1 Samuel 24 - AHYERƐLƐ KRONGRON

Dawide ma Sɔɔlo nya ye ti didi nu

¹ Sɔɔlo ne Filistifoɛ bɛɛhone koɛ, na osa wale ne, bɛbɔle ye amaneɛ kyɛ, “Dawide wɔ Ɛn Gedi ɛserɛ ne aso.”

² Yiti Sɔɔlo yele koɛhonɛfoɛ apee nza bɔ bɛse ko paa ɔ fili Yisrael maen ne amukoraati nu, na ɔhɔle Dawide ne ye mmenia nemɔ penalɛ wɔ Gyane Nyɔbotaen mɔ atee ne aso dɔ.

³ Sɔɔlo oodwuli mmoaennduin biemɔ anwo wɔ atee ne noa. Né nyɔboɛ bie asi sua wɔ berɛ, na owurale nu kyɛ ɔkɔ bakaa so. Nyɔbotaen bɔ wasi sua ne, né Dawide ne ye mmenia nemɔ baawurawura ye kunu dɔ paa.

⁴ Na Dawide mmenia nemɔ sele ye kyɛ, “Ɛnɛ kyẽa ye yeɛ AWURADE hane ye nwo dwirɛ hyirele wɔ kyɛ, ‘Ngɔfa wɔ pɔfoɛ ngowura wɔ sa maa ɛkɔfa bɔ ekuro biala kɔyɛ ye.’ ” Na Dawide yɛle kudɛɛ ɔɔpɛle Sɔɔlo ataadeɛ tendenn ne noa.

⁵ Na ɛhe asi ne, Dawide tiboa buale ye fɔ, kyɛ wapɛ Sɔɔlo ataadeɛ tendenn ne noa ɔ.

⁶ Na osele ye mmenia nemɔ kyɛ, “AWURADE pa gua kyɛ ngɔyɔ sɔ nikyee ne ngotia me mene bɔ AWURADE apopa ye ngoo ɔ, kyɛ ngɔfa me sa ngɔhã ye ɔ, ofikyɛ AWURADE apopa ye ngoo.”

⁷ Yiti Dawide hwili ye mmenia nemɔ nyunu, na wamma bɛ ate ma banyɔ Sɔɔlo nikyee fee. Afei Sɔɔlo dwɔsole, na ofili nyɔboɛ bɔ wasi sua ne anu sili nu kyɛ ɔkɔ.

⁸ Ye si ye, Dawide koso fili nyɔboɛ bɔ wasi sua ne anu fitele, na ɔtole Sɔɔlo huuu kyɛ, “Nana, me mene ee!” Sɔɔlo pɛle ye nye neane nziɛ, na Dawide fale ye nyunu butuli berɛ anidie nu.

⁹ Na Dawide sele Sɔɔlo kyɛ, “Bɛ bɔ bɛkeka kyɛ, ‘Dawide pena wɔ ku wɔ’ ne, nzu ati yeɛ etie bɛ dwirɛ ye?

¹⁰ Tie, ɛnɛ kyẽa ye, wɔ nye tua kyɛbɔ AWURADE fale wɔ wurale me sa, wɔ nyɔboɛ bɔ wasi sua ne anu ɔ. Ebiemɔ sele me kyɛ ngu wɔ, nakoso mamaa anya wɔ ti adidi nu. Na ngane kyɛ, ‘Mengɔfa me sa ngɔhã me mene, ofikyɛ AWURADE apopa ye ngoo.’

¹¹ Oo me baba, nea kyɛ ndira w’ataadeɛ tendenn ne noa ɔ. Sɛ mapɛ w’ataadeɛ tendenn ne noa, ná mangu wɔ a, ye de odi kyɛ ɛte ye bo kyɛ, wɔ nwo adwene tɛɛ biala nne me ti anu, anaa nnyɔle wɔ nwo lɔen. Nnyɔle wɔ bɔne biala, nakoso ɛpena me ku me.

¹² Me ne wɔ yɛ munyɔ, AWURADE yeɛ okohyire bɔ odi fɔ ɔ! AWURADE yeɛ ɔkɔtɔ wɔ so wereɛ kɔma me ɔ. Nakoso me de, mengɔfa me sa ngɔhã wɔ.

¹³ Na mbanyi mɔ bu anyandera kyɛ, ‘Sona bɔ ɔtte mayee ne, ye yɔleɛ koso ɔtte mayee.’ Nakoso me de, mengɔfa me sa ngɔhã wɔ.

¹⁴ Nwa koraa yeɛ Yisrael hene kyini pena ye ku ye ye? Nwa yeɛ ɛfoa ye ye? Aso nna kyea fuin yeɛ ɛfoa ye ɔ? Aso nna sosoa ko yeɛ ɛfoa ye ye?

¹⁵ AWURADE te ndɛenbualɛniɛ, na yɛ nu ko bɔ odi fɔ ne, okobua ye fɔ. Mesrɛ kyɛ ɔneanea nu, oli me dwirɛ ma me, ná ole me fi wɔ sa nu.”

¹⁶ Dawide hane sɔ dwirɛ ne hyirele Sɔɔlo yiele nen, Sɔɔlo sele kyɛ, “Mma Dawide, wɔ yeɛ edwudwo ye?” Na Sɔɔlo suni hahii.

¹⁷ Na osele Dawide kyɛ, “Ɛtengyɛ tra me; ofikyɛ paa ala yeɛ ayɛ me ɔ, nakoso me de, bɔne yeɛ mafa matua wɔ kerɛ ɔ.

¹⁸ Ɛnɛ amaa manwu kyɛbɔ asi alo me ɔ, ofikyɛ mmerɛ bɔ AWURADE fale me wurale wɔ sa ne, angu me.

¹⁹ Nwa yeɛ ɔkɔto ye pɔfoɛ a, ɔmaa ɔfa ye nwo di tɔtorɔtɔɔ ɔkɔ ɔ? Paa bɔ afa ayɛ me ɛnɛ ye, mesrɛ kyɛ AWURADE ɔma wɔ ye nwo akatuaa paa.

²⁰ Afei de, mese kyɛ ekoli hene amba, na Yisrael ahennie ne, wɔ sa nu yeɛ ye bo kotimu ɔ.

²¹ Fa AWURADE ta ndaen kyire me, kyɛ me boso ama mɔ, engonua bɛ boso, kyɛ ɛngɔkyikyi me dumaa ngofi me se awuro.”

²² Yiti Dawide tale sɔ ndaen ne hyirele Sɔɔlo. Afei Sɔɔlo sili nu hɔle awuro, na Dawide ne ye mmenia nemɔ koso bɛfo bɛhɔle anwoserɛ afealeɛ ne anu.