2 Aberɛso Dwirɛ 19 - AHYERƐLƐ KRONGRON

Ngɔmhyɛlɛniɛ Yehu kã Yehosafate nyunu

¹ Yuda hene Yehosafate sa oodwuli ye awuro wɔ Yerusalem asomdwee nu.

² Na Hanani awa Yehu bɔ ɔte sona bɔ ɔse ase ne, ɔhɔ ooyiale Nana Yehosafate, na Yehu bisale ye kyɛ, “Aso odi kyɛ ɛboka amumuyɛɛniɛ, ná bɛ bɔ bekyi AWURADE ne, ɛne bɛ tu nu anaa? Ɔnate ye sɔ ti, AWURADE yaafɛlɛ piri awa wɔ so.

³ Nakoso banwu paa kãa wɔ wɔ nu, ofikyɛ etutuli bosoen Asera dosii bo fili aseɛ ne aso, ná asi w’adwene pi kyɛ ɛkɔpena Nyameɛ si atee.”

Yehosafate toto nningyein yé

⁴ Né Yehosafate te Yerusalem. Nakoso ohyinini mmenia ne aso fi Beɛ Hyeba kodwu Efraim mmokaa aseɛ ne aso, na ɔhwene b’adwene siele AWURADE bɛ nana mɔ Nyameɛ ne aso.

⁵ Na ɔyeyele maenbulɛfoɛ wɔ maen ne anu maa bɛneane nguro bɔ bato bɛ nwo fasue nemɔ amukoraa so ngoko ngoko.

⁶ Osele maenbulɛfoɛ nemɔ kyɛ, “Ɛ́mɔkaye kyɛ adwuma bɔ ɛmɔyɔ ye, ɛmɔnyɔ bɛmva bɛnzɔ sona nye, na mmom ɛmɔfa bɛsɔ AWURADE nye. Ogyi ɛmɔ si wɔ maenbulɛ adwuma ne anu.

⁷ Afei, ɛ́mɔsuro AWURADE na ɛ́mɔbua ndɛen turoloo, ofikyɛ AWURADE yɛ Nyameɛ onguro ndɛengyea, mmenia nu nyeyemuɛ anaa fea-ase-ma lelɛ.”

⁸ Afei koso, Yehosafate yeyele Lewifoɛ biemɔ ne asɔfo biemɔ ne Yisrael abusua mbanyi biemɔ wɔ Yerusalem, kyɛ begyina AWURADE dwirɛ so bebu maen ne, ná beli dwirɛ. Né bɛte Yerusalem.

⁹ Ɔfale ahyɛdeɛ mane bɛ kyɛ, “Odi kyɛ ɛmɔtu bɛ nwo besie berɛ, ná ɛ́mɔfa nahorɛlilɛ ne AWURADE nwo suronyi bɛyɔ ɛmɔ adwuma ne.

¹⁰ Ɛmɔ aliɛma mɔ bɔ bɛtete bɛ nguro nemɔ aso ne, sɛ bɛ nu biala fa edwirɛ ba ɛmɔ nyunu bɔ ɔfa awuelilɛ nwo, mmeraa anaa mmeraa dwirɛ, ahyɛdeɛ anaa nhyehyɛleɛ nwo a, odi kyɛ ɛmɔkyirekyire bɛ, amaa ɔnate so banni fɔ wɔ AWURADE nyunu maa ye yaafɛlɛ piri wamma ɛmɔ ne ɛmɔ aliɛma mɔ so. Ɛ́mɔyɔ sɔ, amaa ɛmɔanni fɔ.

¹¹ Ɛ́mɔtie, edwirɛ amukoraa bɔ ɔfa AWURADE mmeraa nwo ne, ɔsɔfo panyi Amaria yeɛ ɔkɔnea ɛmɔ so ɔ. Yismael awa Sebadia, bɔ ɔte Yuda awuro ama so amrado ne yeɛ ɔkɔnea ahemvie ndotoleɛ amukoraa so ɔ, na Lewifoɛ yeɛ bɛkɔboka ɛmɔ maa ɛmɔkoli dwirɛ ɔ. Ɛ́mɔma ɛmɔ hue yɛ se, na bɛ bɔ bɛyɔ bɔ ɔte paa ne, mesrɛ kyɛ AWURADE ogyina bɛ si!”