1 Samuel 5 - AHYERƐLƐ KRONGRON

Apam alaka ne wɔ Filistifoɛ berɛ

¹ Mmerɛ bɔ Filistifoɛ lele Nyameɛ apam alaka ne fili Yisrael sa nu nen, bɛfa befili Ebenesa bɛhɔle Asedɔde.

² Afei Filistifoɛ fale Nyameɛ apam alaka ne bɛhɔle bosoen Dagɔn sua nu, na bɛfa besiele Dagɔn nwo berɛ.

³ Na ye alehyeleɛ nu ngyerɛmɔ tutututu bɔ Asedɔdefoɛ dwɔsole ne, benwuni kyɛ Dagɔn amunu afi, bɔ ye nyunu butu ase wɔ AWURADE alaka ne nyunu ɔ. Yiti bɛmane Dagɔn so besa besiele ye boso.

⁴ Nakoso ye alehyeleɛ nu bieku, ngyerɛmɔ tutututu bɔ bedwɔsole ne, né Dagɔn amunu afi, bɔ ye nyunu butu ase wɔ AWURADE alaka ne nyunu ɔ. Né ebie abu Dagɔn ti ne ye sa nyɔ nemɔ wafi so bɔ bɛlela simbini ne aso ɔ. Né waha ye kundunzii ne angome.

⁵ Na ɔnate sɔ ati, ɛnɛ ne ɛnɛ ye po, Dagɔn ahɔmeɛ ne sona biala bɔ ɔkɔ Dagɔn so ne, bendia Dagɔn simbini bɔ ɔwɔ Asedɔde ne aso.

⁶ AWURADE tumi tuale Asedɔdefoɛ so kerɛ piri paa: ɔfale amaneɛ piri paa tole Asedɔde ne ye mbɔtam so, ɔmane mbɔmbɔ bobɔle bɛ.

⁷ Na Asedɔdefoɛ nwuni kyɛbɔ nningyein si sisi nen, bɛhane kyɛ, “Ɔnzɛ kyɛ yɛma Yisrael Nyameɛ apam alaka ne ɔka yɛ wa, ofikyɛ watua yɛ ne yɛ nyameɛ Dagɔn so kerɛ piri paa.”

⁸ Yiti bɛsomane maa bɛɛfrɛfrɛle Filisti ahemvo amukoraa maa beyiale, na bebisale bɛ kyɛ, “Yisrael Nyameɛ apam alaka ne, yɛ́yɛ ye sɛ koraa?” Na bebuale kyɛ, “Ɔsɛ kyɛ yɛye Yisrael Nyameɛ apam alaka ne yɛfi wa yɛkɔ Gate.” Yiti bɛyele Yisrael Nyameɛ apam alaka ne befili berɛ bɛhɔle Gate.

⁹ Nakoso bɛfa bɛhɔle Gate nen, AWURADE tumi tuale kuro ne aso kerɛ piri paa. Ahunundetelɛ piri paa tɔle bɛ so. Ɔmane kuro berɛ mbanyi ne ngwalaa mukoraa nwuni amaneɛ, na mbɔmbɔ bobɔle bɛ.

¹⁰ Yiti bɛmaa bɛfale Nyameɛ apam alaka ne bɛhɔle Ekron. Nakoso bɛfale Nyameɛ apam alaka ne bedwuli Ekron nen, Ekronfoɛ teateane nu kyɛ, “Bafa Yisrael Nyameɛ apam alaka ne bawa yɛ wa kyɛ bɛbaafa bekuku yɛ ne yɛ kuro ama.”

¹¹ Yeɛ bɛsomane maa bɛɛfrɛfrɛle Filisti ahemvo amukoraa maa beyiale, na besele bɛ kyɛ, “Ɛ́mɔye Yisrael Nyameɛ apam alaka ne béfi wa besa bɛɛfa besie ye boso, ná wangukũ yɛ ne yɛ kuro ama.” Ofikyɛ né ewue nwo ahunundetelɛ atɔ kuro ne aso amukoraa. Né Nyameɛ ama ɛhawo piri paa awa berɛ.

¹² Na bɛ bɔ banwu ne, mbɔmbɔ bobɔle bɛ, na kuro berɛ ama hɔle so bɛbɔle awuye piri paa.