1 Samuel 29 - AHYERƐLƐ KRONGRON

Filistifoɛ po Dawide

¹ Afei Filistifoɛ boaboale bɛ koɛhonɛfoɛ amukoraati noa wɔ Afeke, yeɛ Yisraelfoɛ koso bɛkyekyele asikyeleɛ wɔ mbombonzue bɔ ɔwɔ Yesreel ne anwo.

² Mmerɛ bɔ Filistifoɛ ahemvo nemɔ bɛɛpɛle nu, bɛ nu biala ne ye koɛhonɛfoɛ ɛyaa ɛyaa ne apee apee ne, Dawide ne ye mmenia nemɔ ne Akise koso belili bɛ si bɛɛpɛle nu.

³ Yeɛ Filistifoɛ safohene nemɔ bisale kyɛ, “Hebrifoɛ hemɔ koso, b’amaneɛ wa?” Na Akise buale Filistifoɛ safohene nemɔ kyɛ, “Dawide ɛne. Yisrael hene Sɔɔlo ye somvoɛ bɔ waatena me wa kɔbo afoɛ ko ne, ye ɛne. Ofi mmerɛ bɔ ɔnwatili ɔɔfale ye nwo bɔle me ɔ, nnwuni ye nwo dwirɛ tɛɛ biala.”

⁴ Nakoso Filistifoɛ safohene nemɔ fɛle Akise so yaa, na besele ye kyɛ, “Ma akoaa he osa hɔ nekaa bɔ afa ama ye kyɛ ɔtena ne. Ɔnzɛ kyɛ yɛne ye bɔ nu yɛkɔ koɛ ne. Anyɔ a né wapɛ ye nwo ɔne yɛ aho. Nzikyɛ yeɛ sɔ akoaa he kɔfa kɔpata ye mene ɔ? Mmenia bɔ yɛwɔ wa ye, aso nna yɛ ti yeɛ ɔkɔfa kɔpata ye ɔ?

⁵ Aso nna Dawide he yeɛ bɛfale ye dumaa bɛtole dwein begole abilie kyɛ, ‘Sɔɔlo ahu apee apee, yeɛ Dawide ahu apee buru apee buru’ ne?”

⁶ Afei Akise frɛle Dawide sele ye kyɛ, “Kyɛ AWURADE te ase ye, edi nahorɛ. Ɔhale me ngome a, ahaa ɛne me yeɛ yɛkɔhɔ koɛ ne ɔ; ofikyɛ, ofi kyẽa bɔ ɛɛfale wɔ nwo bɔle me bɔ ɔbaadwu ɛnɛ ɔ, nnwuni wɔ nwo dwirɛ tɛɛ biala. Nakoso ahemvo ngaa nemɔ bɛmbene so kyɛ ɛne yɛ kɔhɔ ɔ.

⁷ Yiti sa kɔ. Kɔ asomdwee nu, na nnɛma Filistifoɛ ahemvo nemɔ bɛfɛ wɔ so yaa.”

⁸ Yeɛ Dawide sele Akise kyɛ, “Nzikyɛ yeɛ mayɔ ɔ? Ofi kyẽa bɔ nhyɛle ye bo nzole wɔ, bɔ ɔbaadwu ɛnɛ ɔ, Nana, me mene, nzikyɛ mvomsoɛ yeɛ anwu ye wɔ wɔ somvoɛ nwo ɔ, bɔ yiti ɔnzɛ kyɛ me ne wɔ pɔfoɛ mɔ yɛkɔko ɔ.”

⁹ Na Akise buale Dawide kyɛ, “Me ngome de, mese kyɛ wɔ nwo sannwuu kyɛ Nyameɛ abɔfo, nakoso Filistifoɛ safohene mɔ nwa: ‘Yɛ ne ye ngɔhɔ koɛ ne.’

¹⁰ Yiti ɛne wɔ mene somvoɛ mɔ bɔ bɛ ne wɔ wale ne, ɛ́mɔpɛ aleɛ bedwɔso. [Wɔ nwo dwirɛ tɛɛ bɔ baha ne, nnɛmaa ɔha wɔ, ofikyɛ me nye asɔ bɔ ayɔ ne.] Ɔsɛ kyɛ alebahyene ɛmɔdwɔso, na sɛ maen nu tete ala a, ɛ́mɔsi nu bɛhɔ nekaa bɔ mama ɛmɔaatena ne.”

¹¹ Yiti Dawide ne ye mmenia nemɔ sili nu alebahyene kyɛ besa bɛkɔ Filistifoɛ aseɛ so. Nakoso Filistifoɛ nemɔ de, bɛhɔle Yesreel.