1 Tɛsalonikafoɛ 5 - AHYERƐLƐ KRONGRON

Ɛ́mɔsiesie ɛmɔ nwo bɛ́ma Awurade walɛ ne

¹ Aliɛmaa mɔ, mmerɛ ne ne ngyẽa ne de, onhia kyɛ yɛkɔhyerɛ ye nwo dwirɛ yɛkɔbrɛ ɛmɔ ɔ.

² Ofikyɛ ɛmɔ bɔbɔ ɛmɔse ye pefee kyɛ Awurade kyẽa ne kɔwa kyɛbɔ awueniɛ ba kɔngɔen ɔ.

³ Na mmerɛ bɔ mmenia kɔhã kyɛ, “Yɛle asomdwee ne anwotɔ” nen, yeɛ ewue kɔto bɛ mvum nu kyɛ koɛhalɛ bɔ ɔka brasua bɔ wafo aworɛ so ɔ, na bengonya bɛ ti bengodidi nu.

⁴ Nakoso aliɛmaa mɔ, ɛmɔ de ɛmɔnne awosii nu, ná kyẽa ne waafũ ɛmɔ nu kyɛ awueniɛ.

⁵ Ɛmɔ amukoraa ɛmɔte kanea mma ne alehyeleɛ mma. Yɛtte alesaleɛ anaa awosii mmaa.

⁶ Yiti nnɛmɔma yɛdafe kyɛbɔ ebiemɔ bɛyɔ ne; na mmom ɛ́mɔma yɛwɛne, ná yɛma yɛ nye la berɛ.

⁷ Ɔnate kyɛ, bɛ bɔ bɛda ne, kɔngɔen yeɛ bɛda ɔ; yeɛ bɛ bɔ bɛno nzaa bɛbo ne, kɔngɔen yeɛ bɛbo ɔ.

⁸ Nakoso ɔnate kyɛ yɛte alehyeleɛ mma ne ati, ɛ́mɔma yɛ nye la berɛ ná yɛfa gyidie ne ɔdɔ yɛyɛ koɛ buralɛ yɛkata yɛ hue so, na yɛfa ngoalelɛ nwo anyelasoɛ yɛyɛ koɛ buralɛ kyerɛ yɛwura.

⁹ Ofikyɛ Nyameɛ amvrɛ yɛ amma ye yaafɛlɛ nu, na mmom kyɛ yɛfa y’Awurade Yesu Kristo so yɛnya daa ngoa.

¹⁰ Ye yeɛ owu mane yɛ ɔ, amaa sɛ yɛte ase oo, yɛwu oo, yɛne ye yaatena.

¹¹ Yiti ɛ́mɔtutu ɛmɔ nwo foɛ, ná ɛ́mɔbokaboka ɛmɔ nwo, kyɛbɔ ɛmɔyɔ ne ala.

Foɛtulɛ ne ngraalilɛ

¹² Aliɛmaa mɔ, yɛsrɛ ɛmɔ kyɛ, ɛ́mɔfa anidie bɛ́ma bɛ bɔ bɛyɔ adwuma wɔ ɛmɔ nu, ná bedi ɛmɔ so panyi wɔ Awurade nu, ná betu ɛmɔ foɛ ne;

¹³ na ɔnate b’adwuma ti ɛ́mɔfa anidie paa ne ɔdɔ bɛ́ma bɛ. Ɛ́mɔtena asomdwee nu.

¹⁴ Afei koso aliɛmaa mɔ, yɛsrɛ ɛmɔ kyɛ, ɛ́mɔbɔ bɛ bɔ bɛnate basabasa nemɔ kɔkɔ, ɛ́mɔkyekye bɛ bɔ b’abasa nu abu nemɔ wora, ɛ́mɔboka bɛ bɔ bayɛ mmerɛ ne, ná ɛ́mɔnya sona biala nwo aboterɛ.

¹⁵ Ɛ́mɔnea yé ná ebiala amva bɔne andua bɔne kerɛ, na mmom ɛ́mɔnea kyɛ daa biala ɛmɔkɔyɔ paa bɛkɔmoma ɛmɔ nwo ne mmenia amukoraa.

¹⁶ Ɛ́mɔli ahurusi daa;

¹⁷ nnɛma ɛmɔyakyi mbaeɛbɔlɛ le!

¹⁸ Ɛ́mɔfa asennaa bɛ́ma Nyameɛ wɔ nikyee biala nu, ofikyɛ ɛhe yeɛ ɔte Nyameɛ apɛdeɛ wɔ Kristo Yesu nu ma ɛmɔ ɔ.

¹⁹ Nnɛma ɛmɔnua Sunzum Krongron see ne;

²⁰ nnɛma ɛmɔbu ngɔmhyɛlɛ animtia,

²¹ na mmom ɔsɛ kyɛ ɛmɔso nningyein amukoraa bɛnea: na bɔ ɔte paa ne, ɛ́mɔsɔ nu yé,

²² ná ɛmɔhwe ɛmɔ nwo befi bɔne sue mukoraa nwo.

²³ Na asomdwee Nyameɛ ne, yɛsrɛ kyɛ ye bɔbɔ ɔte ɛmɔ nwo bɔkɔɔ, ná ɔnea ɛmɔ sunzum ne ɛmɔ kra ne ɛmɔ nipadua so, bɔ ngekalewa biala ngɔwa ye nwo kɔpem kyɛ y’Awurade Yesu Kristo kɔwa ɔ.

²⁴ Bɔ ɔfrɛ ɛmɔ ne odi nahorɛ, na ɔkɔyɔ koso amba.

²⁵ Aliɛmaa mɔ, ɛ́mɔbɔ mbaeɛ bɛma yɛ.

²⁶ Ɛmɔyɛ aliɛmaa nemɔ amukoraa awaawaatuu krongron nu.

²⁷ Méfa ahyɛdeɛ mema ɛmɔ wɔ Awurade nu kyɛ, ɛ́mɔkenga krataa he behyire agyidifoɛ nemɔ amukoraati.

²⁸ Y’Awurade Yesu Kristo adom ne ɛmɔ bɛtena. Amen.