2 Aberɛso Dwirɛ 15 - AHYERƐLƐ KRONGRON

Asa toto nningyein yé

¹ Nyameɛ Sunzum wale Odɛde awa Asaria so.

² Ɔhɔ ooyiale Asa, na osele ye kyɛ, “Asa ne Yuda maen amukoraa ne Benyamin maen amukoraa, ɛ́mɔtie! Ɛmɔso AWURADE ye de, AWURADE gyi ɛmɔ si. Sɛ ɛmɔpena ye si atee a, ɛmɔkonwu ye. Nakoso sɛ ɛmɔpo ye a, ye koso ɔkɔpo ɛmɔ.

³ Mmerɛ tendenn bie bɔ wapɛ nu ɔ, né Yisrael ɔnze nahorɛniɛ Nyameɛ ne. Né belle ɔsɔfo bɔ okyirekyire bɛ ɔ, yeɛ belle mmeraa biala.

⁴ Nakoso mmerɛ bɔ b’anwokyere nu besa bɛwale AWURADE Yisrael Nyameɛ berɛ, ná bɛpenane ye si atee ne, benwuni ye.

⁵ Sɔ mmerɛ nemɔ anu, né ɔyɛ suro kyɛ ekotu wɔ gya ɔ, ofikyɛ né amaneɛ mbiri mbiri atoto maen maen mɔ nu mmenia amukoraa.

⁶ Bɛ nu tetele. Maen ho tiale maen, yeɛ kuro ho tiale kuro, ofikyɛ Nyameɛ mane ɛhawo ahoroɔ wale bɛ so.

⁷ Nakoso ɛmɔ de, ɛ́mɔgyina pindinn. Nnɛma ɛmɔ abasa nu dwo, ofikyɛ ɛmɔkonya ɛmɔ adwuma nwo akatuaa.”

⁸ Asa tele ngɔm bɔ Odɛde awa Asaria hyɛle nen, osili ye hue, na akyiwadeɛ mmosoen mɔ bɔ bɛwowɔ Yuda ne Benyamin aseɛ so amukoraa, ɔne bɔ bɛwɔ nguro bɔ ɔho lele wɔ Efraim mmokaa aseɛ nemɔ aso ne, otutuli bɛ bo fili berɛ. AWURADE afɔleɛ bokyea bɔ ɔwɔ AWURADE awuro abrannaa ne anyunu berɛ ne, osa siesiele ye yɛle ye yé.

⁹ Ɔboaboale Yudafoɛ ne Benyaminfoɛ amukoraa bɛ noa. Yeɛ Efraimfoɛ, Manasefoɛ ne Simeonfoɛ bɔ né baatena bɛ berɛ ne koso, ɔboaboale bɛ noa, ofikyɛ mmenia pee benwuni kyɛ AWURADE, Asa ye Nyameɛ ne, ogyi ye si ne, betu befili Yisrael bɛɛtenane ye aseɛ so.

¹⁰ Asa lili bia ne, ye afoɛ buru ne nnu ne anu, bosome nza ne anu, bɛboale bɛ noa wɔ Yerusalem.

¹¹ Koɛ nu nzesadeɛ bɔ bɛfa bɛhɔle ne, sɔ kyẽa ne, bɛyele nu nandwie nyii ɛyaa nzoo ne mmoaen apee nzoo bɛbɔle afɔleɛ bɛmane AWURADE.

¹² Bɛyɛle apam kyɛ bɛkɔfa b’ahone amukoraa ne bɛ kra amukoraa bɛkɔpena AWURADE bɛ nana mɔ Nyameɛ ne, ye si atee.

¹³ Na bele bɛtole nu kyɛ, ebiala bɔ ɔngɔpena AWURADE Yisrael Nyameɛ ne, ye si atee ne, kyɛ akwadaa oo, panyi oo, kyɛ bienzua oo, brasua oo, odi kyɛ beku ye ɔ.

¹⁴ Bele komviɛ piri ne esebɔlɛ ne totorobɛndohulɛ ne awɛenhulɛ bɛtale ndaen behyirele AWURADE.

¹⁵ Ɔnate ndaen ne ati, Yuda amukoraa belili ahurusi, ofikyɛ bɛfale b’ahone amukoraa yeɛ bɛfoale so ɔ. Bɛyele bɛ kunu amukoraati yeɛ bɛpenane AWURADE si ate ɔ, na benwuni ye. Na AWURADE mane bɛ asomdwee fili bɛ pɔfoɛ mɔ sa nu wɔ nekaa biala.

¹⁶ Nana Asa tuli ye bɔbɔ oni Maaka fili ɛhemmaa bia ne aso, ofikyɛ ɔyɔle Asera bosoen bɔ ɔte akyiwadeɛ ɔ. Asa pɛle Asera dosii ne tole ase, obubuli ye, na ɔyerale ye wɔ Kidron bɔnza ne anwo.

¹⁷ Asɔneyɛɛ nemɔ de, wandu bɛ bo wamvi Yisrael. Nakoso Asa lili nahorɛ mane AWURADE mmerɛ bɔ né ɔte ngoa nu amukoraa.

¹⁸ Ye baba aboadeɛ afɔleɛ ne ye bɔbɔ ye aboadeɛ afɔleɛ nemɔ, ɔfa wale Nyameɛ awuro. Afɔleɛ nemɔ te ɛdwetɛ, esikaa kɔkorɛ ne nningyein ahoroɔ.

¹⁹ Na ebiala wamva koɛ wandoa bɛ toonn kɔpem kyɛ Asa lili afoɛ aburasa ne nnu wɔ bia ne aso ɔ.