2 Aberɛso Dwirɛ 18 - AHYERƐLƐ KRONGRON

Mikaya hyɛ Ahabo nwo ngɔm

¹ Afei Yehosafate nyane ye nwo tam, na onyane animnyam, na ɔne Ahabo bɛyɛle agyaa apam maa ɔwa gyale ɔwa.

² Na ye si ye bɔ afoɛ biemɔ pɛle nu ne, Yehosafate ɔɔpasale Ahabo nwo wɔ Samaria. Ahabo huni mmoaen pee ne nandwie pee fa sole Yehosafate ne ye mmenia bɔ bɛboka ye so nemɔ wɔfoɛ. Na ɔto guale Yehosafate so anu kyɛ ɔma bɛɛfa koɛ bɛtoa Ramote Gileade.

³ Yisrael hene Ahabo bisale Yuda hene Yehosafate kyɛ, “Ɛkɔboka me maa yɛkɔfa koɛ yɛkɔɔtoa Ramote Gileade anaa?” Obuale ye kyɛ, “Ngyi wɔ si. Me koɛhonɛfoɛ te wɔ koɛhonɛfoɛ. Yɛkɔɔboka ɛmɔ wɔ koɛ ne anu.”

⁴ Nakoso Yehosafate sa sele Yisrael hene kyɛ, “Di moa fa to AWURADE nyunu tie ye noa dwirɛ koraka.”

⁵ Yiti Yisrael hene boaboale ngɔmhyɛlɛfoɛ nemɔ bɛ noa. Bɛ somaa te ɛyaa nna. Na obisale bɛ kyɛ, “Yɛfa koɛ yɛɛtoa Ramote Gileade, anaa nyakyi?” Bebuale kyɛ, “Nana, kɔ, ofikyɛ Nyameɛ kɔfa kuro ne kowura wɔ sa.”

⁶ Nakoso Yehosafate bisale kyɛ, “Aso AWURADE ngɔmhyɛlɛniɛ biala nne maen ye anu ko bɔ yɛkɔhora yɛkobisa ye AWURADE noa dwirɛ ɔ?”

⁷ Yeɛ Yisrael hene buale Yehosafate kyɛ, “Waha ko bɔ yɛkɔhora yɛkobisa ye AWURADE noa dwirɛ ɔ. Ye ole Yimila awa Mikaya. Nakoso mekyi ye kɔkɔkɔkɔ, ofikyɛ ɔnhyɛ ngɔm paa biala mva me nwo; sana musue nwo ngɔm ala.” Na Yehosafate sele kyɛ, “Nana, nnɛkã ye sɔ.”

⁸ Yeɛ Yisrael hene frɛle ahemvie panyi ko, na ɔsomane ye kyɛ, “Kɔfrɛ Yimila awa Mikaya brɛ me kekesaala ye.”

⁹ Sɔ mmerɛ ne, né Yisrael hene ne Yuda hene Yehosafate bɛtete b’ahennie bia so bɔ baherahera b’ahemvo ndena, wɔ nekaa bɔ bɛboro aburoo wɔ Samaria pambim ne anyunu berɛ ɔ. Né ngɔmhyɛlɛfoɛ ne amukoraa bɛhyehyɛ ngɔm wɔ ahemvo nemɔ anyunu berɛ.

¹⁰ Bɛ nu ko bɔ ye ole Kenaana awa Sedekia ne, ɔyɔle buralɛ mmɛen mɔ fale, na ɔhane kyɛ, “AWURADE nwa, ‘Mmɛen hemɔ yeɛ ɛkɔfa kɔpemo Siriafoɛ maa okoodwu kyɛ ekohũhũ bɛ ɔ.’ ”

¹¹ Ngɔmhyɛlɛfoɛ ne amukoraa bɛ noa dwirɛ yɛle ko. Na né bɛkã kyɛ, “Kɔ Ramote Gileade na koli ngonim. Nana, AWURADE kɔfa kuro ne kowura wɔ sa.”

¹² Ɛbɔfoɛ bɔ betuli ye kyɛ ɔɔfa Mikaya bra ne, osele Mikaya kyɛ, “Tie, ngɔmhyɛlɛfoɛ nemɔ bɛ noa dwirɛ te ko. Bahã ngonimlilɛ nwo dwirɛ bahyire Nana Ahabo. Wɔ koso fa to bɛ deɛ ne aso, na kã ngonimlilɛ nwo dwirɛ kyire ye.”

¹³ Nakoso Mikaya buale kyɛ, “Kyɛ AWURADE te ase ye de, edwirɛ bɔ me Nyameɛ kɔhã ne, ye ala yeɛ ngɔhã ɔ.”

¹⁴ Oodwuli Nana Ahabo berɛ ne, Nana Ahabo bisale ye kyɛ, “Mikaya, yɛhɔ yɛɛho yɛle Ramote Gileade anaakyɛ nyakyi?” Mikaya buale kyɛ, “Aaah, nzaade kɔ na koli ngonim. Nana, AWURADE kɔfa bɛ kowura wɔ sa.”

¹⁵ Nakoso Nana Ahabo bisale Mikaya kyɛ, “Nea, pɛen nyɛɛ yeɛ odi kyɛ memaa ɛta ndaen kyɛ AWURADE dumaa nu edwirɛ nahorɛ ngome yeɛ ɛkɔhã kohyire me ɔ?”

