɔkorɛ, ɔne nningyein bɔ ye nyɔboɛ yɛ se ɔ, yeɛ Yuda nguro bɔ bato bɛ nwo fasue ɔ. Nakoso ahennie ne de, ɔfa mane Yehoram, ofikyɛ ye yeɛ ɔte bamuɛbaa ɔ.

⁴ Yehoram lili ye baba bia, ná ye ahennie bo timuni ne, ɔfale ngrandɛ huhuni oliɛma nemɔ amukoraa, yeɛ Yisrael mbanyi nemɔ bie.

⁵ Yehoram lili hene ne, né wali afoɛ aburasa ne nyɔ. Na olili hene afoɛ mmɔtwɛ wɔ Yerusalem.

⁶ Bɔne bɔ Yisrael ahemvo bɛyɔle ne, ye koso ɔyɔle bie, kyɛbɔ Ahabo boso ama bɛyɔle ne ala, ofikyɛ ogyale Ahabo awa brasua. Ɔyɔle bɔ ɔte bɔne wɔ AWURADE nyunu ɔ.

⁷ Nakoso ɔnate kyɛ AWURADE ne Dawide bayɛ apam ne ati, AWURADE wanne ahennie ne wamvi Dawide awuro ama bɛ sa nu, ofikyɛ né wahyɛ Dawide bɔ kyɛ ɔkɔmaa ɔne ye boso ama bekonya koliagyaa bɔ ɔkɔtena ye bia so ɔ afebɔɔ.

Edom yɛ lɔen

⁸ Yehoram aberɛ so, Edomfoɛ yɛle Yuda nwo lɔen, na Edomfoɛ sili bɛ bɔbɔ bɛ hene.

⁹ Yiti Yehoram ne ye safohene mɔ ne ye teaseɛnam amukoraa besili nu bɛfale koɛ bɛɛtoale Edom. Edom koɛhonɛfoɛ pɛle Yehoram ne ye teaseɛnam safohene mɔ nwo beyiale, nakoso odwɔsole kɔngɔen ɔfale koɛ ɔɔtoale Edomfoɛ.

¹⁰ Ɔnate sɔ ne ati, Edom ayɛ Yuda nwo lɔen maa waadwu ɛnɛ. Sɔ mmerɛ ne, Libina koso yɛle Yehoram ahennie ne anwo lɔen, ofikyɛ Yehoram pole AWURADE ye nana mɔ Nyameɛ ne.

Elia kyerɛ krataa

¹¹ Afei koso, Yehoram sisili asɔneyɛɛ wɔ Yuda mmokaa aseɛ ne aso, na ɔhwehwene Yerusalemfoɛ hɔle mmosoensolɛ nu, na ɔmane Yuda lili Nyameɛ dwirɛ nwo makyebu.

¹² Yeɛ ngɔmhyɛlɛniɛ Elia hyerɛle krataa ɔɔmane Yehoram kyɛ, “AWURADE wɔ nana Dawide Nyameɛ nwa, ‘Ɔnate kyɛ amva atee bɔ wɔ baba Yehosafate fale so ne bie, anaa atee bɔ Yuda hene Asa fale so ne bie,

¹³ na mmom afa Yisrael ahemvo mɔ b’atee so, ná ahwehwe Yuda ne Yerusalemfoɛ ahɔ mmosoensolɛ nu, kyɛbɔ Ahabo abusuafoɛ hwehwene Yisrael hɔle mmosoensolɛ nu ne, ná afei ɔnate kyɛ ahũhũ eliɛma mɔ ɔne wɔ baba abusuafoɛ bɔ bɛte titire bɛtra wɔ ne ati,

¹⁴ tie, AWURADE kɔma ɛhawo kandinga kɔwa wɔ maen, wɔ mma mɔ, ɛye mɔ, ɔne w’agyapadeɛ amukoraa so.

¹⁵ Na wɔ bɔbɔ deinn koso, koɛ anwonyerɛ kandinga kɔtɔ wɔ so, kɔpem kyɛ anwonyerɛ ne kɔma wɔ nyaa kɔhɔ so koturu daa biala ɔ.’ ”

¹⁶ AWURADE kanyane Filistifoɛ ne Arabofoɛ bɔ bɛte bepingye Kusefoɛ ne maa bedwɔso betiale Yehoram.

¹⁷ Bɛfale koɛ bɛɛtoale Yuda, bebuli ye fasue mɔ, na ahemvie berɛ nningyein biala bɔ bɛ sa tɔle so ne, bɛsesale bɛbokale Yehoram mma mmienzua ne ɔye mɔ so bɛhɔle. Yiti ɔwa bienzua biala wanga, sana Yehoahase bɔ ɔte bɛ nu kãa paa ne angome.

Anwonyerɛ bɔ Yehoram maa owu

¹⁸ Ɛhe amukoraa asi ne, AWURADE tele koɛ anwonyerɛ koangɔ tole Yehoram so.

¹⁹ Na mmerɛ kãa pɛle nu, odwuli afoɛ nyɔ ne, anwonyerɛ ne mane ye nyaa turuli, na owuli ewue yealɛ paa. Na buruburugya bɔ maen ne sɔle bɛfa bɛhyɛle ye nana mɔ animnyam wɔ bɛ sɛenyɛlɛ nu ne, ye de banzɔ bie bamma ye.

²⁰ Olili hene ne, né wali afoɛ aburasa ne nyɔ, na ɔtenane bia so afoɛ mmɔtwɛ wɔ Yerusalem. Na ye wue ne, wanyɛ ebiala yea. Besiele ye wɔ Dawide kuro, nakoso banzie ye wɔ ahemvo asieleɛ so.