2 Aberɛso Dwirɛ 14 - AHYERƐLƐ KRONGRON

Asa di Yuda so hene

¹ Abiya toale ye mbanyi mɔ. Besiele ye wɔ Dawide kuro, na ɔwa Asa lili ye bia. Asa aberɛ so maen ne nyane asomdwee afoɛ buru.

² Asa yɔle bɔ ɔte paa ne bɔ ɔtengyɛ ɔ wɔ AWURADE ye Nyameɛ nyunu.

³ Asa tutuli maen maen mmosoen afɔleɛ bokyea nemɔ ne asɔneyɛɛ nemɔ abo. Obubuli mmosoen bonima nemɔ, yeɛ ɔpepɛle Asera dosii nemɔ guale ase.

⁴ Na ɔhyɛle kyɛ Yuda maen bɛso AWURADE, bɛ nana mɔ Nyameɛ ne, ná beli ye mmeraa ne ye mmeraa dwirɛ so.

⁵ Afei koso, otutuli asɔneyɛɛ nemɔ ne ɛyɛɛ afɔleɛ bokyea nemɔ abo fili Yuda nguro amukoraa so. Na ye aberɛ so, maen ne nyane asomdwee.

⁶ Mmerɛ bɔ asomdwee wale aseɛ ne aso ne, Asa kyekyele nguro bɔ bato bɛ nwo fasue ɔ wɔ Yuda. Sɔ mmerɛ ne, wango koɛ biala ofikyɛ AWURADE mane ye asomdwee.

⁷ Asa sele Yuda maen kyɛ, “Ɛ́mɔma yɛkyekye sɔ nguro nemɔ, ná yɛsi fasue, abandenden ne pambim bɔ babrambram bɛ si ɔ yɛ́fa yɛ́bɔ bɛ nwo waen. Aseɛ ne tɛ te yɛ deɛ, ofikyɛ yali AWURADE yɛ Nyameɛ si. Yali ye si, na wamaa yanya asomdwee wɔ nekaa biala.” Yiti bɛhɔle so bɛyɔle sɔ adwuma nemɔ maa oyiele bɛ yé.

⁸ Asa koɛhonɛfoɛ, né bɛte apee ɛyaa nza bɔ befi Yuda ɔ. Né betiratira akokyɛm mbiri ne pealɛɛ mbiri’. Né osa ole koɛhonɛfoɛ apee ɛyaa nyɔ aburawɔtwɛ bɔ befi Benyamin bɔ betiratira akokyɛm ne agyaen ɔ. Bɛ mukoraa bɛte koɛhonɛfoɛ ahoneserɛfoɛ.

Asa ne Yitiopiafoɛ bɛko koɛ

⁹ Yitiopianiɛ Sera fale koɛhonɛfoɛ apepesrala ko yeɛ teaseɛnam ɛyaa nza, na ɔfale koɛ ɔɔtoale Yuda. Ɔwale alaa oodwuli Maresa.

¹⁰ Asa fale koɛ ooyiale ye, na bɛfale koɛ ne bɛtetale so wɔ Sefata bɔnza ne anu wɔ Maresa.

¹¹ Asa sũ frɛle AWURADE ye Nyameɛ kyɛ, “Ao AWURADE, ɛkora boka sona bɔ ye nwo yɛ se, yeɛ ɛkora boka bɔ ye nwo nyɛ se koso ɔ. Ao AWURADE yɛ Nyameɛ, boka yɛ, ofikyɛ yafa yɛ nwo yato wɔ so, na wɔ dumaa nu yeɛ yɛfa koɛ yɛkɔtoa ɛlɔen he ɔ. Ao AWURADE, wɔ yeɛ ɛte yɛ Nyameɛ ɔ. Nnɛma dasaniɛ biala di wɔ so ngonim.”

¹² Yiti AWURADE lili Yitiopiafoɛ nemɔ aso ngonim mane Asa ne Yuda maen, na Yitiopiafoɛ nemɔ nwatili.

¹³ Asa ne ye koɛhonɛfoɛ bɔ bɛboka ye so ne, bɛfoane Yitiopiafoɛ nemɔ alaa beedwuli Gera, na Yitiopiafoɛ totɔle bɔ wanga bɛ nu ko po ɔ, ofikyɛ belili ngoguo wɔ AWURADE ne ye koɛhonɛfoɛ nemɔ nyunu. Na Yudafoɛ bɛsesale koɛ nu nzesadeɛ pee.

¹⁴ Nguro bɔ bapɛ Gera nwo bayia ne, Yudafoɛ lili bɛ so ngonim, ofikyɛ AWURADE nwo suronyi tɔle sɔ nguro nemɔ aso. Bɛfene nguro nemɔ amukoraa nu nningyein, ofikyɛ né koɛ nu nzesadeɛ pee wɔ berɛ.

¹⁵ Afei, bɛ bɔ bele ayɛmmoa mɔ ne koso, Yudafoɛ fale koɛ bɛtoale bɛ bɛsesale bɛ mmoaen ne mbɔngye pee, ɔne b’afupɔngɔ mɔ bɛhɔle. Afei besa bɛhɔle Yerusalem.