1 Samuel 21 - AHYERƐLƐ KRONGRON

Dawide nwati kɔ Nɔbo

¹ Dawide hɔle ɔsɔfo Ahimɛlɛke berɛ wɔ Nɔbo. Ahimɛlɛke fale ahunundetelɛ ooyiale ye, na obisale ye kyɛ, “Nzu ati yeɛ wɔ ngome twe ɛnate ɔ bɔ ebiala ɔbboka wɔ so ye?”

² Yeɛ Dawide buale ɔsɔfo Ahimɛlɛke kyɛ, “Nana Sɔɔlo asoma me wafa adwuma bie wawura me sa, na ɔnwa: ‘Ɛsomanɛ bɔ mésoma wɔ ye, nnɛma ebiala te ye nwo bie, yeɛ nnɛma ebiala te nikyee bɔ mahyɛ wɔ kyɛ ɛɛyɔ ne!’ ” Na Dawide toale so hane kyɛ, “Me mmerandeɛ nemɔ de, me ne bɛ yahyehyɛ nekaa bie bɔ beeyia me ɔ.

³ Nzikyɛ aleɛ yeɛ ele ye wɔ berɛ kekesaala ye ɔ? Ma me paanoo nnu anaa aleɛ biala bɔ ele ye wɔ berɛ ɔ.”

⁴ Na ɔsɔfo ne buale Dawide kyɛ, “Nnne paanoo mbaen biala wɔ wa, sana paanoo krongron ne ala. Nakoso sɛ mmerandeɛ nemɔ bɛffale bɛ nwo bɛhhane mmrasua ɛlɛsa ye de a, ye de bɛkora bedi bie.”

⁵ Na Dawide buale ɔsɔfo ne kyɛ, “Nahorɛ nu, mmerɛ biala bɔ ngɔhɔ koɛ ne, yɛtwe yɛ nwo yɛfi mmrasua nwo. Sɛ yɛtu atee mbaen bie po a, mmerandeɛ nemɔ bɛngɔ mmrasua nwo. Ɔkɔyɛ sɛɛ bɔ ɛnɛ ye de bekogua bɛ nwo fiɛ ɔ?”

⁶ Yiti ɔsɔfo ne fale paanoo krongron ne mane ye, ofikyɛ né paanoo biala nne berɛ kyɛ paanoo bɔ bɛfa begua afɔleɛ poen so ne. Né sɛ bɛye befi AWURADE nyunu a, bɛfa paanoo hyerɛ besi bɛ gya nu sɔ kyẽa ne ala.

⁷ Sɔ kyẽa ne, né Sɔɔlo somvoɛ nemɔ ko wɔ Ahimɛlɛke berɛ, ofikyɛ né ole dwumadie bie di wɔ AWURADE nyunu. Oli Dɔɔgye, ɔte Edomniɛ, na né ɔte Sɔɔlo mmoaenneafoɛ nemɔ so panyi.

⁸ Na Dawide bisale Ahimɛlɛke kyɛ, “Elle pealɛɛ anaa ngrandɛ biala wɔ wa? Mamva me ngrandɛ anaa m’akodeɛ mamma, ɔnate kyɛ Nana Sɔɔlo somanɛ ne, ɔyɛle mbendene so.”

⁹ Yeɛ ɔsɔfo ne buale kyɛ, “Filistiniɛ Goliate bɔ ehuni ye wɔ Ela bɔnza ne anu ne, ye ngrandɛ ne wɔ wa. Bafa ɛtena bakyekye ye nwo, na ɔla ɔsɔfo ataadeɛ ne asi dɔ. Sɛ ekuro kyɛ ɛfa a, fa, ofikyɛ ngrandɛ biala nne wa ko, sana ɛhe ala.” Na Dawide buale kyɛ, “Ngrandɛ biala ne ye nzɛ, fa ma me.”

Dawide nwati kɔ Gate

¹⁰ Sɔ kyẽa ne, Dawide toale so nwatili fili Sɔɔlo berɛ, na ɔhɔle Gate hene Akise berɛ.

¹¹ Na Akise somvoɛ nemɔ sele ye kyɛ, “Dawide bɔ ɔte hene wɔ ye aseɛ so ne, aso nna ye ɛhe? Aso nna ye yeɛ begole abilie bɛtole dwein bɛfrɛfrɛle ye kyɛ, ‘Sɔɔlo ahu apee apee, yeɛ Dawide ahu apee buru apee buru’ ne?”

¹² Dawide dwenene sɔ dwirɛ ne anwo, na ɔmaa osurole Gate hene Akise.

¹³ Yiti ɔmane ye yɔbea sesane wɔ bɛ nyunu berɛ, na ɔhyɛle da yɛle ye nwo kyɛ bɔnamvoɛ wɔ bɛ nyunu berɛ. Anoa bɔ ɔwɔ pambim ne anu ne, odwiridwirili ye nwo, na ɔmane ye noa nzue songyili ooguale ye kanza nu.

¹⁴ Na Akise sele ye somvoɛ nemɔ kyɛ, “Ɛmɔse kyɛ akoaa he abɔ laen. Nzu ati yeɛ ɛmɔafa ye babrɛ me ɔ?

¹⁵ Bɔnamvoɛ yɛ me nna, bɔ yeɛ ɛmɔafa akoaa he bawa me wa, kyɛ ɔɔma ye laen ne ogyina nu wɔ me nyunu ye? Ɔyɛle sɛɛ bɔ sɔ akoaa he nyane atee wale m’awuro ɔ?”