2 Aberɛso Dwirɛ 11 - AHYERƐLƐ KRONGRON

Semaya hyɛ ngɔm

¹ Rehoboam oodwuli Yerusalem ne, ɔboaboale koɛhonɛfoɛ bɔ bɛse ko paa ɔ apee ɛyaa ko aburawɔtwɛ noa fili Yuda awuro ama ne Benyamin awuro ama nu, kyɛ ɔfa koɛ ɔkɔtoa Yisrael maen, ná osa ode ahennie ne fa wura ye bɔbɔ Rehoboam ye sa.

² Nakoso AWURADE fale ye noa dwirɛ somane Nyameɛ sona Semaya kyɛ,

³ “Ka kyire Yuda hene Rehoboam bɔ ɔte Solomon awa ne, ɔne Yisraelfoɛ amukoraa bɔ bɛwɔ Yuda ne Benyamin kyɛ,

⁴ ‘AWURADE nwa nyoo: Nnɛma ɛmɔkɔfa koɛ bɛtoa ɛmɔ aliɛma mɔ. Ebiala ɔhɔ ye awuro, ofikyɛ bɔ wasi ne, me yeɛ mamaa wasi ɔ.’ ” Yiti betiele AWURADE dwirɛ ne, na bamva koɛ bangɔandoa Yeroboam ko.

Rehoboam bɔ Yuda nwo waen

⁵ Rehoboam tenane Yerusalem, na ɔbɔle nguro hemɔ anwo waen wɔ Yuda.

⁶ Ɔbɔle Betlehem, Etam, Tekoa,

⁷ Bete Sure, Soko, Adulam,

⁸ Gate, Maresa, Sife,

⁹ Adoraim, Lakise, Aseka,

¹⁰ Sora, Ayalɔn ne Hebron nwo waen. Bɛte nguro bɔ babɔ bɛ nwo waen wɔ Yuda ne Benyamin ɔ.

¹¹ Omiane fasue nemɔ nu maa benyane anwoserɛ paa, ɔfale safohene mɔ tenane nguro nemɔ aso, na ɔfale aleɛ, ngoo ne nzaa siele nguro nemɔ aso.

¹² Afei koso, sɔ nguro nemɔ amukoraa, ɔfale akokyɛm mbiri ne pealɛɛ mbiri siesiele so, na ɔbɔle bɛ nwo waen paa. Yiti Rehoboam lili Yuda ne Benyamin so hene koraa.

Asɔfo ne Lewifoɛ gyi Rehoboam si

¹³ Asɔfo mɔ ne Lewifoɛ bɔ bɛwɔ Yisrael amukoraati ne, befifili bɛ nguro bɔ bɛtete so ɔ amukoraa so beegyinane Rehoboam si.

¹⁴ Lewifoɛ nemɔ yakyili b’aseɛ ne b’agyapadeɛ mɔ berɛ bɛwale Yuda ne Yerusalem, ofikyɛ Yeroboam ne ye mma mmienzua nemɔ, bamma bɛ ate maa banyɔ AWURADE asɔfo adwuma ne.

¹⁵ Né Yeroboam bɔbɔ deinn wayeye ye asɔfo mɔ bɔ bɛsɔne wɔ asɔneyɛɛ nemɔ aso, ɔne bɔ bɛsɔne mbɔngye mmosoen ne nandwie mmaa mmosoen bɔ ye bɔbɔ Yeroboam wagyinagyina nemɔ ɔ.

¹⁶ Yisraelfoɛ bɔ né bɛpena kyɛ bɛso AWURADE Yisrael Nyameɛ nahorɛ nu ne, befili Yisrael mmusua kure ne amukoraa nu bɛwale Yerusalem bɛɛbɔle afɔleɛ bɛmane AWURADE, bɛ nana mɔ Nyameɛ ne.

¹⁷ Ɛhe bɔ bɛyɔle ne, ɔmane Yuda ahennie ne tindimuni maa ɔnate so afoɛ nza bɔ ɔtoa so ne, Solomon awa Rehoboam so anu dwole ye, ofikyɛ bɔ Dawide ne Solomon bɛyɔle ne, bɛ koso bɛyɔle bie afoɛ nza.

Rehoboam agyaa nwo dwirɛ

¹⁸ Rehoboam gyale Mahalate. Mahalate ye baba ole Dawide awa Yerimote, yeɛ oni ole Yese awa Eliabo ɔwa Abihail.

¹⁹ Rehoboam ne Mahalate bɛwole mmaa mmienzua hemɔ: Yeyuse, Semaria ne Saham.

²⁰ Ye si ye, ogyale Absalom awa brasua Maaka, na ɔne ye bɛwole Abiya, Ataye, Sisa ne Selomite.

²¹ Né Rehoboam kuro Absalom awa brasua Maaka tra ɔye mɔ ne ye sómaa mɔ amukoraa. (Ogyale mmraa buru ne mmɔtwɛ, yeɛ né ye sómaa mɔ aburasia, na ɔwole mmaa mmienzua aburanyɔ ne mmɔtwɛ yeɛ mmaa mmrasua aburasia.)

²² Rehoboam yele Maaka awa Abiya maa ɔlale ye mma nemɔ amukoraa bɛ noa, ofikyɛ né okuro kyɛ ɔmaa odi ye bia yɛ ɛhene.

²³ Yuda ne Benyamin maen ne anu manzini amukoraa, yeɛ nguro bɔ bato bɛ nwo fasue nemɔ amukoraa, Rehoboam le nworɛ fale nu adwuma wurale ye mma mmienzua nemɔ sa. Ɔmane bɛ nningyein bɔ bekohia ɔ pee, na ogyigyale mmraa pee mane bɛ.