1 Timoteo 3 - AHYERƐLƐ KRONGRON

Asɔre nu mbanyi

¹ Edwirɛ nahorɛ ɛhe: Sɛ ebie kuro neafoɛ adwuma a, né wafa adwuma paa.

² Ɔsɛ kyɛ neafoɛ ne ɔyɛ sona bɔ ngekalewa biala nne ye bra nu ɔ, ɔye yɛ komapɛ, ye nye la berɛ, ye nye dwo ase, ye suban te paa, okuro ɛwɔfoɛsolɛ, ɔse ngyerɛkyerɛ yɛ,

³ ɔnzɛ kyɛ ɔyɛ akɔnomnzaniɛ, ahupoo, na mmom ɔsɛ kyɛ odwo; ɔnzɛ kyɛ okuro ngondii, anaa ɔma ye nye boro sikaa.

⁴ Ɔsɛ kyɛ ɔyɛ sona bɔ ɔkora bu ye bɔbɔ ye awuro yé, ná ɔtete ye mma maa bebu ye wɔ atee biala so ɔ.

⁵ Ofikyɛ sɛ ebie nze kyɛbɔ osi bu ye bɔbɔ ye awuro yé a, ɔkɔyɛ sɛɛ né wahora wanea Nyameɛ asɔre so?

⁶ Ɔnzɛ kyɛ ɔyɛ sona bɔ ɔte gyidiniɛ foforɛ ɔ, ná wammoma ye nwo so ma wannya abɔnzam foɛbualɛ ne bie.

⁷ Afei koso, ɔsɛ kyɛ ɔyɛ ebie bɔ mmenia bɔ bɛnne yeɛ fekue ne anu ɔ bɛbɔ ye dumaa paa ɔ, ná ye nyunu angua ase ma wandɔ abɔnzam ngaen nu.

Asɔre nu asomvoɛ

⁸ Sɔ ala yeɛ ɔsɛ kyɛ asɔre nu asomvoɛ mɔ bɛyɛ mmenia bɔ bɛ nyunu le animnyam ɔ, bɔ bɛkã nahorɛ, na mmom bɛtte akɔnomnzafoɛ ne adifuufoɛ ɔ;

⁹ ɔsɛ kyɛ bɛfa tiboa bɔ ommua bɛ foɛ ɔ bɛsɔ gyidie mvealeɛ nu dwirɛ ne anu.

¹⁰ Maa beli moa beso bɛ bɛnea koraka, na sɛ edwirɛ biala nne bɛ nwo a, né afei bamaa bayɛ asomvoɛ.

¹¹ Sɔ ala yeɛ ɔsɛ kyɛ bɛ ye mɔ koso bɛyɛ mmenia bɔ bɛ nyunu le animnyam ɔ, bɔ bɛmmɔ nzekure, na mmom bɛ nwo dwo, ná bedi nahorɛ wɔ nikyee biala nu ɔ.

¹² Asɔre nu asomvoɛ mɔ, ɔsɛ kyɛ ebiala ɔye yɛ komapɛ, yeɛ ɔsɛ kyɛ bɛyɛ mmenia bɔ bɛkora bɛ mma ne bɛ bɔbɔ b’awuro so nea ɔ.

¹³ Ofikyɛ bɛ bɔ bɛyɔ somvoɛ adwuma ne yé ne, benya dumaa paa ne nyinasoɛ pindinn wɔ gyidie bɔ ɔwɔ Kristo Yesu nu ne anu.

Mvealeɛ nu dwirɛ piri ne

¹⁴ Me nye la so kyɛ ɔngɔhyɛ biala ngɔwa wɔ berɛ, nakoso mekyerɛ ɛhemɔ mebrɛ wɔ koraka,

¹⁵ amaa sɛ ɔba kyɛ mekyɛ ná mmmale a, anwu kyɛbɔ ɔsɛ kyɛ ɛbɔ wɔ bra wɔ Nyameɛ awuro, bɔ ɔte Nyameɛ teasefoɛ n’asɔre, nahorɛ nyinasoɛ ne fapem ne anu.

¹⁶ Aporowaa biala nne ye nwo kyɛ nyamesom nu mvealeɛ nu dwirɛ ne ɔte piri: Nyameɛ lale ye nwo ali anwoɔnaen nu, olili be wɔ Sunzum nu; abɔfo mɔ nwuni ye, bɛbɔle ye nwo dawure wɔ maen maen nu; belele ye belili wɔ wiase, na bɛfale ye bɛhɔle nyameɛso animnyam nu.