1 Timoteo 6 - AHYERƐLƐ KRONGRON

¹ Bɛ bɔ bɛwɔ ngoaasolɛ nu amukoraa, maa bebu bɛ mene mɔ kyɛ anidie amukoraa fata bɛ, amaa ɔnate so Nyameɛ dumaa ne ngyerɛkyerɛ ne nwo angua fiɛ.

² Bɛ bɔ bɛ mene mɔ te agyidifoɛ nen, nnɛmaa bɛfa ye kyɛ bɛte aliɛmaa ti bebu meneɛ nemɔ animtia; na mmom ɔsɛ kyɛ bɛyere bɛ nwo bɛso bɛ yé; ofikyɛ bɛ bɔ benya bɛ solɛ ne nwo mvasoɛ ne, bɛte agyidifoɛ ne adɔfo. Sɔ nningyein hemɔ yeɛ kyirekyire, ná tu ye nwo foɛ ɔ.

Ngondombo ngyerɛkyerɛ

³ Sɛ ebie yɛ ngyerɛkyerɛ foforɛ, ná wambene y’Awurade Yesu Kristo nahorɛ dwirɛ ne ɔne ngyerɛkyerɛ bɔ ɔkɔ nyamesom paa nu ne aso a,

⁴ sɔ sona ne moma ye nwo so, na ɔnze huu, aporowaasulɛ ne aporowaasulɛ kyengyekyengye ali ye ti; na bɔ ofi nu ba ole anyeboroborolɛ, mbakyembakyemuɛ, nzekure, mmenia nwo adwenemmɔne,

⁵ manzoenhwenɛ wɔ mmenia bɔ b’adwene awu ɔ nu, bɔ bɛne nahorɛ abɔ nzahoɛ, bɔ besusu kyɛ nyamesom paa ma sona nya ye nwo ɔ.

⁶ Nakoso nyamesom paa bɔ ɔma wɔ kunu dwo wɔ ne, ɔte anwonya piri;

⁷ ofikyɛ yamva hwee yamma wiase, yeɛ yɛngɔhora ngɔfa hwee ngofi wiase ngɔhɔ.

⁸ Yiti sɛ yɛle bɔ yɛdi ɔne bɔ yɛfa yɛkata yɛ nwo a, ɔsɛ kyɛ yɛma yɛ nye sɔ.

⁹ Nakoso bɛ bɔ bɛpena kyɛ benya bɛ nwo ne, bɛtɔ nzɔhwɛ ne ngaen ne ngwaseaa akɔnnɔ bɔ ɔtte mayee mma sona, bɔ ɔfa bɛ kɔ ɛsɛkyelɛ ne eminilɛ nu ne anu ɔ.

¹⁰ Ofikyɛ bɔne amukoraa ndii ole sikanyeboro, bɔ ebiemɔ ali ye si bali makyebu bafi gyidie ne anwo, bɔ yiti bahwehwe aworabɔlɛ pee babrɛ bɛ nwo ɔ.

Pɔɔlo tu Timoteo foɛ

¹¹ Na wɔ, Nyameɛ sona, wɔ de, twe wɔ nwo fi ɛhemɔ anwo, ná fa tenenee, nyamesom paa, gyidie, ɔdɔ, animia ne anwobrɛaseɛ sie wɔ nye so.

¹² Ko gyidie koɛ paa ne; sɔ daa ngoa bɔ bɛfrɛle wɔ bɛwale nu, bɔ ɛpakyele nu hane ye yé wɔ adanzefoɛ pee bɛ nyunu ne anu.

¹³ Nyameɛ bɔ ɔma nningyein amukoraa ngoa, ɔne Kristo Yesu bɔ ɔpakyele nu hane ye yé, ná olili adanzeɛ wɔ Pontio Pilato nyunu ne, metu wɔ foɛ wɔ bɛ nyunu,

¹⁴ kyɛ, di ahyɛdeɛ ne aso bɔ ngekalewa anaa edwirɛ biala ngɔwa ye nwo, kɔpem y’Awurade Yesu Kristo ye nwo aliyelɛ ne.

¹⁵ Na bɔ ɔkɔma ɛhe kɔla ali wɔ mmerɛ bɔ ɔsɛ ɔ nu ole saleɛniɛ ne Tuminiɛ komapɛ twe ne, ahemvo mɔ nu Hene ne meneɛ mɔ nu Meneɛ ne,

¹⁶ bɔ ye ngome twe yeɛ onwu, ná ɔwɔ berɛ afebɔɔ, bɔ ɔte kanea bɔ ebie ngora mbingye ye nu, bɔ ebiala nnwuni ye le, ná ebiala ngɔhora ngonwu ye ne. Ye yeɛ anidie ne daa tumi te ye deɛ ɔ! Amen.

Pɔɔlo tu sikafoɛ foɛ

¹⁷ Dwudwo kyire sikafoɛ bɔ bɛwɔ wiase, kyɛ nnɛmaa bɛmoma bɛ nwo so, anaakyɛ nnɛmaa bɛfa bɛ nye bɛto anwonyadeɛ bɔ ɔpɛ nu kɔ ɔ so; na mmom ɔsɛ kyɛ bɛfa bɛ nye bɛto Nyameɛ bɔ ɔma yɛ nningyein amukoraa mmorosoɛ ma yɛ nye gye ne aso.

¹⁸ Bɔ bɛ kɔkɔ kyɛ bɛ́yɔ bɔ ɔte paa ɔ, kyɛ bɛyɛ sikafoɛ wɔ nnwumaa paa nu, ná bɛye bɛ kunu bɛyɛ adɔeɛ,

¹⁹ ná bɛ́fa bɛ́to fapem paa besie berɛ bɛma bɛ nwo kyẽa bie; amaa ɔnate so bɛ sa ahã daa ngoa ne.

Ayieleɛ

²⁰ O Timoteo, nea bɔ bafa bawura wɔ sa ne aso yé. Twe wɔ nwo fi edwudwolɛ fiɛ ne aporowaasulɛ mbaen mbaen bɔ bɛyɛ mvomsoɛ bebu ye kyɛ ɔte nimdeɛ ne nwo.

²¹ Na ɛhe yeɛ ebiemɔ bale bato nu, ná bali makyebu bafi gyidie ne anwo ɔ. Adom ɔyɛ ɛmɔ deɛ. Amen.