1 Yohane 2 - AHYERƐLƐ KRONGRON

Kristo te yɛ bokafoɛ

¹ Me ngwadaa mɔ, mekyerɛ he mebrɛ ɛmɔ amaa ɛmɔanyɔ bɔne. Nakoso sɛ ebie yɔ bɔne a, yɛle kamafoɛ wɔ Baba ne nyunu bɔ ye ole teneneeniɛ Yesu Kristo.

² Ɔte yɛ bɔne nwo mbata; nna yɛ ngome yɛ deɛ nwo; na mmom ɔte wiase amukoraa koso bɔne nwo mbata.

³ Sɛ yɛdi ye ahyɛdeɛ so a, yeɛ okyire kyɛ yɛse ye ɔ.

⁴ Na sona bɔ ɔkã kyɛ, “Mese ye”, nakoso onni ye ahyɛdeɛ so ne, ɔte ngondomboniɛ, na nahorɛ nne ye nu.

⁵ Nakoso ebiala bɔ odi ye dwirɛ so ne yeɛ Nyameɛ dɔ ne di mu wɔ ye nu amba ɔ. Ɛhe yeɛ ɔmaa yɛnwu kyɛ yɛ ne ye atira abiɛngoɛ ɔ.

⁶ Na ebiala bɔ ɔnwa ɔne Nyameɛ atira abiɛngoɛ nen, odi kyɛ ye koso ɔbɔ ye bra kyɛbɔ Kristo bɔle ye deɛ ne.

Ahyɛdeɛ foforɛ

⁷ Aliɛmaa mɔ, nna ahyɛdeɛ foforɛ, na mmom ahyɛdeɛ daa ne ala bɔ ahyɛaseɛ ne ɛmɔnyane ye ne yeɛ mekyerɛ mebrɛ ɛmɔ ɔ. Na sɔ ahyɛdeɛ daa ne ole edwirɛ bɔ ɛmɔate fite ahyɛaseɛ ne.

⁸ Nakoso ɛnea a, ahyɛdeɛ foforɛ yeɛ mekyerɛ mebrɛ ɛmɔ ɔ, na ɔte nahorɛ wɔ ye nu ne ɛmɔ nu; ofikyɛ awosii ne gu so ɔpɛ nu kɔ, na nahorɛ kanea ne ata dada.

⁹ Na ebiala bɔ ɔkã kyɛ ɔwɔ kanea ne anu, nakoso ɔpɔ oliɛma ne, ɔtɛte awosii nu.

¹⁰ Sona bɔ okuro oliɛma dwirɛ ne te kanea ne anu, na nikye fee nne ye nu bɔ ɔto ebie sundidua ɔ.

¹¹ Nakoso ebiala bɔ ɔpɔ oliɛma ne te awosii nu, ɔnate awosii nu, na ɔnze nekaa bɔ ɔkɔ ɔ, ofikyɛ awosii ne ama ye nye asi.

¹² Me ngwadaa mɔ, mekyerɛ he mebrɛ ɛmɔ, ofikyɛ ɔnate Kristo dumaa ti bafa ɛmɔ bɔne bahyɛ ɛmɔ.

¹³ Ngya mɔ, mekyerɛ he mebrɛ ɛmɔ, ofikyɛ ɛmɔse bɔ ahyɛaseɛ ne né ɔwɔ berɛ ne. Mmerandeɛ mɔ, mekyerɛ he mebrɛ ɛmɔ, ofikyɛ ɛmɔali bɔnefoɛ ne so ngonim. Ngwadaa mɔ koso, mekyerɛ he mebrɛ ɛmɔ, ofikyɛ ɛmɔse Baba ne.

¹⁴ Ngya mɔ, mahyerɛ he mabrɛ ɛmɔ, ofikyɛ ɛmɔse bɔ né ɔwɔ berɛ ahyɛaseɛ ne. Mmerandeɛ mɔ koso mahyerɛ he mabrɛ ɛmɔ, ofikyɛ ɛmɔatindim, Nyameɛ dwirɛ ne te ɛmɔ nu, na ɛmɔali bɔnefoɛ ne so ngonim.

