2 Aberɛso Dwirɛ 10 - AHYERƐLƐ KRONGRON

Bɛyɛ Rehoboam nwo lɔen

¹ Rehoboam sili nu hɔle Sɛkem, ofikyɛ né Yisrael amukoraa bawa Sɛkem kyɛ bɛbaafa ye besie bia so.

² Nebate awa Yeroboam tele ye sɔ pɛ yeɛ osa fili Misraim wale Yisrael ɔ. (Né ɔtɛwɔ Misraim, nekaa bɔ ɔnwati fili Solomon nyunu hɔle ne.)

³ Yisraelfoɛ somane maa bɛɛfrɛle Yeroboam, na ɔne Yisrael maen ne amukoraa bɛɛfa bɛtole Rehoboam nyunu kyɛ,

⁴ “Wɔ baba maa yɛyɔle adwuma serɛ paa. Yiti kekesaala ye, wɔ baba anyandim bɔ olili ye wɔ yɛ so ne, ɔne adwuma serɛserɛ bɔ ɔfa tole yɛ so ne, te so na yɛkɔso wɔ.”

⁵ Na Rehoboam buale bɛ kyɛ, “Ɛ́mɔsa bɛbra me wa ye ɛlɛsa so beele mmuayɛɛ.” Yiti mmenia ne sili nu bɛhɔle.

⁶ Yeɛ mbanyi bɔ bɛ nye afi, bɔ mmerɛ bɔ Nana Rehoboam baba Solomon te ase ne, né betu ye foɛ ne, Rehoboam ne bɛ dwenene edwirɛ ne anwo, na obisale bɛ kyɛ, “Mmenia ye, nzikyɛ mmuayɛɛ yeɛ ɛmɔsusu kyɛ mva mma bɛ ɔ?”

⁷ Bebuale ye kyɛ, “Sɛ ɛkɔhã edwirɛ fɛɛ kohyire maen ye ma b’ahone kɔtɔ nzue nu, ná sɛ ɛkɔma bɛ mmuayɛɛ paa a, ye de bɛkɔyɛ wɔ ngoaa afebɔɔ.”

⁸ Nakoso foɛ bɔ mbanyi nemɔ tuli ye ne, ɔfa tole ahameɛ. Na mmerandeɛ bɔ ɔne bɛ bɔ tipɛen bɔ ɔne bɛ tu nu, bɔ né baayɛ ye foɛtulɛfoɛ ne, ɔne bɛ dwenene edwirɛ ne anwo.

⁹ Obisale bɛ kyɛ, “Mmenia ye, bɔ bafa bato me nyunu kyɛ, ‘Adwuma serɛserɛ bɔ wɔ baba fa tole yɛ so ne, te so’ ne, nzikyɛ mmuayɛɛ yeɛ yɛfa yɛma bɛ ɔ?”

¹⁰ Ye ti pɛen mmerandeɛ bɔ ɔne bɛ tu nu nemɔ bebuale ye kyɛ, “Mmenia hemɔ, bɔ baafa bato wɔ nyunu kyɛ, ‘Wɔ baba maa yɛyɔle adwuma serɛ paa. Yiti kekesaala ye, te so ma yɛ,’ ne, bua bɛ kyɛ, ‘Me sa mmɛseka bɔ oli nziɛ ne po, ɔte piri tra me baba sisia.

¹¹ Me baba maa ɛmɔyɔle adwuma bɔ ɔyɛ se paa ɔ, na me wora, ngɔfa bieku ngɔboka so. Me baba de, ole mbire yeɛ ɔhwene ɛmɔ so ɔ, nakoso me de ngɔfa anyanyangyeleɛ yeɛ ngɔhwe ɛmɔ so ɔ.’ ”

¹² Yiti kyɛbɔ Nana Rehoboam hane kyɛ, ‘Ye ɛlɛsa ne aso, ɛmɔsa bɛbra me wa beele mmuayɛɛ’ ne, ye ɛlɛsa ne aso, Yeroboam ne maen ne amukoraa besa bɛhɔle Rehoboam berɛ.

¹³ Nana Rehoboam dwudwo hyirele maen ne ɛyaa so. Foɛ bɔ mbanyi nemɔ tuli ye ne, ɔfa tole ahameɛ,

¹⁴ na ogyinane mmerandeɛ nemɔ foɛtulɛ so sele bɛ kyɛ, “Me baba maa ɛmɔyɔle adwuma bɔ ɔyɛ se paa ɔ, na me wora, ngɔfa bieku ngɔboka so. Me baba de, ole mbire yeɛ ɔhwene ɛmɔ so ɔ, nakoso me de ngɔfa anyanyangyeleɛ yeɛ ngɔhwe ɛmɔ so ɔ.”

¹⁵ Yiti Nana Rehoboam wanne maen ne dwirɛ ne wando nu, ofikyɛ nningyein bɔ né ɔkɔ so ne, né ofi Nyameɛ, amaa ɔnate so, AWURADE dwirɛ bɔ ɔnate Silonniɛ Ahiya so hã hyirele Nebate awa Yeroboam ne, wawa nu.

¹⁶ Yisrael amukoraa nwuni kyɛ Nana Rehoboam wanne bɛ dwirɛ ne wando nu, na besele ye kyɛ, “Kyɛfa beni yeɛ yɛle ye wɔ Dawide nu ɔ? Yɛlle agyapadeɛ biala wɔ Yese awa ne anu. Yisraelfoɛ ee, ebiala ɔhɔ ye awuro oo! Dawide bosoniɛ, koli wɔ mmenia so hene.” Yiti Yisraelfoɛ amukoraa besili nu bɛhɔle b’awuro.

¹⁷ Nakoso Yisraelfoɛ bɔ né bɛtete Yuda nguro nemɔ aso ne, Rehoboam lili bɛ so hene.

¹⁸ Hadoram bɔ né ɔnea mmenia bɔ bɛhyɛ bɛ maa bɛyɔ adwuma ne aso ne, Nana Rehoboam somane ye maen ne berɛ. Nakoso Yisraelfoɛ bɛborole ye nyɔboɛ behuni ye. Na Nana Rehoboam le amirika ɔfole ye teaseɛnam ɔnwati hɔle Yerusalem.

¹⁹ Yiti Yisrael wayɛ Dawide awuro ama nwo lɔen maa waadwu ɛnɛ.