2 Aberɛso Dwirɛ 2 - AHYERƐLƐ KRONGRON

Solomon boaboa ye nwo si asɔneyɛɛ sua ne

¹ Solomon yɛle ye adwene kyɛ okosi asɔneyɛɛ sua kɔfa AWURADE dumaa kɔto so, yeɛ okosi ye bɔbɔ ye ahemvie koso.

² Solomon hyɛle mmenia maa bɛyɔle adwuma bɛmane ye wɔ mmokaa aseɛ ne aso. Bɛte mmenia apee aburasoo bɔ bɛsoasoa nningyein ɔ, nyɔboɛdwalɛfoɛ apee aburawɔtwɛ, yeɛ mmenia apee nza ɛyaa nzia bɔ bɛnea adwumayɔlɛfoɛ nemɔ aso ɔ.

Solomon ne Huram bɛyɛ apam

³ Solomon tole Tiro hene Huram ngraa kyɛ, “Mmerɛ bɔ me baba Dawide osi ye ahemvie ne, ɛbrɛle ye sida.

⁴ Mepena kyɛ mesi awuro mefa AWURADE me Nyameɛ dumaa meto so, ná metu mesie berɛ mema ye maa bɛyera ɛyɛɛ fona wɔ ye nyunu, ná bɛbɔ daadaa paanoo folii afɔleɛ ne, ngyerɛmɔ ne nɔsoa naen yeralɛ afɔleɛ wɔ afofikyẽa ne ɛsraen foforɛ ɔne AWURADE yɛ Nyameɛ aluolue bɔ wahyehyɛ wato berɛ ne, kyɛbɔ wahyehyɛ wato berɛ wama Yisrael afebɔɔ ne.

⁵ Awuro bɔ mepena kyɛ mesi ne, ɔte piri, ofikyɛ yɛ Nyameɛ ne, ɔte piri tra nyameɛ ngaa nemɔ.

⁶ Na nwa koraa yeɛ ɔkɔhora kosi sua kɔma ye ɔ, ofikyɛ nyameɛso anwuro anwuro dɔ po ne, berɛ te kãa ma ye. Me ole nwa bɔ odi kyɛ mesi sua mema ye ɔ, sana nekaa bɔ bɛkɔbɔ afɔleɛ wɔ ye nyunu ɔ?

⁷ Yiti kekesaala ye, ma me sona bɔ ɔkora fa esikaa kɔkorɛ, ɛdwetɛ, kɔɔbere, buralɛ, koogyan, adaabene ne bibire di adwii, na afei ɔkora kolikoli nningyein so ɔ. Adwiililɛfoɛ bɔ me baba Dawide penane bɛ siele berɛ bɔ me ne bɛ wɔ Yuda ne Yerusalem ne, sɔ sona ne kɔɔboka bɛ so.

⁸ Afei fa sida ne ɛframmire ne ɛwalɛ fi Lebanon berɛ me, ofikyɛ mese kyɛ wɔ somvoɛ mɔ bɛse Lebanon mmakaa pakye paa. Me somvoɛ mɔ ne wɔ somvoɛ mɔ bɛkɔbɔ nu bɛkɔyɔ adwuma,

⁹ ná bapakye mmakaa ne somaa paa babrɛ me, ofikyɛ sua bɔ mebaasi ne, ɔte piri, yeɛ ɔyɛ nyemene koso.

¹⁰ Wɔ somvoɛ mɔ bɔ bɛpakye mmakaa ne, ngɔma bɛ atokoɔ olonka apee aburanyɔ, ayuo olonka apee aburanyɔ, nzaa galɔn apee ɛyaa nyɔ, yeɛ ngoo galɔn apee ɛyaa nyɔ.”

¹¹ Yeɛ Tiro hene Hiram hyerɛle krataa fale mmuayɛɛ ɔɔmane Solomon kyɛ, “Ɔnate kyɛ AWURADE kuro ye maen dwirɛ ne ati, wama aali bɛ so hene.”

¹² Huram toale so sele kyɛ, “AWURADE Yisrael Nyameɛ bɔ ɔbɔle anwuro ne aseɛ ne, animnyam hã ye. Ye yeɛ waye baa nworɛniɛ bɔ ole adwene ne ndeaseɛ wama Nana Dawide kyɛ osi asɔneyɛɛ sua ma AWURADE, ná osi ahemvie ɔtena nu ɔ.

¹³ Matu Huram Abi, bɔ ɔse adwii di paa ná ole nimdeɛ, kyɛ ɔbra.

¹⁴ Oni fi Dan abusua kure nu, yeɛ ɔse te Tironiɛ. Ɔkora fa esikaa kɔkorɛ, ɛdwetɛ, kɔɔbere, buralɛ, nyɔboɛ, bakaa, koogyan, adaabene ne nwera di adwii. Ɔkora kolikoli nikyee biala so fa di adwii nyemene biala bɔ ekohyire ye ɔ. Ɔne wɔ somvoɛ nemɔ, ɔne me ne wɔ baba Dawide somvoɛ nemɔ bɛkɔyɔ adwuma ne.

¹⁵ Me mene, atokoɔ, ayuo, ngoo ne nzaa bɔ ɛhane ye nwo dwirɛ ne, fa brɛ wɔ somvoɛ mɔ.

¹⁶ Mmakaa biala bɔ ehia ne, yɛkɔpakye yɛkofi Lebanon yɛkogua ɛpo so yɛkɔbrɛ wɔ wɔ Yopa, ná wɔ koso asesa ahɔ Yerusalem.”

Bɛhyɛ asɔneyɛɛ sua ne silɛ bo

¹⁷ Yiti kyɛbɔ Solomon baba Dawide maa bɛhale mmenia mmerɛ bie ne, ɛwɔfoɛ mɔ bɔ bɛtete Yisrael aseɛ so ne, Solomon ma bɛhale bɛ mukoraa, na onwuni kyɛ bɛ somaa te apee ɛyaa ko aburannu ne nza, ɛyaa nzia.

¹⁸ Ɔyele bɛ nu apee aburasoo kyɛ bɛsoasoa nningyein, apee aburawɔtwɛ kyɛ bedwa nyɔboɛ wɔ mmokaa aseɛ ne aso, yeɛ apee nza ɛyaa nzia kyɛ bɛnea adwumayɔlɛfoɛ nemɔ aso maa bɛyɔ adwuma.