2 Aberɛso Dwirɛ 12 - AHYERƐLƐ KRONGRON

Misraim fa koɛ toa Yuda

¹ Mmerɛ bɔ Nana Rehoboam ye ahennie bo tindimuni ná onyane ngɔsoɛ ne, ɔne Yisrael amukoraa bɛpole AWURADE mmeraa ne.

² Nana Rehoboam lili bia ne, ye afoɛ nnu ne anu, ɔnate kyɛ né bayɛ AWURADE so asoserɛ ne ati, Misraim hene Sisake fale koɛ ɔtoale Yerusalem.

³ Sisake fale teaseɛnam apee ko ɛyaa nyɔ ne pɔngɔhanɛfoɛ apee aburasia yeɛ ɔhɔle koɛ ne ɔ. Koɛhonɛfoɛ bɔ bɛka bɛ a, bennwu ye noa ɔ yeɛ befili Misraim bɛhɔle ɔ. Bɛte Libiafoɛ, Sukimfoɛ yeɛ Yitiopiafoɛ.

⁴ Yuda nguro bɔ bato bɛ nwo fasue ne, olili bɛ so ngonim, na ɔhone koɛ ne alaa oodwuli Yerusalem.

⁵ Yeɛ Rehoboam ne Yuda mbanyi, bɔ ɔnate Sisake nwo suronyi ti banwati baafea wɔ Yerusalem ne, ngɔmhyɛlɛniɛ Semaya hɔle bɛ berɛ oosele bɛ kyɛ, “AWURADE nwa nyoo: Ɔnate kyɛ ɛmɔapo me ne ati, me koso maye me sa mafi ɛmɔ bo mafa ɛmɔ mawura Sisake sa.”

⁶ Yeɛ Yisrael mbanyi ne Nana Rehoboam belele bɛ bɔne bɛtole nu, na bɛhane kyɛ, “AWURADE te teneneeniɛ.”

⁷ AWURADE nwuni kyɛ bale bɛ bɔne bato nu ne, ɔlale ye dwirɛ ali hyirele Semaya kyɛ, “Bale bɛ bɔne bato nu, yiti mengohu bɛ, na mmom ngɔpepɛ ngole bɛ kãa. Mengɔfa Sisake so mengɔmaa me yaafɛlɛ ne ngɔwa Yerusalem so.

⁸ Nakoso bɛkɔyɛ ye ngoaa, amaa ɔnate so banwu nzonzoleɛ bɔ ɔla ɛhe afia ɔ: kyɛ bɛkɔso me, anaakyɛ bɛkɔso aseɛ ye aso ahennie mɔ ɔ.”

⁹ Yiti Misraim hene Sisake fale koɛ ɔɔtoale Yerusalem. Ɔsesale AWURADE awuro berɛ nningyein amukoraa ɔne ahemvie berɛ nningyein amukoraa hɔle. Afei koso esikaa kɔkorɛ akokyɛm bɔ Solomon yɔle ne amukoraa, ɔsesa hɔle.

¹⁰ Yiti nziɛ ye, Nana Rehoboam yɔle kɔɔbere akokyɛm mɔ fa sili bɛ gya nu, na ɔfa wurale awɛmvoɛ mbanyi bɔ ne bɛwɛne ahemvie berɛ anoa nemɔ ne, bɛ sa.

¹¹ Mmerɛ biala, sɛ né Nana Rehoboam ɔkɔ AWURADE awuro berɛ a, awɛmvoɛ nemɔ bɛye akokyɛm nemɔ befite, ná basa bafa bagua akodeɛ sua ne anu.

¹² Ɔnate kyɛ Nana Rehoboam lele ye bɔne tole nu ne ati, AWURADE ɛyaafɛlɛ ne amma ye so, na wangu ye. Afei koso, né nningyein tɛ kɔ so yé wɔ Yuda.

Rehoboam wue

¹³ Yiti Nana Rehoboam mane ye ahennie bo tindimuni wɔ Yerusalem, na olili hene. Rehoboam lili bia ne, né wali afoɛ aburanna ne ko. Na olili bia ne afoɛ buru ne nzoo wɔ Yerusalem bɔ ɔte kuro bɔ AWURADE aneanea Yisrael mmusua kure amukoraa nu waye wafa ye dumaa wato so ne aso. Oni ole Amonniɛ bie bɔ bɛfrɛ ye Naama.

¹⁴ Rehoboam yɔle bɔne, ofikyɛ wanye ye kunu wanni AWURADE si.

¹⁵ Afei Rehoboam nwo dwirɛ ne, ofi ye ahyɛaseɛ bɔ ɔkwaadwu ye ayieleɛ, bahyerɛ ye wɔ ngɔmhyɛlɛniɛ Semaya ɔne Yido bɔ ɔse ase ne b’abakɔsɛm nwomaa, bɔ ɔkã aworɛ ndoatoasoɛ nwo dwirɛ ne anu. Na Rehoboam ne Yeroboam bɛhɔle so bɛhone koɛ mmerɛ pee.

¹⁶ Rehoboam toale ye mbanyi mɔ. Besiele ye wɔ Dawide kuro ne anu, na ɔwa bienzua Abiyam lili ye bia.