1 Yohane 4 - AHYERƐLƐ KRONGRON

Nahorɛ Sunzum ne ngondombo sunzum

¹ Aliɛmaa mɔ, nna sunzum biala yeɛ ɔsɛ kyɛ ɛmɔde ye bedi ɔ, na mmom ɛmɔso sunzum nemɔ bɛnea sɛ aso bɛte Nyameɛ deɛ anaa; ofikyɛ ngondombo ngɔmhyɛlɛfoɛ pee badwɔso wɔ wiase.

² Ɛhe yeɛ ɔmaa yɛnwu Nyameɛ Sunzum ɔ: Sunzum biala bɔ ode to nu kyɛ Yesu Kristo awa anwoɔnaen nu ne te Nyameɛ deɛ.

³ Nakoso sunzum biala bɔ onne ndo nu kyɛ Yesu Kristo awa anwoɔnaen nu ne, ɔtte Nyameɛ deɛ, na mmom ɔte antikristo bɔ ɛmɔate kyɛ ɔba ná wanya wawa wiase ne deɛ.

⁴ Me ngwadaa mɔ, ɛmɔ de ɛmɔte Nyameɛ deɛ na ɛmɔali bɛ so ngonim; ofikyɛ bɔ ɔte ɛmɔ nu ne, ɔte piri tra bɔ ɔwɔ wiase ne.

⁵ Nakoso bɛ de bɛte wiase deɛ, yiti ewiase dwirɛ yeɛ bɛkã ɔ, na ewiase koso tie bɛ dwirɛ.

⁶ Yɛ de, yɛte Nyameɛ deɛ, na ebiala bɔ ɔse Nyameɛ ne, otie yɛ dwirɛ; nakoso bɔ ɔtte Nyameɛ deɛ ne de ondie yɛ dwirɛ. Na ɛhe yeɛ ɔmaa yɛnwu nahorɛ Sunzum ne ngondombo sunzum ɔ.

Nyameɛ sue te ɔdɔ

⁷ Aliɛmaa mɔ, ɛ́mɔma yɛhurohuro yɛ nwo dwirɛ, ofikyɛ ɔdɔ fi Nyameɛ berɛ, na ebiala bɔ ole ɔdɔ ne te Nyameɛ awa, na ɔse Nyameɛ.

⁸ Nakoso ebiala bɔ olle ɔdɔ ne, ɔnze Nyameɛ, ofikyɛ Nyameɛ te ɔdɔ.

⁹ Kyɛbɔ Nyameɛ yele ye dɔ ne ali wɔ yɛ nu ɛhe: Nyameɛ somane Ɔwa komapɛ twe ne maa ɔwale wiase, amaa ɔnate ye so yanya ngoa.

¹⁰ Bɔ okyire ɔdɔ ɛhe: nna kyɛ yɛ yeɛ yɛhurole Nyameɛ dwirɛ ɔ, na mmom ye yeɛ ohurole yɛ dwirɛ ná ɔsomane Ɔwa ne maa ɔɔyɛle yɛ bɔne nwo mbata ɔ.

¹¹ Aliɛmaa mɔ, sɛ sɔ yeɛ Nyameɛ kuro yɛ dwirɛ a, ye de odi kyɛ yɛ koso yɛkurokuro yɛ nwo dwirɛ.

¹² Ebiala nye nnwuni Nyameɛ le, nakoso sɛ yɛkurokuro yɛ nwo dwirɛ a, Nyameɛ tena yɛ nu, na ye dɔ ne di mu bɔkɔɔ wɔ yɛ nu.

¹³ Ɛhe yeɛ ɔmaa yɛnwu kyɛ yɛte ye nu ná ye koso ɔte yɛ nu ɔ: ye ole kyɛ wafa ye bɔbɔ ye Sunzum ne wama yɛ.

¹⁴ Yanwu ye, na yɛdi adanzeɛ kyɛ Baba ne somane Baa ne maa ɔɔyɛle wiase Ngoadefoɛ.

¹⁵ Na ebiala bɔ ɔpakye nu kã kyɛ Yesu ole Nyameɛ Awa nen, Nyameɛ te ye nu, na ye koso ɔte Nyameɛ nu.

¹⁶ Yanwu yɛ nwo dɔ bɔ Nyameɛ le ye ne, yeɛ yɛde yɛdi koso. Nyameɛ te ɔdɔ, na ebiala bɔ ole ɔdɔ ne te Nyameɛ nu, na Nyameɛ koso te ye nu.

¹⁷ Ɛhe anu yeɛ ɔdɔ di mu wɔ yɛ nu ɔ, amaa yanya anyelasoɛ wɔ ndɛenbualɛ kyẽa ne; ofikyɛ kyɛbɔ ɔte ne, sɔ ala yeɛ yɛte wɔ wiase wa ɔ.

¹⁸ Esuronyi nne ɔdɔ nu, na mmom ɔdɔ bɔ odi mu ne, otutu esuronyi bo, ofikyɛ esuronyi ne asohwenɛ nwo ahunundetelɛ yeɛ bɛnate ɔ, na ebiala bɔ osuro ne, ye ɔdɔ nni mu.

¹⁹ Yɛkuro ye dwirɛ, ofikyɛ ye yeɛ olili moa hurole yɛ dwirɛ ɔ.

²⁰ Na sɛ ebie kã kyɛ “Mekuro Nyameɛ dwirɛ”, nakoso ɔpɔ oliɛma a, né ɔte ngondomboniɛ, ofikyɛ sɛ ebie nguro oliɛma bɔ onwu ye ne dwirɛ a, ɔkɔyɛ sɛɛ ná wahora wahuro Nyameɛ bɔ onnwu ye ne dwirɛ?

²¹ Na ahyɛdeɛ bɔ wafa wama yɛ ɛhe: ebiala bɔ okuro Nyameɛ dwirɛ ne, odi kyɛ okuro oliɛma koso dwirɛ.