1 Samuel 26 - AHYERƐLƐ KRONGRON

Dawide ma Sɔɔlo nya ye ti didi nu bieku

¹ Afei Sifefoɛ wale Sɔɔlo berɛ wɔ Gibea bɛɛhane kyɛ, “Dawide aafea Hakila bokaa bɔ ɔwɔ Yesimɔn ndendeneɛ so ne aso.”

² Yiti Sɔɔlo sili nu hɔle Sife ɛserɛ so, bɔ Yisrael koɛhonɛfoɛ apee nza bɔ bɛse ko paa boka ye so ɔ, kyɛ ɔkwaapena Dawide wɔ Sife ɛserɛ so.

³ Sɔɔlo kyekyele asikyeleɛ wɔ Hakila bokaa bɔ ɔwɔ Yesimɔn ndendeneɛ so ne aso, wɔ atee ne anoa. Nakoso Dawide de, ɔhale ɛserɛ ne aso, na ɔtele kyɛ Sɔɔlo awa kyɛ ɔbaapena ye ku ye.

⁴ Yiti Dawide somane mmenia maa bɛɛtetɛle, na benwuni kyɛ Sɔɔlo awa berɛ amba.

⁵ Afei Dawide sili nu hɔle nekaa bɔ né Sɔɔlo akyekye asikyeleɛ ne. Onwuni nekaa bɔ Sɔɔlo ne ye safohene Abenɛ, bɔ ɔte Nɛɛ awa ne bɛla ɔ. Né Sɔɔlo alafe wɔ asikyeleɛ ne afia, bɔ koɛhonɛfoɛ nemɔ bapɛ ye nwo bayia ɔ.

⁶ Yeɛ Dawide bisale Hitiniɛ Ahimɛlɛke, ɔne Yoabo aliɛma Abisae bɔ oni ole Seruya ne kyɛ, “Nwa yeɛ ɔne me kɔhɔ Sɔɔlo nwo dɔ wɔ asikyeleɛ ne anu ɔ?” Na Abisae buale kyɛ, “Me ne wɔ kɔhɔ.”

⁷ Yiti Dawide ne Abisae bɛhɔle koɛhonɛfoɛ nemɔ anwo dɔ kɔngɔen. Benwuni kyɛ Sɔɔlo alafe wɔ asikyeleɛ ne afia berɛ, bɔ ye pealɛɛ ne pena ye ti sorɔ ɔ. Né Abenɛ ne koɛhonɛfoɛ nemɔ koso balafe bapɛ ye nwo bayia.

⁸ Na Abisae sele Dawide kyɛ, “Nyameɛ afa wɔ pɔfoɛ wawura wɔ sa ɛnɛ, yiti maa mva pealɛɛ ne nwɔ ye komapɛ twe ma ɔha aseɛnwo berɛ; mengɔwɔ ye nyɔ koraa.”

⁹ Nakoso Dawide sele Abisae kyɛ, “Nnɛku ye! Nwa yeɛ ɔkɔhora kɔfa ye sa kɔha sona bɔ AWURADE apopa ye ngoo, bɔ ongoli fɔ ɔ?”

¹⁰ Yeɛ Dawide toale so sele kyɛ, “Kyɛ AWURADE te ase ye, AWURADE yeɛ okohu ye ɔ. Sɛ wanwu ye Ɛdangama wue a, bekohu ye wɔ koɛ nu.

¹¹ AWURADE pa gua kyɛ ngɔfa me sa ngɔhã sona bɔ AWURADE apopa ye ngoo ɔ. Nakoso tu pealɛɛ bɔ ɔpena ye ti sorɔ berɛ ne, ná fa nzue ngomvo ne boka so ma yɛhɔ.”

¹² Yeɛ Dawide fale pealɛɛ bɔ ɔpena Sɔɔlo ti sorɔ berɛ ne, ɔne nzue ngomvo ne, na besili nu bɛhɔle. Ebiala nye ambɛ so, anaa ebiala ande, yeɛ ebiala andingye. Né bɛ mukoraa balafe, ofikyɛ né AWURADE ama nnafelɛ hatee atɔ bɛ so.

¹³ Afei Dawide trale bɔnza ne hɔle ye si dɔ, na oogyinane bokaa ne ti afia wɔ dedeede. Né ɔne nekaa bɔ Sɔɔlo wɔ ne, nu twe.