¹⁶ Yeɛ Mikaya sele kyɛ, “Nwuni kyɛ Yisrael amukoraa babɔ aya wɔ mmokaa nemɔ aso kyɛ mmoaen bɔ belle neafoɛ ɔ; na AWURADE hane kyɛ, ‘Mmenia hemɔ, belle meneɛ. Ma ebiala ɔhɔ ye awuro asomdwee nu.’ ”

¹⁷ Yeɛ Yisrael hene sele Yehosafate kyɛ, “Aaah, mangã mangyire wɔ kyɛ ɔngɔhyɛ ngɔm paa biala ngɔfa me nwo; sana musue nwo ngɔm ala?”

¹⁸ Yeɛ Mikaya sele kyɛ, “Nzaade tie AWURADE noa dwirɛ ee: Nwuni kyɛ AWURADE te ye ahennie bia so bɔ nyameɛso koɛhonɛfoɛ amukoraa begyigyi ye bɛen ne ye famaa ɔ.

¹⁹ Na AWURADE bisale kyɛ, ‘Nwa yeɛ ɔkɔlakalaka Yisrael hene Ahabo, maa ɔkɔɔho kɔtɔ wɔ Ramote Gileade ɔ?’ Yeɛ bɛ nu biala hyirele ye adwene,

²⁰ kɔpem kyɛ sunzum ko oogyinane AWURADE nyunu hane kyɛ, ‘Me yeɛ ngɔlakalaka ye ɔ.’ Na AWURADE bisale ye kyɛ, Ɛyɛ sɛɛ né alakalaka ye?’

²¹ Na obuale kyɛ, ‘Ngɔɔyɛ anoanu sunzum wɔ ye ngɔmhyɛlɛfoɛ ne amukoraa bɛ noa nu maa bɛkɔhyɛ ngɔndorɔ.’ Yeɛ AWURADE sele kyɛ, ‘Kɔ ná kɔlakalaka ye, na wɔ sa kɔhã ye; kɔ ná kɔyɔ ye sɔ ala.’

²² Yiti Nana Ahabo tie, AWURADE afa anoanu sunzum wawura wɔ ngɔmhyɛlɛfoɛ hemɔ bɛ noa nu, na amaneɛ kandinga paa yeɛ AWURADE wahyehyɛ wato berɛ wama wɔ ɔ.”

²³ Yeɛ Kenaana awa Sedekia ɔwale Mikaya nwo berɛ ɔɔbɔle ye so anu, na obisale kyɛ, “Aso AWURADE Sunzum kosa me nwo kodwudwo kohyire wɔ?”

²⁴ Na Mikaya buale kyɛ, “Kyẽa bɔ ɛkɔnwati kɔɔfea pumbu nu ne yeɛ ekonwu ye ɔ.”

²⁵ Na Yisrael hene Ahabo hyɛle kyɛ, “Ɛmɔhye Mikaya, ná ɛmɔsa bɛfa ye bɛɛma kuro wa amrado Amon ɔne mma Yoase.

²⁶ Na kã kyire bɛ kyɛ, ‘Nana nwa nyoo: Ɛ́mɔfa akoaa he bɛto kuku nu, ná ɛmɔte ye aleɛ ne ye nzue so, kɔpem kyɛ ngofi koɛ ye noa ngosa ngɔwa asomdwee nu ɔ.’ ”

²⁷ Yeɛ Mikaya sele kyɛ, “Sɛ efi koɛ ne noa esa ba asomdwee nu a, ye de nna AWURADE yeɛ wafa me so wadwudwo ɔ.” Na ɔtoale so sele kyɛ, “Ɛmɔ amukoraa, ɛ́mɔfa bɛ́sã terɛ nwo!”

Ahabo wue

²⁸ Yisrael hene ne Yuda hene Yehosafate besili nu bɛhɔle Ramote Gileade.

²⁹ Yisrael hene sele Yehosafate kyɛ, “Ngɔsakyera me nwo ngɔhɔ koɛ ne anoa. Nakoso wɔ de, wurawura wɔ ahemvo ndaadeɛ mɔ.” Yiti Yisrael hene sakyerale ye nwo, na bɛhɔle koɛ ne anoa.

³⁰ Né Siria hene ahyɛ ye teaseɛnam mɔ so safohene nemɔ kyɛ, “Nnɛma ɛmɔfa ɛmɔ nye besie sona foforɛ biala so, kyɛ ɔte titire anaakyɛ ɔte kwahweabaa, sana Yisrael hene angome.”

³¹ Teaseɛnam so safohene nemɔ nwuni Yehosafate pɛ, bɛhane kyɛ, “Yisrael hene ɛhe oo!” Yiti bɛfale koɛ ne bɛɛtoale Yehosafate’. Ɔteateane nu, na AWURADE pepɛ lele ye. Nyameɛ foane bɛ fili ye nwo.

³² Teaseɛnam so safohene nemɔ nwuni kyɛ nna Yisrael hene ahɔ ɔ nen, bɛyakyili ye foanɛ.

³³ Nakoso Siria koɛhonɛfoɛ nemɔ anu ko tole ye agyaen sunzumabo, na owurale Yisrael hene ye mvorɔma nu ne buralɛ bɔ ɔkata ye hue so ne b’afia ɔɔwɔle ye. Yiti osele bɔ ɔkã ye teaseɛnam ne kyɛ, “Kakyi wɔ nwo ná fa me fi koɛ noa, na bapura me.”

³⁴ Koɛ ne anu hɔle so yɛle se sɔ kyẽa ne, na Yisrael hene miane ye nye gyinane ye teaseɛnam ne anu mane ye nye hyirele Siriafoɛ nemɔ kɔpem nɔsoa. Na aleɛ dwole ne, owuli.