1 Tɛsalonikafoɛ 3 - AHYERƐLƐ KRONGRON

Pɔɔlo soma Timoteo wɔ Tɛsalonika

¹ Afei de, né yɛsɔ nu a ɔnzɔ ko. Yiti yɛyɛle kyɛ yɛ ngome yɛkɔha Atense,

² na yɛsomane aliɛmaa Timoteo bɔ ɔte Nyameɛ somvoɛ, ná ɔne yɛ yɔ Kristo nzɛmba ne nwo adwuma ne, kyɛ ɔɔhyɛ ɛmɔ nguraen ná ɔma ɛmɔ gyidie gyina pindinn;

³ amaa sɔ amaneɛnwunɛ hemɔ ammo ɛmɔ nu biala so. Ofikyɛ ɛmɔ bɔbɔ ɛmɔse kyɛ amaneɛnwunɛ bɔ odi kyɛ yɛnwu ye hɔ ala ɛne.

⁴ Ɔnate kyɛ, mmerɛ bɔ né yɛwɔ ɛmɔ berɛ nen, yɛlili moa yɛhã yɛhyirele ɛmɔ kyɛ yɛkonwu amaneɛ, na kyɛbɔ ɛmɔse nen, sɔ ala koso yeɛ wasi ɔ.

⁵ Ɔnate ɛhe ati, mmerɛ bɔ né mesɔ nu a ɔnzɔ ne, nzomane ye kyɛ ɔɔnea kyɛbɔ ɛmɔ gyidie si gyi ɔ; na mesuro kyɛ ebiaa né abɔnzam aso ɛmɔ anea ama y’adwuma bɔ yɛyɔle ne wayɛ mbaen.

⁶ Nakoso afei de, Timoteo afi ɛmɔ berɛ wasa wawa yɛ wa, na wafa ɛmɔ gyidie ne ɔdɔ nwo dwirɛ fɛɛ waabɔ yɛ amaneɛ kyɛ daa ɛmɔkaye yɛ paa, na ɛmɔ wora dɔ yɛ, kyɛbɔ yɛ koso yɛ wora dɔ ɛmɔ ne ala.

⁷ Yiti aliɛmaa mɔ, y’anwokyere ne amaneɛnwunɛ mukoraa nu ne, ɛmɔ gyidie ne amaa yanya ɛmɔ nwo aworakyekyerɛ;

⁸ ofikyɛ, sɛ ɛmɔgyina pindinn wɔ Awurade nu a, né afei yanya ngoa.

⁹ Anigye wora bɔ ɔnate ɛmɔ ti yanya ye wɔ yɛ Nyameɛ nyunu ye, nzikyɛ asennaa bieku yeɛ yɛkɔhora yɛkɔfa yɛkɔma Nyameɛ wɔ ɛmɔ nwo ɔ?

¹⁰ Yɛfa y’ahone amukoraa alehyeleɛ ne alesaleɛ yɛsrɛ kyɛ ɔma yɛnwu ɛmɔ nyunu, ná yɛpagya bɔ ɔtɔ sii wɔ ɛmɔ gyidie nu ne.

¹¹ Yɛsrɛ kyɛ yɛ Baba Nyameɛ ne bɔbɔ ne y’Awurade Yesu bebukye ate bɛma yɛbra ɛmɔ berɛ.

¹² Yɛsrɛ kyɛ Awurade ɔma ehurolɛ bɔ ɛmɔkurokuro ɛmɔ nwo dwirɛ, ɔne mmenia mukoraa nwo dɔ ne onyi mmorosoɛ so, kyɛbɔ yɛ koso yɛkuro ɛmɔ dwirɛ ne ala,

¹³ amaa ɔnate so wasi ɛmɔ ahone pi, ná wayɛ ɛmɔ krongron bɔ ngekalewa biala nne nu wɔ yɛ Baba Nyameɛ nyunu, wɔ y’Awurade Yesu Kristo ne ye anwoteefoɛ amukoraa walɛ ne anu.