¹⁴ Na Dawide tole koɛhonɛfoɛ nemɔ ne Nɛɛ awa Abenɛ huuu kyɛ, “Abenɛ ee! Engosuro hɔ ɔ?” Yeɛ Abenɛ teane nu bisale kyɛ, “Wɔ nwa ɛne, bɔ ɛ́to Nana Sɔɔlo huuu ne?”

¹⁵ Na Dawide buale Abenɛ kyɛ, “Saa ɛtte bienzua! Nwa yeɛ ɔne wɔ bɛte pɛ wɔ Yisrael ɔ? Nzu ati yeɛ ammɔ wɔ mene Nana Sɔɔlo nwo waen ɔ? Koɛhonɛfoɛ ne, ko wale asikyeleɛ ne anu kyɛ ahaa ɔbaahu wɔ mene Nana Sɔɔlo.

¹⁶ Sɔ nikyee he bɔ ayɔ ye, ɔtte mayee. Na kyɛ AWURADE te ase ye, odi kyɛ beku ɛmɔ, ofikyɛ ɛmɔammɔ ɛmɔ mene bɔ AWURADE apopa ye ngoo ne nwo waen. Nea, Nana Sɔɔlo pealɛɛ ne, ɔne nzue ngomvo bɔ ogyi ye ti sorɔ berɛ ne, bɛwɔ nisua?”

¹⁷ Sɔɔlo tele kyɛ Dawide komvi ɔ, na ɔhane kyɛ, “Mma Dawide, wɔ yeɛ édwudwo ye anaa?” Na Dawide buale kyɛ, “Me mene, Nana Sɔɔlo, me yeɛ médwudwo ye.”

¹⁸ Na Dawide fa sɔle so kyɛ, “Nzu ati yeɛ me mene ɔfoa ye somvoɛ ɔ? Mayɔ nzu? Bɔne beni yeɛ mayɔ ɔ?

¹⁹ Nana, me mene, tie wɔ somvoɛ noa dwirɛ. Sɛ AWURADE yeɛ wamaa atu me anyeɛ a, ye de mesrɛ kyɛ ole afɔleɛ ná ɔyakyi. Nakoso sɛ kuro mmenia ahɔ de a, ye de AWURADE tua bɛ kerɛ, ofikyɛ ɛnɛ bafoa me bafi AWURADE agyapadeɛ ne anwo bɔ mengonya bie ɔ. Na bɛnwa: ‘Kɔso nyameɛ foforɛ biemɔ.’

²⁰ Yiti aseɛ bɔ so ama nze AWURADE ne, nnɛkã me mogya gua wɔ so. Sosoa komapɛ yeɛ Yisrael hene asi nu wawa kyɛ ɔbaahye ye ɔ, kyɛbɔ sona foa akɔkɔhwereɛ wɔ mmokaa so ɔ.”

²¹ Yeɛ Sɔɔlo sele kyɛ, “Mayɔ bɔne, mma Dawide, sa bra, na mengotu me nye ngosie wɔ so ko, ofikyɛ ɛnɛ ahyire kyɛ me ngoa nwo hia wɔ. Mali ngwaseasɛm, na mali edwirɛ tɛɛ piri paa.”

²² Na Dawide buale kyɛ, “Nana, wɔ pealɛɛ ne ɛhe. Ma wɔ mmerandeɛ nemɔ ko bra ɔɔfa.

²³ Sona biala ye tengyɛlɛ ne ye nahorɛlilɛ, yeɛ AWURADE gyina so ɔma ye nwo akatuaa ɔ. AWURADE fale wɔ wurale me sa ɛnɛ kyẽa ye, nakoso né menguro kyɛ ngɔfa me sa ngɔhã sona bɔ AWURADE apopa ye ngoo ne ɔ.

²⁴ Na kyɛbɔ mama wɔ ngoa nwo ahia me ɛnɛ ne, sɔ ala yeɛ mesrɛ AWURADE kyɛ, ɔ́ma me ngoa nwo hia ye, ná ole me fi amaneɛ mukoraati nu ɔ.”

²⁵ Na Sɔɔlo buale Dawide kyɛ, “Nyameɛ yira wɔ, mma Dawide. Ɛkɔyɔ nningyein pee, na ekoli nu ngonim.” Afei Dawide sili nu hɔle, na Sɔɔlo koso sa hɔle ye awuro.