2 Aberɛso Dwirɛ 17 - AHYERƐLƐ KRONGRON

Yehosafate di Yuda so hene

¹ Asa awa Yehosafate lili ye baba bia, na ɔboaboale ye nwo amaa sɛ Yisrael fa koɛ batoa ye a, wahora ɔne ye baho.

² Yuda nguro bɔ bato bɛ nwo fasue ne amukoraa, ɔfale koɛhonɛfoɛ tenatenane berɛ, na ɔkyekyele koɛhonɛfoɛ asikyeleɛ wɔ Yuda aseɛ so, yeɛ Efraim nguro bɔ ye baba Asa ho fale nemɔ aso.

³ AWURADE gyinane Yehosafate si, ofikyɛ bra paa bɔ ye nana Dawide bɔle ne, ye bie yeɛ ɔbɔle ɔ. Wanzo mmosoen Baal mɔ,

⁴ na mmom ye baba Nyameɛ ne, ɔpenane ye si atee lili ye mmeraa dwirɛ so, na Yisraelfoɛ bɔne bɔ bɛyɔ ne, wanyɔ bie.

⁵ Yiti AWURADE mane Yehosafate ahennie ne abo timuni. Yuda amukoraa tuale ndɔ mane Yehosafate, na onyane anwonya ne animnyam paa.

⁶ Otuli ye nwo siele berɛ paa lili AWURADE dwirɛ so, yeɛ osa tutuli asɔneyɛɛ nemɔ ne bosoen Asera dosii nemɔ abo fili Yuda.

⁷ Yehosafate lili bia ne, ye afoɛ nza ne anu, ɔsomane ye mbanyi hemɔ: Ben Hayil, Obadia, Sakaria, Netanɛl ne Mikaya kyɛ beehyirehyire Nyameɛ mmeraa wɔ Yuda nguro nemɔ aso.

⁸ Né Lewifoɛ hemɔ boka bɛ so: Semaya, Netania, Sebadia, Asahel, Semiramote, Yehonatan, Adoniya, Tobiya yeɛ Toba Adoniya. Né asɔfo Elisama ne Yehoram bɛboka Lewifoɛ nemɔ aso.

⁹ Bɛfale AWURADE mmeraa nwomaa ne, na behyirehyirele nu dwirɛ ne wɔ Yuda. Behyinihyini Yuda nguro ne amukoraa so behyirehyirele mmenia nwomaa ne anu dwirɛ.

¹⁰ Maen maen bɔ bapɛ Yuda nwo bayia ne, AWURADE nwo suronyi tɔle b’ahennie amukoraa so, na bamva koɛ bandoa Yehosafate ko.

¹¹ Filistifoɛ nemɔ bie fale akyɛdeɛ bɛbrɛle Yehosafate, yeɛ bɛfale ɛdwetɛ koso betuale ndɔ bɛmane ye. Na Arabofoɛ koso bɛfale mmoaen nyii apee nzoo ɛyaa nzoo, yeɛ mbɔngye nyii apee nzoo ɛyaa nzoo bɛbrɛle ye.

¹² Yiti Yehosafate hɔle so nyane ngɔsoɛ. Osisili abandenden mɔ ne nekaa bɔ bɛkɔfa nningyein bekosie ɔ wɔ Yuda.

¹³ Ɔyɔle nningyein mbiri mbiri wɔ Yuda nguro nemɔ aso. Né ole koɛhonɛfoɛ ahoneserɛfoɛ wɔ Yerusalem’.

¹⁴ Bɛhale bɛ ne, bɛ somaa, kyɛbɔ bɛ nana mɔ sasofoɛ te ɔ, bɛ ɛhe: Yuda abusua kure nu, koɛhonɛfoɛ apee apee so safohene nemɔ, safohene Adena yeɛ ɔla bɛ noa. Koɛhonɛfoɛ ahoneserɛfoɛ apee ɛyaa nza yeɛ bewura ye bo ɔ.

¹⁵ Sɛ ɔnne berɛ a, safohene Yehohanan yeɛ ɔwɔ berɛ ɔ. Koɛhonɛfoɛ apee ɛyaa nyɔ aburawɔtwɛ yeɛ bewura ye bo ɔ.

¹⁶ Bɔ ɔtoa berɛ ɔ ole Sikri awa Amasia bɔ ɔfale ye nwo bɔle afɔleɛ mane AWURADE adwuma ne. Koɛhonɛfoɛ ahoneserɛfoɛ apee ɛyaa nyɔ yeɛ bewura ye bo ɔ.

¹⁷ Benyamin abusua kure nu, koɛhonɛniɛ ahoneserɛniɛ Eliada yeɛ ɔla bɛ noa ɔ. Koɛhonɛfoɛ apee ɛyaa nyɔ bɔ betiratira agyaen ne akokyɛm yeɛ bewura ye bo ɔ.

¹⁸ Sɛ ɔnne berɛ a, Yehosabade yeɛ ɔwɔ berɛ ɔ. Koɛhonɛfoɛ apee ɛyaa ko aburawɔtwɛ bɔ baboaboa bɛ nwo kyɛ bɛkɔ koɛ ɔ yeɛ bewura ye bo ɔ.

¹⁹ Bɛ yeɛ né bɛso Nana Yehosafate ɔ, asora bɛ bɔ né Nana wafa bɛ watenatena nguro bɔ bato bɛ nwo fasue wɔ Yuda amukoraa nemɔ aso ne.