1 Samuel 4 - AHYERƐLƐ KRONGRON

Filistifoɛ di Yisrael so ngonim

¹ Samuel noa dwirɛ dwuli Yisrael amukoraati. Filistifoɛ boaboale bɛ noa kyɛ bɛkwaafa koɛ bɛtoa Yisrael. Na Yisraelfoɛ tuli bi bɛhɔle kyɛ bɛ ne Filistifoɛ bɛkwaaho. Bɛkyekyele asikyeleɛ wɔ Ebenesa, yeɛ Filistifoɛ koso kyekyele asikyeleɛ wɔ Afeke.

² Filistifoɛ beegyinagyinane koɛ noa, na bɛwale Yisrael so. Koɛ ne anu yɛle se, na Filistifoɛ lili Yisrael so ngonim. Behuhuni Yisraelfoɛ mmienzua kɔyɛ apee nna wɔ koɛ ne anu.

³ Na mmerɛ bɔ Yisrael koɛhonɛfoɛ nemɔ sa wale b’asikyeleɛ ne anu ne, bɛ mbanyi mɔ bisale kyɛ, “Nzu ati yeɛ AWURADE amaa ɛnɛ yali ngoguo wɔ Filistifoɛ nyunu ye? Ɛ́mɔma yɛɛfa AWURADE apam alaka ne yɛfi Silo yɛbra, ná ɔɔtena yɛ nu ole yɛ fi yɛ pɔfoɛ mɔ sa nu.”

⁴ Yiti maen ne tuli mmenia maa bɛhɔle Silo, na Asafo AWURADE bɔ ɔte kɛrubim nemɔ b’afia ne, bɛɛfale ye apam alaka ne befili dɔ bɛwale. Hofini ne Finehase bɔ bɛte Eli mma nyɔ ne, né bɛwɔ Nyameɛ apam alaka ne anwo.

⁵ Na mmerɛ bɔ AWURADE apam alaka ne dwuli asikyeleɛ ne anu ne, Yisrael amukoraa bɔle ese mane aseɛ wosole.

⁶ Filistifoɛ tele esebɔlɛ nen, bɛhane kyɛ, “Esebɔlɛ bɔ ɔ́kɔ so wɔ Hebrifoɛ asikyeleɛ ye anu ye, ye bo ole sɛɛ?” Na Filistifoɛ tele kyɛ AWURADE alaka ne waadwu asikyeleɛ ne anu ne,

⁷ ɛserɛ hane bɛ, na bɛhane kyɛ, “Nyameɛ bie awa b’asikyeleɛ ne anu.” Na besa bɛbɔle awuye kyɛ, “Yawu oo, yawu oo! Edwirɛ sɔa de, yɛnnwuni bie le.

⁸ “Yawu oo, yawu oo! Nwa yeɛ ɔkɔpepɛ kole yɛ kofi nyameɛ tumifoɛ hemɔ bɛ sa nu ɔ? Nyameɛ hemɔ yeɛ bɛpraprale amaneɛ ahoroɔ beguale Misraimfoɛ so wɔ ɛserɛ so ne.

⁹ Filistifoɛ, ɛ́mɔma yɛ ahone yɛ se, ná yɛhyire kyɛ yɛte mmienzua, ná yanyɛ Hebrifoɛ nganga, kyɛbɔ bɛte yɛ nganga ye. Ɛ́mɔma yɛhyire kyɛ yɛte mmienzua ná yɛho.”

¹⁰ Yiti Filistifoɛ hone koɛ ne. Yisrael lili ngoguo, na koɛhonɛniɛ biala nwati hɔle ye tena sua nu. Mmenia pee totɔle, ofikyɛ Yisrael koɛhonɛniɛ apee aburasa bɔ bɛnate ase yeɛ bɛtotɔle ɔ.

¹¹ Filistifoɛ lele Yisrael sa nu Nyameɛ alaka ne, na Hofini ne Finehase bɔ bɛte Eli mma nyɔ ne koso bɛtotɔle.

Eli wue

¹² Benyaminniɛ bie tuli amirika fili koɛ ne noa wale Silo sɔ kyẽa ne ala. Né wasunzua ye ndaadeɛ nu, yeɛ né wafa nnɛterɛ koso wagua ye ti so.

¹³ Mmerɛ bɔ oodwuli ne, né Eli te ye bia nu wɔ atee noa ɔnea ate, ofikyɛ né ye kunu tete ye ma Nyameɛ apam alaka ne. Biaa ne wale kuro ne anu ɔɔbɔle amaneɛ, na kurotue ne amu sɔle awuyebɔlɛ nu.

¹⁴ Na Eli tele awuyebɔlɛ nen, obisale kyɛ, “Awuyebɔlɛ ye, ye bo ole sɛɛ?” Na biaa ne wale Eli nwo berɛ ndɛndɛ ɔɔbɔle ye amaneɛ.

¹⁵ Né Eli ali afoɛ aburahona ne mmɔtwɛ, yeɛ né ye nye so ayɛ ye musinamusina bɔ onnwu nikyee ɔ.

¹⁶ Biaa ne sele Eli kyɛ, “Me yeɛ mafi koɛ noa mawa ne. Ɛnɛ ala yeɛ nwati mvili koɛ ne anu mmale ɔ.” Na Eli bisale ye kyɛ, “Mma, koɛ ne oosili sɛɛ?”

¹⁷ Na bɔfoɛ ne buale kyɛ, “Yisrael anwati afi Filistifoɛ nyunu, ɛlɔen ne koso bɛ nu pee atotɔ, Hofini ne Finehase bɔ bɛte wɔ mma nyɔ ne koso bawu, yeɛ Nyameɛ apam alaka ne koso bale bafi Yisrael sa nu bahɔ.”

¹⁸ Na ɔbɔle Nyameɛ apam alaka ne dumaa pɛ, Eli fili ye bia ne anu muni fale ye si ɔɔtɔle pambim ne anwo, ye kɔme anu buli, na owuli, ofikyɛ né wayɛ aworowaa, yeɛ afei né wayɛ piri paa. Né wabu Yisrael maen ne afoɛ aburanna.

Finehase aye ne wue

¹⁹ Eli sia, bɔ ɔte Finehase aye ne, né ɔnwonzɛ bɔ waha kãa maa ɔwo ɔ. Mmerɛ bɔ ɔtele kyɛ bale Nyameɛ apam alaka ne bahɔ, ɔne kyɛ ye sia ne ohu koso bawu ne, ye ko hale ye mbendene so, na ɔkotole berɛ wole.

²⁰ Na mmerɛ bɔ ɔpena ka nu ne, mmrasua bɔ belele ye aworɛ ne sele ye kyɛ, “Nnɛsuro, ofikyɛ awo bienzua.” Nakoso wandɛ bɛ so, yeɛ wandie bɛ.

²¹ Ɔtole akwadaa ne dumaa Yikabode, bɔ ye bo kyire: “Animnyam ne atu afi Yisrael.” Ɔnate kyɛ, né bale Nyameɛ apam alaka ne bahɔ, yeɛ afei né ye sia ne ohu koso bawu.

²² Na osele kyɛ, “Animnyam ne atu afi Yisrael, ofikyɛ bale Nyameɛ apam alaka ne bahɔ”.