2 Aberɛso Dwirɛ 1 - AHYERƐLƐ KRONGRON

Solomon bɔ mbaeɛ srɛ nworɛ

¹ Dawide awa Solomon mane ye ahennie tindimuni, na AWURADE ye Nyameɛ gyinane ye si maa onyane tumi piri paa.

² Na Solomon tole ye sa frɛle Yisraelfoɛ hemɔ amukoraa maa beeyiale: koɛhonɛfoɛ apee apee so safohene mɔ, koɛhonɛfoɛ ɛyaa ɛyaa so safohene mɔ, ndɛenbualɛfoɛ, Yisrael nu mbanyi amukoraa ne mbanyi bɔ bɛlela mmusua mmusua nemɔ anoa mukoraa.

³ Yeɛ Solomon ne Yisrael maen ne amukoraa bɛhɔle Gibeon asɔneyɛɛ so, ofikyɛ Nyameɛ ɛtena sua atenaleɛ bɔ AWURADE somvoɛ Mose sili ye wɔ ɛserɛ ne aso ne, berɛ yeɛ né ɔwɔ ɔ.

⁴ (Nakoso né Dawide wali moa waafa Nyameɛ alaka ne wafi Kiriate Yearim waasie nekaa bɔ yeɛ Dawide wasiesie wama alaka ne. Ofikyɛ né Dawide wasi ɛtena sua wama alaka ne wɔ Yerusalem.)

⁵ Afei koso, kɔɔbere afɔleɛ bokyea bɔ Besalel bɔ ye baba ole Yuri, bɔ ye baba ole Hure ɔyɔle ne, né ogyi AWURADE nyianu sua ne anyunu, na Solomon ne maen ne bebisale AWURADE noa dwirɛ wɔ berɛ.

⁶ Kɔɔbere afɔleɛ bokyea bɔ ɔwɔ AWURADE nyunu wɔ nyianu sua ne anu ne, Solomon fo hɔle so ɔɔbɔle naen yeralɛ afɔleɛ apee ko wɔ so.

⁷ Sɔ kyẽa ne kɔngɔen, Nyameɛ yele ye nwo ali hyirele Solomon. Na osele Solomon kyɛ, “Bisa bɔ ekuro ɔ maa nyɔ mma wɔ.”

⁸ Na Solomon buale kyɛ, “W’akoaa Dawide bɔ yeɛ ɔte me baba ne, ɛyɛle ye paa piri paa, na amaa mali ye bia mayɛ ɛhene.

⁹ O, AWURADE Nyameɛ, wɔ bɔhyɛ bɔ ɛhyɛle me baba Dawide ne, maa ɔbra nu, ofikyɛ amaa mali hene wɔ maen bɔ bɛ somaa te kyɛ aseɛnwo mvuture ɔ so.

¹⁰ Yiti ma me nworɛ ne nimdeɛ bɔ ngɔfa ngɔla wɔ maen ye noa ɔ; ofikyɛ wɔ maen piri ye, nwa yeɛ ɔkɔhora kɔla ye noa ɔ?”

¹¹ Na Nyameɛ buale Solomon kyɛ, “Ɔnate kyɛ w’ahone la sɔ nikyee ye anwo, ná anzrɛ agyapadeɛ, anaa anwonya, anaa animnyam, anaa ngoa tendenn, yeɛ ambena wɔ pɔfoɛ mɔ wue, na mmom asrɛ nworɛ ne nimdeɛ ama wɔ nwo bɔ ɛkɔfa kɔla me mmenia bɔ mamaa ali bɛ so hene ne bɛ noa ne ati,

¹² mama wɔ nworɛ ne nimdeɛ. Afei koso ngɔmaa ekonya wɔ nwo, ekonya agyapadeɛ ne animnyam bɔ wɔ sɛso ɛhene ɔwwale le, na wɔ si koso bengonya wɔ sɛso ɔ.”

Solomon tumi ne anwonya

¹³ Yiti Solomon fili ɛtena sua atenaleɛ bɔ ɔwɔ Gibeon asɔneyɛɛ ne aso dwu hɔle Yerusalem. Na olili Yisrael so hene.

¹⁴ Solomon boaboale teaseɛnam mɔ ne mbɔngɔ noa. Né ole teaseɛnam apee ko ɛyaa nna ne mbɔngɔ apee buru ne nyɔ. Ɔfale bie hɔle nguro bɔ bɛfa teaseɛnam begua so nemɔ aso, yeɛ ɔmane ebie koso hale ye nwo berɛ wɔ Yerusalem.

¹⁵ Nana Solomon mane ɛdwetɛ ne esikaa kɔkorɛ buli wɔ Yerusalem kyɛ nyɔboɛ, yeɛ ɔmane sida koso buli kyɛ aseɛ frɛtɛɛ so akyea.

¹⁶ Solomon herale mbɔngɔ fili Misraim ne Kue, na nyɔboɛ bɔ bapɛ bato berɛ ne yeɛ Nana Solomon dwadifoɛ nemɔ betuale bɛmane Kuefoɛ nemɔ ɔ.

¹⁷ Teaseɛnam ko biala bɔ bɛhera befili Misraim ne, ye nyɔboɛ te ɛdwetɛ sekel ɛyaa nzia, yeɛ pɔngɔ ko biala koso ye nyɔboɛ te ɛdwetɛ sekel ɛyaa ko aburannu. Na ye dwadifoɛ nemɔ, né besa bɛfa nningyein bɔ bahera ne bie bɛkɔma Hiti ahemvo amukoraa ne Siria ahemvo amukoraa maa bɛtɔ.