¹⁵ Nnɛma ɛmɔkuro ewiase anaa nu nningyein dwirɛ. Na sɛ ebie kuro ewiase dwirɛ a, né Baba ne dɔ nne ye nu.

¹⁶ Ofikyɛ bɔ ɔwɔ wiase amukoraa: anwoɔnaen akɔnnɔ, anyeboroborolɛ, asetena nu anwohoahoa offi Baba ne berɛ, na mmom ofi wiase.

¹⁷ Ewiase ne nu akɔnnɔ gu so ɔpɛ nu kɔ, nakoso sona bɔ ɔyɔ Nyameɛ apɛdeɛ ne te ase afebɔɔ.

Kristo pɔfoɛ ne nwo kɔkɔbɔlɛ

¹⁸ Me mma mɔ, ayieleɛ mmerɛ ne apingye. Na kyɛbɔ ɛmɔate ye daa kyɛ antikristo ne ɔ́ba ne, sɔ ala yeɛ kekesaala ye antikristo pee bawa ɔ; na ɛhe maa yɛnwu ye kyɛ ayieleɛ ne ala ɛne.

¹⁹ Befi yɛ nu yeɛ bɛhɔle ɔ, nakoso né bɛmmɔ yɛ fekue ne bie. Ofikyɛ sɛ bɛbɔ yɛ fekue ne bie a, ahaa bɛ ne yɛ hɔle so tenane. Na bafi yɛ nu maa wala ali kyɛ bɛ mukoraa bɛmmɔ yɛ fekue ne bie.

²⁰ Nakoso ɛmɔ de, Krongronniɛ ne wapopa ɛmɔ ngoo, yiti ɛmɔse nikyee biala.

²¹ Nna kyɛ ɛmɔnze nahorɛ ne ti yeɛ mekyerɛ he mebrɛ ɛmɔ ɔ, na mmom kyɛ ɛmɔse, na afei ɛmɔsa bɛse kyɛ ngondombo biala mvi nahorɛ nu mma.

²² Nwa yeɛ ɔte ngondomboniɛ ɔ? Sona bɔ onne Yesu ndo nu kyɛ ye ole Kristo ne. Sɔ sona ne te antikristo, ofikyɛ onne Baba ne ɔne Baa ne ndo nu.

²³ Sona biala bɔ onne Baa ne ndo nu ne, onne Baba ne koso ndo nu, nakoso ebiala bɔ ode Baa ne to nu ne, ode Baba ne koso to nu.

²⁴ Yiti ɛ́mɔma edwirɛ bɔ ɛmɔate bafi ahyɛaseɛ ne ɔtena ɛmɔ nu. Na sɛ bɔ ɛmɔate bafi ahyɛaseɛ ne tena ɛmɔ nu a, ɛmɔ koso ɛmɔkɔtena Baa ne ne Baba ne nu daa.

²⁵ Na bɔ wafa wahyɛ yɛ bɔ ole daa ngoa.

²⁶ Bɔ mekyerɛ mebrɛ ɛmɔ ye fa bɛ bɔ bɛlakalaka ɛmɔ ne nwo.

²⁷ Nakoso ɛmɔ de, ngoo bɔ wafa wapopa ɛmɔ ne, ɔte ɛmɔ nu, yiti onhia kyɛ ebie kohyirehyire ɛmɔ ɔ. Na sɔ ngoopalɛ ne ala kyirekyire ɛmɔ nikyee biala, ɔkã nahorɛ, ɔmbɛ ngondombo, na kyɛbɔ wahyirehyire ɛmɔ ne, ɛmɔli so.

²⁸ Na afei me ngwadaa mɔ, ɛmɔhɔ so bɛtena ye nu, amaa sɛ ye walɛ ne dwu ná ɔye ye nwo ali a, yahora yasi y’ahone, na yamvɛre wɔ ye nyunu.

²⁹ Na sɛ ɛmɔse kyɛ ɔte teneneeniɛ a, nzaade ɛmɔse kyɛ ebiala bɔ ɔyɔ bɔ ɔtengyɛ ne te Nyameɛ awa.