1 Samuel 31 - AHYERƐLƐ KRONGRON

Sɔɔlo ne ye mma mmienzua nemɔ wue

¹ Afei Filistifoɛ fale koɛ bɛɛtetale Yisrael. Yisrael mmienzua nwati fili Filistifoɛ nyunu, na bɛ nu pee totɔle wɔ Gilboa bokaa ne aso.

² Filistifoɛ pole Sɔɔlo ne ye mma mmienzua nemɔ aso, na behuhuni Sɔɔlo mma mmienzua Yonatan, Abinadabo ne Malkisua.

³ Koɛ ne anu yɛle se mane Sɔɔlo. Filisti agyaentolɛfoɛ nemɔ nwuni ye, na bɛtole agyaen besinane ye maa opurale paa.

⁴ Na Sɔɔlo sele ye somvoɛ bɔ otira ye akodeɛ ne kyɛ, “Twe wɔ ngrandɛ ne fa wɔ me. Anyɔ a, mmenia hemɔ bɔ bɛmbɛ bɛ bienzua ye, bɛkɔɔfa bie bɛkɔwɔ me ná bagoro me nwo.” Nakoso ye somvoɛ bɔ otira ye akodeɛ ne ambene so kyɛ ɔkɔyɔ sɔ ɔ, ofikyɛ ɛserɛ piri hane ye. Yiti Sɔɔlo fale ye bɔbɔ ye ngrandɛ ne, na ɔtole ye nwo yele so huni ye nwo.

⁵ Mmerɛ bɔ Sɔɔlo somvoɛ bɔ otira ye akodeɛ ne nwuni kyɛ Sɔɔlo awu nen, ye koso ɔtole ye nwo yele ye ngrandɛ so ɔne Sɔɔlo bewuli.

⁶ Yiti Sɔɔlo ne ye mma mmienzua nza ne, ye somvoɛ bɔ otira ye akodeɛ ne, yeɛ ye koɛhonɛfoɛ bɔ bɛtotɔle ne, bɛ mukoraa bɛtotɔle ɛlɛho.

⁷ Na Yisrael koɛhonɛfoɛ bɔ né bɛwɔ bɔnza ne asi dɔ ne, ɔne bɛ bɔ né bɛwɔ asue Yɔɔdan si dɔ ne, mmerɛ bɔ benwuni kyɛ Yisrael koɛhonɛfoɛ nemɔ banwati, ná Sɔɔlo ne ye mma mmienzua nemɔ koso bawuwu nen, bɛnwatili befili bɛ nguro nemɔ aso, na Filistifoɛ wale bɛɛfale nguro nemɔ bɛtenane so.

⁸ Aleɛ hyene ne, Filistifoɛ hɔle kyɛ bɛkwaayeye Yisraelfoɛ bɔ bawuwu nemɔ bɛ nwo nningyein, na benwuni kyɛ Sɔɔlo ne ye mma mmienzua nza nemɔ batotɔ wɔ Gilboa bokaa ne aso.

⁹ Bɛpɛle Sɔɔlo ti, bɛyele ye nwo akodeɛ ne, na betuli ɛbɔfoɛ mɔ maa bɛhɔle Filistifoɛ aseɛ so amukoraa, kyɛ bɛɛbɔ ndɛenvɛen ne nwo amaneɛ wɔ bɛ mmosoen nemɔ awuro ne maen ne anu.

¹⁰ Bɛfale ye akodeɛ ne beeguale bosoen Astarote asɔneyɛɛ sua nu, na bɛfale ye fuin ne besinzele kuro bɔ oli Bete San fasue nwo.

¹¹ Na mmerɛ bɔ Yabese Gileadefoɛ tele nikyee bɔ Filistifoɛ afa ayɛ Sɔɔlo nen,

¹² bɛ koɛhonɛfoɛ ahoneserɛfoɛ nemɔ penene atee so. Bɛnatele kɔngɔen ne toonn, na bɛɛyele Sɔɔlo ne ye mma nemɔ fuin befili Bete San fasue ne anwo. Na bɛfale bɛ bɛwale Yabese bɛɛyerale bɛ wɔ berɛ.

¹³ Afei bɛsesale bɛ mmowue nemɔ besiele bɛ wɔ akyea ne abo wɔ Yabese, na bebua bɛlale ɛlɛsoo.