1 Samuel 27 - AHYERƐLƐ KRONGRON

Dawide kɔ Filistifoɛ maen nu bieku

¹ Dawide hane ye wɔ ye ti anu kyɛ, “Annea a, ɛlɛho Sɔɔlo konya me kohũ me. Bɔ ɔsɛ kyɛ meyɔ ala ole kyɛ ngɔnwati ngɔhɔ Filistifoɛ aseɛ so. Ɔba ye sɔ a, Sɔɔlo kɔpa aba, bɔ ɔngɔpena me ko wɔ Yisrael aseɛ so ɔ, na ngɔnwati ngofi ye sa nu.”

² Yiti Dawide sili nu trale ɛwɛen ne hɔle Gate hene Akise bɔ ɔse ole Mayoke ne berɛ. Ɔne mmienzua ɛyaa nzia bɔ bɛboka ye so ne yeɛ bɛhɔle ɔ.

³ Dawide ne Akise bɛtenane Gate. Né ye koɛhonɛfoɛ nemɔ boka ye so wɔ berɛ, bɛ nu biala ne ye awuro ama, yeɛ Dawide koso ɔne ɔye nyɔ nemɔ. Bɛ ole Ahinoam bɔ ofi Yesreel, yeɛ Abigail bɔ ofi Kamɛl bɔ ohu Nabal wuli ne.

⁴ Na Sɔɔlo tele kyɛ Dawide anwati wahɔ Gate nen, ɔyakyili ye penalɛ.

⁵ Yeɛ Dawide sele Akise kyɛ, “Sɛ anya alo me de a, ye de maa bɛma me nekaa wɔ nguraa nemɔ ko aso ma ngɔndena dɔ. Nzu ati yeɛ ɔsɛ kyɛ w’akoaa ne wɔ bɛtena ahenguro wa ɔ?”

⁶ Na sɔ kyẽa ne ala, Akise fale akuraa bɔ oli Siklage mane ye. Na ɔnate sɔ ati, Siklage ɔɔyɛle Yuda ahemvo mɔ deɛ maa waadwu ɛnɛ.

⁷ Dawide lili afoɛ ko ne bosome nna wɔ Filistifoɛ maen ne anu.

⁸ Dawide ne ye mmenia nemɔ beetuale Gesurefoɛ, Gisifoɛ ne Amalɛkefoɛ, ofikyɛ Sure atee ne aso bɔ ɛfa kɔ Misraim aseɛ so ne, sɔ mmenia nemɔ yeɛ né ofi tetetete bɛte berɛ ɔ.

⁹ Sɛ né Dawide fa koɛ kɔtoa mbɔtam bie a, okũkũ berɛ ama, na ɔmma bienzua anaa brasua ko po nnya ye ti nnidi nu. Nakoso berɛ mmoaen, nandwie, afunum, afupɔngɔ ne ndaadeɛ mɔ de, né ɔsesa, na osa ba nekaa bɔ Akise wɔ ne.

¹⁰ Na sɛ Akise bisa ye kyɛ, “Nisua yeɛ ɛmɔahɔ baabɔ apaa ɛnɛ ye” a, ɔyɛ a Dawide bua ye kyɛ, “Yɛɛbɔle apaa ne wɔ Yuda aseɛ ne ngwaen dɔ”, anaa “Yerameelfoɛ aseɛ ne ngwaen dɔ”, anaa “Kenifoɛ aseɛ ne ngwaen dɔ.”

¹¹ Dawide anyakyi bienzua anaa brasua ko po ma wannya ye ti wannidi nu, kyɛ ɔ́fa ye ba Gate, ofikyɛ osusuli kyɛ, “Annea a, né baahã yɛ nwo dwirɛ kyɛ, ‘Bra bɔ Dawide abɔ hɔ ɛhe.’ ” Mmerɛ bɔ Dawide lili ye wɔ Filistifoɛ aseɛ so ne amukoraa, sɔ nikyee ne yeɛ ɔyɔle ɔ.

¹² Akise lele Dawide lili, na Akise dwenene kyɛ, “Wama ye nwo ayɛ ye bɔbɔ ye mmenia Yisraelfoɛ ahi paa, yiti ɔkɔyɛ me somvoɛ daa.”