2 Aberɛso Dwirɛ 13 - AHYERƐLƐ KRONGRON

Abiya di Yuda so hene

¹ Nana Yeroboam lili bia ne, ye afoɛ bɔ ɔtɔ so buru ne mmɔtwɛ ne anu, Abiya lili Yuda so hene.

² Olili bia ne afoɛ nza wɔ Yerusalem. Oni ole Yuriɛl bɔ ofi Gibea ne ɔwa Mikaya. Koɛ tɔle Abiya ne Yeroboam b’afia.

³ Abiya hɔle koɛ, na né ole koɛhonɛfoɛ ahoneserɛfoɛ paa bɔ baneanea nu baye bɛ ɔ apee ɛyaa nna. Na Yeroboam koso fale koɛhonɛfoɛ ahoneserɛfoɛ bɔ baneanea nu baye bɛ ɔ apee ɛyaa mmɔtwɛ ɔne ye bɛɛfa bɛbɔle so.

⁴ Abiya oogyinane Semaraim bokaa ne ngyɛnu wɔ Efraim mmokaa aseɛ ne aso, na osele kyɛ, “Yeroboam ne Yisrael maen amukoraa, ɛ́mɔtie me.

⁵ Ɛmɔnze kyɛ AWURADE Yisrael Nyameɛ, ɔnate ngyee apam so fale Yisrael maen ne aso ahennie mane Dawide ne ye boso ama afebɔɔ ɔ?

⁶ Nakoso Nebate awa Yeroboam, bɔ ɔte Dawide awa Solomon ye somvoɛ ne, ɔyɛle ye mene nwo lɔen.

⁷ Na asanzafoɛ biemɔ bɔ bɛ nwo olle mvasoɛ ɔ bɛɛbokale ye so. Na mmerɛ bɔ Solomon awa Rehoboam ɔte akwadaa bɔ ye nye nyɛ se, bɔ né ɔngora ɔne bɛ mbem so ne, bɛho betiale ye.

⁸ “Na afei de, ɛmɔdwene kyɛ ɔnate kyɛ ɛmɔte ɛlɔen piri, ná esikaa kɔkorɛ nandwie mmaa nyameɛ mɔ bɔ Yeroboam yɛ mane ɛmɔ ne, begyi ɛmɔ si ne ati, ɛmɔkɔhora bɛkɔho bekotia AWURADE ahennie bɔ Dawide boso ama mɔ bɛla ye noa ne?

⁹ AWURADE asɔfo mɔ bɔ bɛte Aarɔn boso ama ne, bɛ ne Lewifoɛ nemɔ, aso ɛmɔffoane bɛ? Aso ɛmɔ bɔbɔ ɛmɔhhyɛle mmenia asɔfo bɛmmane bɛ nwo kyɛbɔ amaenmaen ngaa nemɔ bɛyɔ ne? Ebiala bɔ ɔkɔfa nandwie akrɔngrɔma ko anaa mmoaen nyii nzoo kɔwa kyɛ bɛhyɛ ye sɔfo ne, ɛmɔhyɛ ye sɔfo bɛma mmosoen mɔ bɔ nna Nyameɛ ahɔ ɔ.

¹⁰ Nakoso yɛ de, AWURADE yeɛ ɔte yɛ Nyameɛ ɔ. Yɛ de yɛppole ye. Yɛ asɔfo bɔ bɛyɔ AWURADE ɛsɔnenɛ adwuma ne, bɛte Aarɔn bosofoɛ; na Lewifoɛ yeɛ bɛboka bɛ ɔ.

¹¹ Ngyerɛmɔ ne nɔsoa biala, bɛbɔ naen yeralɛ afɔleɛ ne ɛyɛɛ fona afɔleɛ bɛma AWURADE. Na esikaa kɔkorɛ paa poen ne, bɛhyehyɛ paanoo folii begua so. Bɛnea kyɛ esikaa kɔkorɛ kanea bakaa ne, ye kanea nemɔ kɔsɔ nɔsoa biala, ofikyɛ yɛyɔ bɔ AWURADE yɛ Nyameɛ ahyɛ yɛ kyɛ yɛyɔ ɔ. Nakoso ɛmɔ de, ɛmɔapo ye.

¹² Ɛ́mɔtie, Nyameɛ yeɛ otua yɛ noa ɔ. Ye asɔfo nemɔ betiratira bɛ koɛ totorobɛndo bɔ behu bɛfrɛ mmenia maa yɛne ɛmɔ bako ɔ. O Yisraelfoɛ, nnɛma ɛmɔfa koɛ bɛtoa AWURADE, ɛmɔ nana mɔ Nyameɛ ne, ofikyɛ ɛmɔngɔhora bengoli ngonim.”

¹³ Né Yeroboam wasoma koɛhonɛfoɛ maa baatetɛ kyɛ bɛɛfa Yudafoɛ si bɛfa koɛ bɛtoa bɛ. Yiti né ye koɛhonɛfoɛ nemɔ bɛwɔ Yuda koɛhonɛfoɛ nemɔ nyunu, yeɛ koɛhonɛfoɛ bɔ baatetɛ ne, bɛwɔ Yudafoɛ nemɔ asi.

¹⁴ Yudafoɛ nemɔ pɛnene bɛ nye ne, benwuni kyɛ koɛ ne afite bɛ nyunu ne bɛ si. Yudafoɛ nemɔ sũ frɛle AWURADE, na asɔfo nemɔ huli totorobɛndo nemɔ.

¹⁵ Yeɛ Yuda koɛhonɛfoɛ ne, bɛteateane nu bɛtole bɛ koɛ dwein. Na bɛ teateane nu ne, Nyameɛ lili Yeroboam ne Yisrael koɛhonɛfoɛ ne amukoraa so ngonim mane Abiya ne Yudafoɛ nemɔ.

¹⁶ Yisraelfoɛ nemɔ nwati fili Yudafoɛ nemɔ nyunu, na Nyameɛ fale bɛ wurale Yudafoɛ sa.

¹⁷ Abiya ne ye koɛhonɛfoɛ nemɔ behuhuni bɛ pasaa, na Yisraelfoɛ bɔ bɛse koɛ ko paa ne, bɛ nu apee ɛyaa nnu totɔle.

¹⁸ Yiti Yisraelfoɛ belili ngoguo sɔ mmerɛ ne, na Yudafoɛ lili ngonim, ofikyɛ Yudafoɛ fale bɛ nwo bɛtole AWURADE bɛ nana mɔ Nyameɛ ne aso.

¹⁹ Abiya foane Yeroboam, na olele ye nguro nemɔ bie fili ye sa nu. Nguro nemɔ ole Betel ne ye nwo nguraa mɔ, Yesana ne ye nwo nguraa mɔ, yeɛ Efron ne ye nwo nguraa mɔ.

²⁰ Mmerɛ bɔ né Abiya di bia ne amukoraa, Yeroboam ahennie ne wambe ye daa nu. Na AWURADE bɔle ye maa owuli.

²¹ Nakoso Abiya de, ɔhɔle so nyane ngɔsoɛ. Ogyale mmraa buru ne nna, na ɔwole mmaa mmienzua aburanyɔ ne nyɔ ne mmaa mmrasua buru ne nzia.

²² Abiya nwo dwirɛ ngaa ne, ye suban ne ye nnwumaa, bahyerɛ ye wɔ ngɔmhyɛlɛniɛ Yido ye nwo dwirɛ nwomaa ne anu.